ဧရာဝတီတိုင်းမ်
ဒီဇင်ဘာ ၁၇ရက်
စစ်ကော်မရှင်နှင့် အပစ်အခတ်ရပ်စဲရေး သဘောတူညီမှုယူထားသည့် ကိုးကန့်တပ် (MNDAA) နှင့် တအာင်းတပ် (TNLA) တို့က စစ်ကော်မရှင်၏ စစ်ရာဇဝတ်မှုလုပ်ရပ်အပေါ် ကန့်ကွက်ရှုံ့ချခဲ့သည်။
မြောက်ဦး ပြည်သူ့ဆေးရုံ ဗုံးကြဲခံရပြီး ပြည်သူအစုလိုက်အပြုံလိုက်သေဆုံးခဲ့ရသည့် လုပ်ရပ်ကို ကျူးလွန်သည့် စစ်ကော်မရှင်၏ အပြုအမူသည် မြန်မာပြည်ကို ကျရှုံးနိုင်ငံအဖြစ် အဆုံးစွန်ထိတွန်းပို့နေသည်ဟု MNDAA နှင့် TNLAတို့က ဒီဇင်ဘာ ၁၆ရက်နေ့တွင် ထုတ်ပြန်လာသည်။
ပြီးခဲ့သည့် ဒီဇင်ဘာ ၁၀ရက်နေ့ ညပိုင်းက မြောက်ဦးပြည်သူ့ဆေးရုံကို စစ်ကော်မရှင်က ဗုံးကြဲခဲ့သည့်အတွက် ပြည်သူ ၃၃ဦးသေဆုံးပြီး ၇၇ဦး ထိခိုက်ဒဏ်ရာများရရှိခဲ့သည်။
မြောက်ဦးကိုဗုံးကြဲပြီး နောက်တစ်ရက် ဒီဇင်ဘာ ၁၁ရက်နေ့တွင် ကျောက်ဖြူမြို့နယ် င/လုံးစုကျေးရွာကို စစ်ကော်မရှင်က ဗုံးကြဲတိုက်ရာ ပြည်သူ ရှစ်ဦးသေဆုံးပြီး ၁၆ဦး ဒဏ်ရာ ရရှိခဲ့သည်။
ထို့အပြင် ဒီဇင်ဘာ ၁၃ရက်နေ့တွင် ကျောက်ဖြူမြို့နယ်အတွင်းရှိ ကျေးရွာ သုံးရွာမှ ဘုန်းကြီးကျောင်း နှစ်ကျောင်းနှင့် မူလတန်းကျောင်းတို့ကို စစ်ကော်မရှင်က အသေခံဒရုန်းများဖြင့် ဗုံးကြဲချတိုက်ခိုက်ခဲ့သည်။
စစ်ကော်မရှင်၏ လုပ်ရပ်ဆိုးများကို အမြန်ဆုံးရပ်တန့်ပေးပါရန် ကမ္ဘာ့ကုလသမဂ္ဂအဖွဲ့နှင့် ကမ္ဘာ့နိုင်ငံများရှိ အစိုးရအဖွဲ့များကူညီပေးကြပါဟု MNDAAနှင့် TNLAကတောင်းဆိုထားသည်။
