ငပြီကျွန်းတွင် စစ်တပ်၏ တပ်ရင်း၂ ရင်းက ခြေကုတ်ယူရန် ကြိုးပမ်းနေပြီး AAက လိုက်လံ ပစ်ခတ်နေ

‎ဧရာဝတီတိုင်းမ်
‎အောက်တိုဘာ ၃၁ ရက်

‎‎​ရခိုင်ပြည်နယ်၊ ဝီရဌာနီမြို့နယ်၊ ငပြီကျွန်းတွင် ခမရ (၃၅၄) နှင့် ခမရ (၃၄၄) တို့၏ လက်ကျန်တပ်များအနေဖြင့် ကျွန်း၏ အရှေ့မြောက်ဘက်ကို ဆက်လက် ဦးတည်နိုင်ရေးအတွက် ကြိုးပမ်းနေသည်ကို တွေ့ရှိရကြောင်း သတင်းရင်းမြစ်များထံမှ သိရသည်။

‎စစ်တပ်က ​လက်နက်ကြီးစခန်းကို နေရာအတည်တကျ ခြေကုပ်ယူနိုင်ခြင်းမရှိသေးဘဲ ယာယီအမြောက်စခန်း ပုံစံမျိုးဖြင့် ရွှေ့ပြောင်းပစ်ခတ်လျက်ရှိပြီး ငပြီကျွန်းနှင့် ရွှေမင်းဂံ ရေတပ်စခန်း ရေကြောင်းဆက်သွယ်မှု ပြန်လည်ရရှိသွားကာ လူနာများကိုလည်း ရေကြောင်းဖြင့် ပြန်လည်သယ်ဆောင်သွားခဲ့ပြီးဖြစ်ကြောင်း သိရသည်။ ထို့ပြင် ခမရ (၃၄၄) မှ စစ်ကြောင်းနှစ်ကြောင်းမှာလည်း စစ်ကူလိုက်ရန် ပြင်ဆင်ထားပြီးဖြစ်သည်ဟု သိရသည်။

‎”ငပြီကျွန်းပေါ် စစ်တပ်က ခြေကုတ်မရသေးဘူး။ လက်နက်ကြီးတွေနဲ့ လှည့်လည်နေရတဲ့သဘောရှိတယ်။ AAကလည်း လိုက်ချေမှုန်းနေတယ်လို့ သိရတယ်” ဟု သတင်းရင်းမြစ်က ဧရာဝတီတိုင်းမ်ကို ပြောသည်။

‎တပ်ဖြန့်ထားသည့် တပ်မ ၁၀၁ ကို ပုဏ္ဏားကျွန်း စစ်မျက်နှာပြင်တွင် အသေခံ ခံစစ် ဆင်ခိုင်းထားပြီး နယ်မြေခံတပ်စခန်းများက ငပြီကျွန်းဘက်ကို အလစ်အငိုက်ယူ တိုက်စစ်ဆင်လာခဲ့ခြင်းမျိုးဖြစ်ကြောင်း သတင်းရင်းမြစ်များထံမှ သိရသည်။

‎ငပြီကျွန်းကို စစ်တပ်က နည်းမျိုးစုံဖြင့်ကမ်းတက် ခြေကုတ်ယူရန်ကြိုးပမ်းနေသော်လည်း AAဘက်က အပြည့်အဝထိန်းချုပ်ထားဆဲဖြစ်ကြောင်း ဦးခိုင်သုခက ပြောထားသည်။

ပြီးခဲ့သည့် အောက်တိုဘာ ၂၆ရက်က စစ်တွေတိုက်ပွဲနှင့် ငပြီကျွန်းပါ်ကို ပစ်ကူပေးနေသည့် ကုလားတန်မြစ်ဝမှ စစ်သင်္ဘော သုံးစီးကို AAက ပစ်ခတ်ဖျက်ဆီးထားပြီးဖြစ်သည်။ ထို့အပြင် နတ်ရေကန်ဗျူဟာမှ ခဲယမ်း၊ ရိက္ခာပို့သည့် ပါရာမော်တာကို ယမန်နေ့ အောက်တိုဘာ ၃၀က ပစ်ချနိုင်ခဲ့သည်။