ဧရာဝတီတိုင်းမ်
ဒီဇင်ဘာ ၁၅ ရက်
ရခိုင်-ဘင်္ဂလားဒေရှ့်နယ်စပ်ရှိ နယ်စပ်လုံခြုံရေးစခန်းတစ်ခုကို လက်နက်ကိုင်အဖွဲ့များက ဘင်္ဂလားဘက်အခြမ်းမှ အလစ်အငိုက်ချောင်းမြောင်းပစ်ခတ်ပြီး ဘင်္ဂလားဒေရှ့်ဘက်အခြမ်းသို့ ဆုတ်ခွာထွက်ပြေးသွားကြောင်း သိရသည်။
ပြီးခဲ့သည့် ဒီဇင်ဘာ ၁၃ ရက်၊ နံနက် ၆ နာရီ ၃၀ မိနစ်အချိန်၌ အာရက္ခတပ်တော် AA ထိန်းချုပ် ထားသည့် ရခိုင်-ဘင်္ဂလားဒေ့ရှ်နယ်စပ်ရှိ မောင်တောခရိုင်၊ အထက်ကျီးကျွန်း၊ နယ်စပ်မှတ်တိုင် (၂၀/၂၁) အကြားရှိ နယ်စပ်လုံခြုံရေးစခန်းတစ်ခုကို တိုက်ခိုက်ခဲ့ကြောင်း ယနေ့ ဒီဇင်ဘာ ၁၅ရက်နေ့တွင် AA ကထုတ်ပြန်လာသည်။
အင်အား ၁၀ ဦးခန့်ပါ အကြမ်းဖက် လက်နက်ကိုင်အဖွဲ့ဝင်များသည် ဘင်္ဂလားဖက်ခြမ်းမှ ဖြတ်ကျော်ဝင်ရောက်ပြီး လက်နက်ငယ်အပါအဝင်၊ 40 MM (79) ဖြင့် မိနစ်အနည်းငယ်ကြာ အလစ်အငိုက်ချောင်းမြောင်းပစ်ခတ် တိုက်ခိုက်ခဲ့သည်ဟု AAက ဆိုသည်။
AAတပ်ဖွဲ့ဝင်များမှ ပြန်လည်ပစ်ခတ်တိုက်ခိုက်ခဲ့မှုကြောင့် အဆိုပါ လက်နက်ကိုင်အဖွဲ့သည် ဘင်္ဂလားဘက်ခြမ်းရှိ BGB နယ်ခြားစောင့်စခန်းတစ်ခုအနီးသို့ ဆုတ်ခွာထွက်ပြေးသွားခဲ့ကြကြောင်း သိရသည်။
”ARSA ၊ RSO ၊အစ္စလာမ်မစ်အစွန်းရောက် စစ်သွေးကြွအကြမ်းဖက် လက်နက်ကိုင်အဖွဲ့ဝင်များ၏ ယခုကဲ့သို့ အလစ်အငိုက်တိုက်ခိုက်ခြင်းအပါအဝင် အရပ်သားပြည်သူလူထုများကို ချုံခိုတိုက်ခိုက်ခြင်း၊ သတ်ဖြတ်ခြင်း၊ ပြန်ပေးဆွဲခြင်း၊ ငွေညှစ်ခြင်းတို့ကို ပြုလုပ်နေခဲ့သည်မှာ ကြိမ်ဖန်များစွာရှိခဲ့ပြီးဖြစ်ပါသည်” ဟု AAက ပြောသည်။
မိမိတို့ အာရက္ခနယ်စပ်ရှိ နေရာများသို့ ဘင်္ဂလားဘက်ခြမ်းမှ ယခုကဲ့သို့ ဖြတ်ကျော်ဝင်ရောက်ကာ အလစ်အငိုက်၊ ချောင်းမြောင်း တိုက်ခိုက်သောလုပ်ရပ်များမှာ အကျင့်ပျက် BGB တပ်မှူးများ မှ မသိကျိုးကျွန်ပြုကာ အကြမ်းဖက်သမားများကို အားပေးအားမြှောက်ပြုနေသကဲ့သို့ ဖြစ်နေသောကြောင့် နယ်စပ် တည်ငြိမ်ရေးကို များစွာအနှောင့်အယှက်ဖြစ်စေပါသည်ဟုလည်း AA က ထုတ်ပြန်ချက်တွင် ထည့်သွင်း ဖော်ပြသည်။
ထို့အပြင် မိမိတို့အကြားတွင်ရှိနှင့်ပြီးသား နှင့် တည်ဆောက်နေကြသော ယုံကြည်မှုများကို ဆုတ်ယုတ်စေကာ မလိုလားအပ်သော နောက်ဆက်တွဲများဖြစ်ပေါ်လာမည်ကို စိုးရိမ်မိပါသည်ဟုလည်း AAကပြောဆိုထားသည်။
