ဧရာဝတီတိုင်းမ်
နိုဝင်ဘာ ၃၀ ရက်
မကွေးတိုင်း၊ ပဒါန်းတပ်နယ်အတွင်းရှိ နတ်ရေကန်ဗျူဟာကုန်းကို စစ်ကော်မရှင်က ရရာနည်းလမ်းအစုံသုံး၍ ရိက္ခာနှင့် ခဲယမ်းပို့ရန် ကြိုးစားနေကြောင်း သိရသည်။
ပြီးခဲ့သည့် နိုဝင်ဘာ ၂၂ရက်နေ့မှစတင်ကာ နတ်ရေကန်ဗျူဟာကို စစ်ကူနှင့် ရိက္ခာ၊ ခဲယမ်းပို့ရန် မြေပြင်စစ်ကြောင်းများကို သုံးခဲ့သော်လည်း ထိရောက်မှုမရှိဘဲ ဂုတ်ကြီး ကျေးရွာအနီးတွင် တိုက်ပွဲ ဖြစ်ခဲ့ကြောင်း သတင်းရင်းမြစ်ထံမှ သိရသည်။
”မြေပြင်စစ်ကူကို မစခ ၉၀၅ထဲစုဖွဲ့ထားပြီး အသုတ်လိုက်ပို့နေတယ်။ ခဲယမ်းကားကြီး နှစ်စီးလည်း အစောင့်အရှောက်တွေနဲ့ နတ်ရေကန်ဘက်တက်ထားတာရှိတယ်။ ရောက်၊ မရောက်ကိုတော့ အသေအချာ မပြောနိုင်ဘူး” ဟု စစ်ရေးသတင်းရင်းမြစ်က ဧရာဝတီတိုင်းမ်ကိုပြောသည်။
မြေပြင်စစ်ကြောင်းများနှင့် ချိတ်ဆက်နိုင်ခြင်းမရှိသည့်အတွက် စစ်ကော်မရှင်က ပြီးခဲ့သည့် ရနိုဝင်ဘာ ၂၅ရက်နေ့နှင့် ၂၆ရက်နေ့တို့တွင် လေကြောင်းမှ ရိက္ခာနှင့် ခဲယမ်းထုတ်များ ချပေးခဲ့ကြောင်း သိရသည်။
စစ်ကော်မရှင်ချပေးသည့် ရိက္ခာနှင့် ခဲယမ်းထုတ်အများစုကို AAနှင့်တော်လှန်ရေးတပ်ဖွဲ့များကရရှိခဲ့ကြောင်း သိရသည်။
နတ်ရေကန်ဗျူဟာကုန်းတွင် တပ်မမှူး နှစ်ဦးနှင့်အတူ အင်အား ၃၀၀ ခန့်ပိတ်မိနေပြီး အများစုမှာ ထိခိုက်ဒဏ်ရာရရှိကာ ဆေးကုသနိုင်သည့်အခြေအနေမရှိကြောင်း သတင်းရင်းမြစ်များထံမှ သိရသည်။
နတ်ရေကန်ပတ်လည်ရှိ ကာကင်းစခန်းများအားလုံးနီးပါး သိမ်းယူခံရပြီးဖြစ်သော်လည်း စစ်ကော်မရှင်၏ စစ်ကြောင်းအချို့မှာ လမ်းသစ်၊ လမ်းဟောင်း နှစ်ခုတွင် စုဖွဲ့ လှုပ်ရှားမှု ရှိနေသေးကြောင်း သိရသည်။
အဆိုပါ လမ်းကြောင်းနှစ်ခုကိုလည်း တော်လှန်ရေးတပ်ဖွဲ့များနှင့် AAက ရသမျှ ပိတ်ဆို့ထားပြီး ကြားဖြတ်တိုက်ခိုက်မှုများ ဆက်တိုက်ပြုလုပ်နေခဲ့ခြင်း ဖြစ်သည်။
ယခုရက်ပိုင်းတွင် စစ်ရေးလှုပ်ရှားမှု သတင်းများထွက်ပေါ်လာခြင်းမရှိသေးသော်လည်း ယမန်နေ့ နိုဝင်ဘာ ၂၉ ရက်က ဆုံကုန်း မစခ ၉၀၅ အမြောက်စစ်ဆင်ရေးဌာနချုပ်မှနေ၍ လက်နက်ကြီးများ ဆက်တိုက်ပစ်ခတ်မှုပြုလုပ်ခဲ့ကြောင်း သိရသည်။
