ဧရာဝတီတိုင်းမ်
နိုဝင်ဘာ ၃၀ ရက်
ပဲခူးတိုင်းအနောက်ခြမ်း၊ နတ်တလင်းမြို့နှင့် အနောက်ခြမ်းရှိကျေးရွာများတွင် ကြံ့ခိုင်ရေးပါတီ၏ မဲဆွယ်ဆိုင်းဘုတ်များ မီးရှို့ဖျက်ဆီးခံခဲ့ရကြောင်း သိရသည်။
ပြီးခဲ့သည့် နိုဝင်ဘာ ၂၆ ရက်နေ့ ညပိုင်းအချိန်တွင် နတ်တလင်းအနောက်ခြမ်းရှိ ကျေးရွာ ၂၀ ခန့်တွင် ကြံ့ခိုင်ရေးပါတီအောင်နိုင်ရေး မဲဆွယ်ဆိုင်းဘုတ်များ မီးရှို့ဖျက်ဆီးခံခဲ့ရသည့်အတွက် ဒေသခံများကိုခေါ်ယူစစ်ဆေးမှုများရှိခဲ့ကြောင်း ဒေသခံများထံမှ သိရသည်။
“ပြောရရင် တပြိုင်တည်း မီးရှို့ဖျက်ဆီးခံရတာ။ နောက် ၂၇ ရက်နေ့မှာ တာပွန်ရဲစခန်းက ရဲတွေနဲ့ပျူတွေရောက်လာပြီး ဒေသခံတွေကို ခေါ်မေးတာရှိတယ်”ဟု နတ်တလင်းဒေသခံတစ်ဦးက ဧရာဝတီတိုင်းမ်ကို ပြောသည်။
နတ်တလင်းမြို့နောက်ခြမ်းရှိ ရွှေကြာပင်၊ လှပခြင်း၊ ထိပ်ပိတ်၊ ကွက်ကြီး၊ အောင်ပင်သာ၊ ပွတ်စု၊ လဲတော၊ နွယ်ခွေ တောင်ယာတော၊ ချောက်ခမ်း၊ ရေမွေး၊ ကုလားတက်ကွင်း၊ တောင်ရေကန်၊ ချင်းကုန်းကံ၊ အောင်ချမ်းသာ၊ ကြာကံ၊ ပွဲသာ၊ ဂွေးကြီး၊ ဂွေးလေး လှေကြပ်ကုန်းစသည့် ကျေးရွာများတွင် စိုက်ထူထားသည့် ကြံ့ခိုင်ရေးပါတီဆိုင်းဘုတ်များ မီးရှို့ခံခဲ့ရခြင်းဖြစ်ကြောင်း သိရသည်။
မြို့နယ်အနှံ့တွင် ကြံ့ခိုင်ရေးပါတီဆိုင်းဘုတ်များ ဖျက်ဆီးခံရမှုများနေခြင်းကြောင့် ဆိုင်းဘုတ်အနီး လုံခြုံရေးများ ချထားခြင်း၊ ဘေးတွဲကယ်ရီသမားများကို စောင့်ကြည့်ခိုင်းခြင်းများရှိကြောင်း သိရသည်။
ဓာတ်ပုံ- ဖျက်ဆီးခံရသည့် ကြံ့ဖွံ့ဆိုင်းဘုတ်အချို့
