ဧရာ၀တီတိုင်းမ်
(တောင်ငူ) နိုဝင်ဘာ ၃၀ ရက်
ပဲခူးတိုင်း၊ တောင်ငူခရိုင်၊ အုတ်တွင်းမြို့ အနောက်ဘက် (၁၆) မိုင်အကွာရှိ ဘုတလင်းကျေးရွာတွင် ပြီးခဲ့သည့် နိုဝင်ဘာ ၂၇ ရက် ညနေပိုင်းကစတင်၍ စစ်ကော်မရှင်တပ်နှင့် တော်လှန်ရေးတပ်များအကြား အပြင်းအထန် တိုက်ပွဲဖြစ်ပွားခဲ့သည်။
နှစ်ဘက်တိုက်ပွဲ ပြင်းထန်ခဲ့ပြီး စစ်ကော်မရှင်သည် အဆိုပါ ဘုတလင်းရွာနှင့် အနီးဝန်းကျင် ကျေးရွာများအား ပြီးခဲ့သည့် နိုဝင်ဘာ ၂၈ ရက် ည ၈ နာရီ ဝန်းကျင်တွင် လေယာဉ်ဖြင့် ဗုံးကြဲချခဲ့ကြောင်း ဒေသခံများထံမှ သိရသည်။
” ည ၈ နာရီလောက်မှာ လေယာဥ် နဲ့ ဗုံးလာကြဲတယ်။ တချို့ကတော့ စစ်ဘေးရှောင်စခန်းရောက်နေပြီ။ ကိုယ်လွတ်ပြေးရတာဆိုတော့ အချို့လဲ တောထဲပုန်းနေသူတွေလဲ ကျန်သေးတယ် “ဟု ဒေသခံ ရွာသားတစ်ဦးက ဧရာ၀တီတိုင်းမ်ကို ပြောသည်။
တိုက်ပွဲများကြောင့် ဘုတလင်းကျေးရွာမှ ဒေသခံရွာသားများသည် ဘေးလွတ်ရာသို့ ထွက်ပြေး တိမ်းရှောင်နေကြပြီး အများစုမှာ အုတ်တွင်းမြို့ရှိ ပေါက်တောကျောင်းတွင် စစ်ဘေးရှောင်နေကြ ကြောင်း သိရသည်။
ပဲခူးရိုးမအစပ်ဖြစ်သော အဆိုပါ တောင်ငူမြို့နယ်နှင့် အုတ်တွင်းမြို့နယ်တို့တွင် ယခုကဲ့သို့ တိုက်ပွဲများ ကြောင့် ဒေသခံ ထောင်နှင့်ချီ ထွက်ပြေးတိမ်းရှောင်နေရပြီး ယခင်ကတည်းက တိမ်းရှောင်နေရမှုများ ရှိကြောင်း သိရသည်။
တောင်ငူမြို့နယ်ရှိ စပါးကြွယ်၊ ငုံးမင်း စသည့် ကျေးရွာများတွင် မေလ ၁၉ ရက်နေ့က တိုက်ပွဲများ ဖြစ်ပွားခဲ့ပြီ ပြီးခဲ့သည့် မေလ ၂၅ ရက်နေ့ကလည်း ကြက်တက်၊ ညောင် စသည့် ကျေးရွာများတွင် တော်လှန်ရေးတပ်များနှင့် စစ်ကော်မရှင်တပ်အကြား တိုက်ပွဲများ ပြင်းထန်ခဲ့သည်။
ပုံစာ-အုတ်တွင်းမြို့ရှိ ပေါက်တောကျောင်းတွင် စစ်ဘေးရှောင်နေကြသူများကို တွေ့ရစဉ်။
