ဧရာဝတီတိုင်းမ်
နိုဝင်ဘာ ၃၀ ရက်
တစ်နှစ်နီးပါးရှိလာသည့် ဗန်းမော်မြို့သိမ်းတိုက်ပွဲတွင် နယ်မြေဖြန့်နေရာယူလာသည့် စစ်ကော်မရှင် တပ်များ အထိနာနေပြီး နောက်ဆုတ်နေရကြောင်း သိရသည်။
တိုက်ပွဲပြင်းထန်နေသည့် ၄ မိုင်ဘက်မှနေ၍ မြို့အတွင်းပြန်လည်ဆုတ်ခွာလာသည့် စစ်ကော်မရှင်၏ ခမရ ၃၂၀ စစ်ကြောင်း တိုက်ခိုက်ခံရပြီး သေဆုံး ဒဏ်ရာရသူများရှိခဲ့ကြောင်း သိရသည်။
ပြီးခဲ့သည့် နိုဝင်ဘာ ၂၅ရက်နေ့က ဗိုလ်ကြီးအောင်ကိုကို ဦးဆောင်သည့် စစ်ကြောင်းကို ကချင် လွတ်လပ်ရေးတပ်မတော် (KIA) က ဒရော့ဗုံးချ၍ တိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၁၀ဦးကျော် သေဆုံးပြီး ထိခိုက်ဒဏ်ရာရသူများရှိခဲ့ကြောင်း သိရသည်။
”မြို့ပြင်ကနေ ပြန်ဆုတ်လာတဲ့စစ်တပ်စစ်ေကြာင်း တိုက်ခိုက်ခံရပြီး သေတာများတယ်ပြောပါတယ်။ ဒရော့ဗုံးချတိုက်တယ်လို့ သိရပါတယ်” ဟုကချင်စစ်ရေး သတင်းရင်းမြစ်က ဧရာဝတီတိုင်းမ်ကို ပြောသည်။
စစ်ကော်မရှင်က နန့်ဖားအင်းနှင့် ဝက်ကုန်းနယ်မြေများအထိ တပ်ဖြန့်လာသော်လည်း လေးမိုင်ဘက် အခြမ်းတိုက်ပွဲမှ စစ်ကြောင်းများ ၃မိုင်အထိပြန်လည် ဆုတ်ခွာနေရကြောင်း သတင်းရင်းမြစ်များထံမှ သိရသည်။
ဗန်းမော်မြို့ပြင်အထိ တိုက်ပွဲကျယ်ပြန့်လာပြီး စစ်ကော်မရှင်က KIA ထိန်းချုပ်နေရာအချို့ကို စစ်ကြောင်းထွက်လာသော်လည်း အထိနာပြီး တပ်ပြန်ဆုတ်နေရကြောင်း သိရသည်။
ပြီးခဲ့သည့်နှစ် ဒီဇင်ဘာ ၄ရက်နေ့မှ စတင်ခဲ့သည့် ဗန်းမော်မြို့သိမ်းတိုက်ပွဲသည် KIA ဘက်မှ အသာစီးယူ နယ်မြေစိုးမိုးမှု ရယူထားရာမှ စစ်ကူသင်္ဘောများ ရောက်လာချိန်တွင် စစ်ရေးအခြေအနေပြောင်းလဲ လာခဲ့ပြီး နှစ်ဖက်အပြန်အလှန် စစ်ကြောင်းထိုးတိုက်ခိုက်ရသည့် အခြေအနေကို ရောက်ရှိခဲ့သည်။
KIA ဘက်မှလည်း ဗန်းမော်တိုက်ပွဲမှာ နေ့စဉ် သုံးနေရာထက်မနည်းတွင်တိုက်ပွဲပြင်းထန်နေကြောင်း ပြောဆိုထားပြီး စစ်ကော်မရှင်က လေကြောင်း၊ ဒရုန်းနှင့် လက်နက်ကြီးပစ်ကူ၊ မြေပြင်စစ်ကြောင်းများ သုံး၍ တိုက်ခိုက်နေကြောင်း သိရသည်။
ပုံစာ-ကချင်လွတ်လပ်ရေးတပ်မတော် (ပုံဟောင်း)
