မွန်ပြည်နယ်မှ ထင်ရှားသည့်ဆရာတော်ကို နိုင်ငံတော်တည်ငြိမ်အေးချမ်းခြင်းကို ပျက်ပြားစေသည်ဟုဆိုတာဖမ်းဆီးခဲ့ကြောင်း စစ်ကော်မရှင်ထုတ်ပြန်

ဧရာဝတီတိုင်းမ်
နိုဝင်ဘာ ၂၉ ရက်

မွန်ပြည်နယ်၊ မော်လမြိုင်မြို့တွင် ထင်ရှားသည့် ဆရာတော်တစ်ပါးဖြစ်သည့် သာသနာနွယ်ဖောင်ဒေးရှင်းတည်ထောင်သူ အရှင်စန္ဒာဇောတိကို စစ်ကော်မရှင်က နိုင်ငံတော်တည်ငြိမ်အေးချမ်းခြင်းကို ပျက်ပြားစေရန်လှုံ့ဆော်သည်ဟုဆိုကာ ဖမ်းဆီးခဲ့ကြောင်း ယနေ့ နိုဝင်ဘာ ၂၉ ရက်နေ့တွင် ၎င်းတို့လက်ဝေခံမီဒီယာများတွင် ဖော်ပြခဲ့သည်။

ပရဟိတလုပ်ငန်းများဖြင့် ထင်ရှားသည့်ဆရာတော်အရှင်စန္ဒာဇောတိသည် မွန်ပြည်နယ်ဝန်ကြီးချုပ်မှဦးဆောင်သည့် တောင်ဝိုင်းတောင် ဖြိုချရောင်းစားမှုဖြစ်စဉ်နှင့်ပတ်သတ်ပြီး ထောက်ပြပြောဆိုခဲ့ရာ လူမှုကွန်ရက်စာမျက်နှာပေါ်မှ နိုင်ငံတော်

တည်ငြိမ်အေးချမ်းရေးပျက်ပြားစေရန် ရည်ရွယ်ကာ လှုံဆော်နေသည်ဟုဆိုကာ ပြီးခဲ့သည့် နိုဝင်ဘာ ၂၇ ရက်နေ့တွင် ဖမ်းဆီးခဲ့ခြင်းဖြစ်သည်။

“ဝန်ကြီးချုပ်အမည်ခံအောင်ကြည်သိန်းအဖွဲ့က တောင်ဖြိုပြီး မြေရောင်းစားတာကို ဆရာတော်ကပြောလို့ အဖမ်းခံရတာ။ တောင်ဝိုင်းတောင်ကို ဖြိုပြီးမြေကြီးတွေတူးလို့ ဘုန်းဘုန်းကလိုင်းပေါ်တင်ရမလာဆိုပြီး ဖမ်းသွားကျတယ်” ဟု မော်လမြိုင်မြို့ဒေသခံတစ်ဦးက ဧရာဝတီတိုင်းမ်ကို ပြောသည်။

လက်ရှိတွင် အရှင်စန္ဒာဇောတိကို ကျိုက်မရောအကျဉ်းထောင်သို့ ပို့ဆောင်ထားပြီဖြစ်ကြောင်း အကျဉ်းထောင်နှင့် နီးစပ်သူများထံကသိရသည်။

စစ်ကော်မရှင်လက်အောက်ခံ မွန်ပြည်နယ်ဝန်ကြီးချုပ်နှင့် စစ်တပ်လက်ဝေခံစီးပွားရေးလုပ်ငန်းရှင်များပူးပေါင်းကာ မော်လမြိုင်မြို့၏ သာသနာ့နယ်မြေအဖြစ် ထင်ရှားသည့် တောင်ဝိုင်းတောင်ရှိမြေများကို တူးထုတ်ရောင်းချကာ စီမံကိန်းများလုပ်ဆောင်နေခြင်းဖြစ်သည်။

သာသနာနွယ်ဆရာ‌တော် အရှင်စန္ဒာဇောတိသည် ကိုဗစ်ကာလတွင် တက်ကြွစွာဦးဆောင်ပါဝင်ကူညီခဲ့သည့်ဖြစ်စဉ်တွင် ထင်ရှားသော်လည်း စစ်အာဏာသိမ်းနောက်ပိုင်းတွင် ကြားနေအဖြစ်နေထိုင်သည့်အတွက် တော်လှန်ရေးဘက်တော်သားများ၏ ဝေဖန်မှုများကို ခံခဲ့ရသည့်ဆရာတော်တစ်ပါးလည်းဖြစ်သည်။

ဓာတ်ပုံ – Ashin Sanda Zawti