နိုင်မင်းလွင်/ဧရာဝတီတိုင်းမ်
နိုဝင်ဘာ ၂၉ ရက်
မြန်မာပြည်ကို ရောက်ရှိလာသည့် ဥရောပ၏ နောက်ဆုံး အာဏာရှင်နိုင်ငံဖြစ်သော ဘယ်လာရုစ်သမ္မတ ခရီးစဉ်ကာလအတွင်း အာဏာသိမ်း စစ်ကော်မရှင်သည် စစ်ရေးတိုးမြှင့်နိုင်ရန်အတွက် ၎င်းတို့ပိုင် လေယာဉ်များနှင့် စစ်လက်နက်ပစ္စည်းများကို ပြုပြင်မွမ်းမံခိုင်းရန်ရှိကြောင်း လေတပ် CDM အသိုင်းအဝိုင်းထံက သိရသည်။
စစ်ခေါင်းဆောင်၏ ဖိတ်ကြားချက်အရ ချစ်ကြည်ရေးခရီးအဖြစ် ဘယ်လာရုစ်သမ္မတ အလက်ဇန္ဒားလူကာရှန်ကိုသည် မြန်မာနိုင်ငံကို ရောက်ရှိလာခြင်းဖြစ်ပြီး စီးပွားရေး၊ ကျန်းမာရေးအပါအဝင် ကဏ္ဍစုံတွင် ပူးပေါင်းသွားရန်အတွက် တွေ့ဆုံဆွေးနွေး၍ လက်မှတ်ရေးထိုးကြကြောင်း စစ်ကော်မရှင်က ထုတ်ပြန်ထားသည်။
စစ်ကော်မရှင်သည် အာဏာသိမ်းပြီးနောက် ဘယ်လာရုစ်နိုင်ငံနှင့် ပိုမိုနီးကပ်လာသလို လေယာဉ်နှင့် စစ်လက်နက်ပစ္စည်းများ ဝယ်ယူလျက်ရှိပြီး ခုခံတော်လှန်မှု အားကောင်းနေသည့် ရခိုင်အပါအဝင် ဒေသများကို စစ်ရှိန်မြှင့်နိုင်ရေး ပြုပြင်မွမ်းမံခိုင်းရန်ရှိကြောင်း လုပ်သက်ရင့် လေတပ် CDM အရာရှိတစ်ဦးက ထောက်ပြဆိုသည်။
“နိုင်ငံရေးအရ သူ့ကို အသိအမှတ်ပြုတဲ့ နိုင်ငံကနည်းတော့ အခုဘယ်လာရုစ်သမ္မတ လာတဲ့အခါ ပြယုတ်တစ်ခုအနေနဲ့ ကြိုဆိုခဲ့တယ်။ နောက်ပြီး အချို့လေယာဉ်တွေက ရုရှားနည်းပညာတွေ၊ အဲဒါတွေကို update လုပ်တာတို့ဘာတို့ကျ ကုန်ကျစရိတ်ကြီးတယ်။ ဘယ်လာရုစ်ကျတော့ သူတို့လာလုပ်ပေးတယ်” ဟု ၎င်းက ဧရာဝတီတိုင်းမ်ကို ပြောသည်။
ဘယ်လာရုစ်သည် ရုရှားလက်အောက်ခံ နိုင်ငံတစ်ခုဖြစ်၍ နိုင်ငံတကာ၏ အရေးယူဒဏ်ခတ် ပိတ်ဆို့မှုများအား စစ်ကော်မရှင်နည်းတူ ကြုံတွေ့နေရပြီး ထိုအတွက် ဂရုမစိုက်ဘဲ ၎င်းတို့ပူးပေါင်းကျော်လွှားသွားမည်ဟု ယခုခရီးစဉ်မတိုင်မီ စစ်ခေါင်းဆောင် သွားရောက်စဉ်က ပြောဆိုထားသည်။
လက်ရှိစစ်ရေး၌ စစ်ကော်မရှင် အသုံးပြုနေသည့် လေယာဉ်များတွင် ဘယ်လာရုစ်နိုင်ငံမှ ဝယ်ယူထားမှုများရှိပြီး Mi 35၊ Mi 17 ကဲ့သို့ လေယာဉ်များကို ပြန်လည်ပြင်ဆင်ရန် ရုရှားနိုင်ငံသို့ မပို့ဆောင်နိုင်လျှင် ၎င်းထံ အပ်နှံရကာ ယခုခရီးစဉ်တွင်လည်း ထိုကိစ္စအပြင် လေယာဉ်များ ဝယ်ယူမှုရှိနိုင်ကြောင်း လေတပ် CDM တစ်ဦးထံက သိရသည်။
“ဘယ်လာရုစ်သမ္မတ လာတာကတော့ သူတို့ချင်း ပုလင်းတူ ဗူးဆို့ပေါ့။ ဒီနောက်ကွယ်မှာတော့ စီးပွားရေးအပါအဝင် အပေးအယူလုပ်မယ့် ကိစ္စတွေ၊ လိုအပ်တဲ့ စစ်လက်နက်ပစ္စည်း ခဲယမ်း ဒါမျိုးတွေနဲ့ ပတ်သက်ပြီး ရှိလာနိုင်တယ်” ဟု လေတပ် CDM တပ်ကြပ်ကြီး ဇေယျက ဧရာဝတီတိုင်းမ်ကို ပြောသည်။
စစ်ကော်မရှင် အာဏာသိမ်းပြီးနောက် ကမ္ဘောဒီးယား ဝန်ကြီးချုပ်အဖြစ် ဟွန်ဆန်လာရောက်အပြီး မြန်မာပြည်ကို ဒုတိယမြောက်လာလည်သော နိုင်ငံ့ခေါင်းဆောင်ဖြစ်သူ ဘယ်လာရုစ်သမ္မတ အလက်ဇန္ဒားလူကာရှန်ကိုအား စတုတ္ထမျိုးဆက်လွန်ဟု တင်စားခေါ်သည့် SU-30 တိုက်လေယာဉ်များဖြင့် စစ်ခေါင်းဆောင်က ကြိုဆိုခဲ့သည်။
အဆိုပါ ဘယ်လာရုစ်သမ္မတနှင့်အတူ ရုရှားနိုင်ငံနှင့် ပူးပေါင်းလုပ်ဆောင်သွားမည့် နျုကလီးယား ဓာတ်အားပေးစက်ရုံအတွက် မြေနေရာ ရွေးချယ်ကူညီပေးရေး ကျွမ်းကျင်ပညာရှင်အဖွဲ့လည်း လိုက်ပါလာဟု ကြားသိရပြီး နေပြည်တော်၌သာ တည်ဆောက်ရန် စီမံနေကြောင်း CDM ဗိုလ်ကြီး ဇင်ယော်က ဧရာဝတီတိုင်းမ်ကို ပြောသည်။
ယင်းခရီးစဉ်သည် စစ်ကော်မရှင် ပြုလုပ်မည့် ရွေးကောက်ပွဲ နီးကပ်လာချိန် ရောက်ရှိလာခြင်းလည်းဖြစ်ပြီး အတုအယာင် ရွေးကောက်ပွဲအတွက် စောင့်ကြည့်လေ့လာသူများ စေလွှတ်ပေးမည်ဖြစ်ကြောင်း ပြီးခဲ့သည့် မတ်နှင့် ဇွန်တွင် ဘယ်လာရုစ်နိုင်ငံသို့ စစ်ခေါင်းဆောင် သွားရောက်တောင်းဆိုမှုအား လက်ခံခဲ့ကြောင်း သိရသည်။
ထို့အတူ ဘယ်လာရုစ်သည် လေကြောင်းကာကွယ်ရေး အမိန့်ပေးစနစ်ကို စစ်ကော်မရှင်အတွက် သီးသန့်ဒီဇိုင်းရေးဆွဲတည်ဆောက်ပေး၍ စစ်ရေးဆိုင်ရာ လေ့ကျင့်သင်ကြားပေးနေသလို ရေဒါနည်းပညာများနှင့် မြေပြင်အခြေစိုက် ဒုံးကျည်စနစ်များအပါအဝင် အဆင့်မြင့် စစ်ဘက်နည်းပညာများ လွှဲပြောင်းပေးထားကြောင်း သိရသည်။
ဓာတ်ပုံ-စစ်ကော်မရှင် လက်အောက်ခံPOPULAR
