ဧရာဝတီတိုင်းမ်
နိုဝင်ဘာ ၂၉ ရက်
စစ်ကော်မရှင်ကျင်းပမည့် ရွေးကောက်ပွဲအတွက် ဒုတိယအကြိမ်းမဲစာရင်းထုတ်ပြန်ထားသော်လည်း မဲစာရင်းကြည့်ရှု့စစ်ဆေးသူမရှိ၍ ရန်ကုန်မြို့တွင် ရပ်ကွက်အုပ်ချုပ်ရေးမှူးများက မဲစာရင်းစာရွက်ကိုင်ကာ တစ်အိမ်တစ်အိမ်ဆင်း မဲစာရင်းစစ်ဆေးနေကြောင်း ရန်ကုန်မြို့ခံ များထံက သိရသည်။
အတုအယောင်ရွေးကောက်ပွဲအတွက် ဒုတိယအကြိမ်မဲစာရင်းကို နိုဝင်ဘာ ၂၇ ရက်မှ ဒီဇင်ဘာ ၄ ရက်နေ့အထိ ရပ်ကွက်အုပ်ချုပ်ရေးမှူးရုံးများတွင် ကပ်ထားမည်ဟုကြေညာထားသည်။
“ မဲစာရင်းတွေကြည့်ဖို့ခေါ်တာ လာမကြည့်ကြလို့။ ဆယ်အိမ်မှူးတွေ ရာအိမ်မှူးတွေက တစ်အိမ်တက်တစ်အိမ်ဆင်းပြီးသန်းခေါင်စာရင်းတောင်းတယ်။ မဲစာရင်းနဲ့တိုက်စစ်တယ်။ သူတို့ဘာသာစစ်ဆေးပြီးမပါတဲ့သူတွေပြန်ထည့်နေတယ်” ဟု ရန်ကုန်မြို့၊ သာကေတမြို့နယ်နေထိုင်သူတစ်ဦးက ဧရာဝတီတိုင်းမ်ကို ပြောကြားသည်။
ယင်းအပြင်မဲစာရင်းတွင် အမည်ထည့်သွင်းပေးရန်တောင်းဆိုခြင်း ပုံစံ ၃ ၊ မပါဝင်သင့်သူများပါဝင်လျှင် ကန့်ကွက်ခြင်း ပုံစံ ၄ ၊ မဲစာရင်းပါအချက်အလက်များမှားယွင်းခြင်း ပုံစံ၄-ဂ ဖြင့် ပြင်ဆင်လွှာတင်သွင်းခြင်းတို့ကို ရွေးကောက်ပွဲကော်မရှင်နှင့် ရပ်ကွက်အုပ်ချုပ်ရေးမှူးက ကိုယ်တိုင်ထည့်သွင်းသွားကြောင်း ရန်ကုန်မြို့ခံတစ်ဦးက ဆိုသည်။
ထို့ပြင်မန္တလေးတိုင်းရှိ ပြည်ကြီးတံခွန်မြို့နယ်တွင်လည်း မြေပြင်ကွင်းဆင်းတိုက်ဆိုင်စစ်ဆေးခြင်းဟုဆိုကာ တစ်အိမ်တက်တစ်အိမ်ဆင်းဖြင့် မဲစာရင်းစစ်ဆေးနေကြောင်း စစ်ကော်မရှင်ထံမှ သိရသည်။
အဆိုပါမဲစာရင်းစစ်ဆေးရာတွင် အထွေထွေအုပ်ချုပ်ရေးဦးစီးဌာန၊ လူဝန်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ရဲတပ်ဖွဲ့၊ မီးသတ်တပ်ဖွဲ့၊ ကော်မရှင်ခွဲနှင့် ရပ်ကွက်အုပ်ချုပ်ရေးမှူးများ ပါဝင်ကြောင်းသိရသည်။
ရန်ကုန်မြို့အတွင်းရှိ ဆိုင်ကယ်ကယ်ရီယာဉ်မောင်းများကို မဲရုံစောင့်ကြည်ရေး၊ မဲစာရင်းကြည့်ရှုရန် ပြည်သူများကိုစည်းရုံးခိုင်းခြင်းနှင့် ပါတီဆိုင်းပုဒ်များကိုစောင့်ကြည့်ခိုင်းမှုများရှိကြောင်း ဆိုင်ကယ်ကယ်ရီမောင်းသူများထံမှ သိရသည်။
“ ရွေးကောက်ပွဲအတွက်မခိုင်းခင် ဆိုင်ကယ်ကယ်ရီတွေကိုအရင်ဖမ်းလိုက်တယ်။ ဖမ်းပြီးတော့ ဒဏ်ကြေး ငါးသောင်းနဲ့ အာမခံနဲ့ပြန်ရွေးရတယ်။ အာမခံကိုတစ်သောင်းပေးရတယ်။ အဲဒီလို ခြောက်သောင်းကုန်ပြီး ပြန်ရွေးရတယ်။ ပြီးတော့ smart card လုပ်မယ်။ ရွေးကောက်ပွဲနဲ့ ပတ်သက်တာတွေလုပ်ပေးရမယ်ဆိုပြီး အကြပ်ကိုင်တယ်” ဆိုင်ကယ်ကယ်ရီမောင်းသူတစ်ဦးက ပြောသည်။
အာဏာသိမ်းစစ်တပ်အနေဖြင့် ရွေးကောက်ပွဲကို အပိုင်းသုံးပိုင်းခွဲကာ ကျင်းပမည်ဟု ကြောညာထားပြီး လာမည့် ဒီဇင်ဘာ ၂၈ တွင် အပိုင်းတစ်ကို ပြုလုပ်မည်ဖြစ်သည်။
ဓာတ်ပုံ – စစ်ကော်မရှင်
