ဧရာဝတီတိုင်းမ်
နိုဝင်ဘာ ၂၇ ရက်
စစ်ကော်မရှင်နှင့် အာရက္ခတပ်တော် (AA) တို့ တိုက်ပွဲများရှိနေသည့် ပဲခူးတိုင်း၊ ပန်းတောင်းတပ်နယ် အတွင်းသို့ စစ်ကြောင်းထိုးဝင်ရောက်သွားသည့် အင်အား ၃၀ ပါ စစ်ကော်မရှင်စစ်ကြောင်းမှာ ပင်မတပ်နှင့် အဆက်အသွယ်ပြတ်တောက်သွားကြောင်း သိရသည်။
စစ်ကော်မရှင်တပ်မှ တပ်ခွဲမှူးအဆင့်ဦးစီးသည့် အင်အား ၃၀ ပါ စစ်ကော်မရှင်စစ်ကြောင်းသည် ပြီးခဲ့သည့် နိုဝင်ဘာ တတိယပတ်က ညောင်ကျိုး၊ လေသာတောင်ဝန်းကျင်သို့ စစ်ကြောင်းထိုး ထွက်လာ ပြီးနောက် ဒကစ(ပြည်)နှင့် အဆက် အသွယ်ပြတ်တောက်သွားကြောင်း သိရသည်။
“ဒကစ(ပြည်)နဲ့ တက်သွားတဲ့စစ်ကြောင်း အဆက် အသွယ်ပြတ်တောက်နေပါတယ်။ နှစ်ဖက်လုံးက မထုတ်ပြန်သေးတော့ သေတာလား၊ ထွက်ပြေးလား၊ မသိရသေးဘူး။ အဆက်အသွယ်ပြတ်တာ တစ်ပတ် ကျော်ပြီ”ဟု တပ်သတင်းရင်းမြစ်က ဧရာဝတီတိုင်းမ်ကို ပြောသည်။
စစ်ကော်မရှင်နှင့် AA တပ်ဖွဲ့များမှာ ၆၆၆ ပွိုင့်စခန်းကုန်းအနီးနှင့် လေသာတောင်ကြောတစ်ဝိုက်တွင် တိုက်ပွဲပြင်းထန်နေပြီး စစ်ကော်မရှင်က စစ်ကူများ ဆက်တိုက်ပို့လျက်ရှိသည်။ ထို့ပြင် AA ဆုတ်ခွာထားသည့် ပွိုင့် ၆၆၆ စခန်းကုန်းကို မွမ်းမံပြင်ဆင်ပြီး လက်နက်ကြီးများအထိုင်ချကာ ခံစစ်ပြင် ဆင်နေကြောင်း စစ်ရေးသတင်းရင်းမြစ်ထံမှ သိရသည်။
တောင်ကုတ်-ညောင်ကျိုး ရိုးလမ်းတစ်လျှောက် နယ် မြေစိုးမိုးမှုရယူနိုင်ရန် စစ်ကော်မရှင်က ဆုံးရှုံးထားသည့် လေသာ တောင်ကြောတစ်ဝိုက်ကိုပါ စစ်ကူပို့လျက်ရှိသည်။
ပြီးခဲ့သည့် နိုဝင်ဘာ ၂၄ ရက်နေ့က လေသာတောင်ကြောအနီးတွင် AA နှင့် စစ်ကော်မရှင်တို့ တိုက်ပွဲပြင်း ထန်ခဲ့ပြီး စစ်ကော်မရှင်ဒရုန်းဗုံးကြောင့် AA တပ်ဖွဲ့ဝင်အများအပြား သေဆုံးမှုရှိသည်ဟု စစ်တပ် ထောက်ခံချန်နယ်များက ဝါဒဖြန့်ရေးသားဖော်ပြထားသည်။
ယခုတိုက်ပွဲအတွင်း ပျောက်ဆုံးသွားသည့် စစ်ကြောင်းမှာ သေဆုံးနှင့် လက်နက်ချအညံ့ခံမှု တစ်ခုခုဖြစ်နိုင်ကြောင်းကိုမူ နှစ်ဖက်တပ်ဖွဲ့များက ထုတ်ပြန်မှုမရှိသေးပေ။
ကာကွယ်ရေးပစ္စည်းစက်ရုံ ကပစ-၁၆ ၏ ကာကင်းနေရာများနှင့် ညောင်ကျိုးနှင့် ဆငလန်ကြား လေသာ တောင်တစ်တိုက်တွင် တိုက်ပွဲများဆက်လက်ရှိနေရာ တိုက်ပွဲအတွင်း ထွက်ပြေးသည့် စစ်ကော်မရှင် တပ်ဖွဲ့ဝင်များကို လက်ရဖမ်းဆီးနိုင်မှုများရှိကြောင်း AA က နိုဝင်ဘာ ၁၀ ရက်က ထုတ်ပြန်ခဲ့သည်။
စစ်ကော်မရှင်သည် ကလေးနှင့် ဖောင်းပြင်မှခြေမြန်တပ်ရင်းများကို ပန်းတောင်းတပ်နယ်အတွင်းရှိ တိုက်ပွဲများသို့ ပို့ဆောင်ထားကြောင်း သိရသည်။
ပုံစာ-စစ်ကော်မရှင် တပ်ဖွဲ့ဝင်များ(ပုံဟောင်း)
