ဧရာဝတီတိုင်းမ်
နိုဝင်ဘာ ၂၄ ရက်
ဧရာဝတီတိုင်းအတွင်းရှိ ရွှေသောင်ယံနှင့် သာပေါင်းမြို့နယ်တို့တွင် AAပူးပေါင်းတပ်နှင့် စစ်ကော်မရှင်တို့ တိုက်ပွဲများ အပြင်းအထန်ပြန်လည်ဖြစ်ပွားနေကြောင်း သိရသည်။
သာပေါင်းရှိ သဲဖြူရွာနှင့် ရွှေသောင်ယံမြို့အစပ်တို့တွင် တိုက်ပွဲပြင်းထန်နေပြီး စစ်ကော်မရှင်ဘက်မှ လက်နက်ကြီးများဖြင့် ပစ်ခတ်တိုက်ခိုက်နေကြောင်း သတင်းရင်းမြစ်များထံမှ သိရသည်။
သာပေါင်းမြို့နယ်ရှိ သာပေါင်းလေးကျေးရွာတွင် တိုက်ပွဲများဖြစ်ပွားနေကြောင်းကို AAကထုတ်ပြန်ပြောဆိုထားပြီး ယခု သဲဖြူကျေးရွာအထိ တိုက်ပွဲကျယ်ပြန့်လာခြင်း ဖြစ်သည်။
“သဲဖြူဘက်မှာတိုက်ပွဲဖြစ်နေတယ်ကြားပါတယ်။ငွေဆောင်၊ ဂွနဲ့ ရွှေသောင်ယံကမ်းခြေတွေမှာ စစ်နေဗီတွေမပြတ်လှည့်နေကြတယ်” ဟု သတင်းရင်းမြစ်က ဧရာဝတီတိုင်းမ်ကိုပြောသည်။
ပြီးခဲ့သည့် နိုဝင်ဘာ ၂၂ရက်နေ့က ဂွပင်လယ် ပြင်တွင် လှည့်လည်နေသော စစ်နေဗီ သုံးစီးမှကျေးရွာများအတွင်းကို လက်နက်ကြီးများဖြင့် ၁၅ကြိမ်ခန့် ပစ်ခတ်တိုက်ခိုက်ခဲ့သည်။
ဧရာဝတီတိုင်းအတွင်း လေးမျက်နှာ၊ ရေကြည်၊ သာပေါင်း၊ အင်္ဂပူ၊ ရွှေသောင်ယံတို့တွင် တိုက်ပွဲများဆက်တိုက်ဖြစ်ပွားနေပြီး စစ်ကော်မရှင်က ဟင်္သာတဘက်မှနေ၍ အင်အားစုဆောင်းကာ စစ်ကူများပို့လျက်ရှိသည်။
သာပေါင်းတိုက်ပွဲမှနေ၍ ရေနံ့သာစစ်ဆေးရေးဂိတ်ဝင်ရောက်တိုက်ခိုက်ခံရမည်ကို စိုးရိမ်ပြီး ရေနံ့သာဂိတ်တွင် ဘန်ကာများဆောက်လုပ်ကာ လုံခြုံရေးကင်းများ အပြည့်ချထားကြောင်း သိရသည်။
စစ်ကူများကိုလည်း ဧရာဝတီတိုက်ပွဲအနှံ့ဖြန့်ပို့ထားသော်လည်း ထိခိုက်သေဆုံးမှုများ၍ ပုသိမ် မဆရ ၄နှင့် ရွှေမြင်တင် သဂြိုဟ်စက်တွင် လူမပြတ်ကြောင်း ဒေသခံများထံမှ သိရသည်။
