‎ပဒါန်း၊ ဂုတ်ကြီးကျေးရွာအနီး တိုက်ပွဲပြင်းထန်နေပြီး လေကြောင်းမှ အပြင်းအထန်ပစ်ကူပေးပြီး နတ်ရေကန်ကို ခဲယမ်းထောက်ပို့နိုင်ရန်ကြိုးစား

‎‎ဧရာဝတီတိုင်းမ်
‎နိုဝင်ဘာ ၂၁ ရက်

‎ပိတ်ဆို့တိုက်ခိုက်ခံနေရသည့် နတ်ရေကန်ကို စစ်ကူပို့နိုင်ရန်စစ်ကော်မရှင် ကြိုးစားနေပြီး ပို့လိုက်သည့်စစ်ကြောင်းများ လမ်းတွင်တိုက်ခိုက်ခံရ၍ တိုက်ပွဲပြင်းထန်နေကြောင်း သိရသည်။

‎ပြီးခဲ့သည့် နိုဝင်ဘာ ၁၈ရက်နေ့က ဂုတ်ကြီးရွာအနီး လမ်းသစ်ဘက်တွင် စစ်ကော်မရှင်နှင့် AAပူးပေါင်းတပ်တို့ တိုက်ပွဲပြင်းထန်နေပြီး စစ်ကော်မရှင်က လေကြောင်းပစ်ကူများ ဆက်တိုက်ပြုလုပ်ခဲ့ကြောင်းသိရသည်။

‎”မစခ ၉၀၅ထဲမှာ အင်အားစုထားပြီး စစ်ကူပို့နေတာ။ လမ်းဟောင်းဘက်မှာ စစ်ကြောင်းပြုတ်ထားတော့ အခုလမ်းသစ်ဘက်ကနေ ပို့တယ်။ အဲဒီ့ဘက် တိုက်ပွဲဖြစ်နေတယ်” ဟု စစ်ရေးသတင်းရင်းမြစ်က ဧရာဝတီတိုင်းမ်ကိုပြောသည်။

‎အမြောက်စစ်ဆင်ရေးကွပ်ကဲမှုဌာနချုပ် မစခ ၉၀၅ အတွင်းမှ ရိက္ခာနှင့်ခဲယမ်းအပြည့်တင်ထားသည့် စစ်သုံးကားကြီးနှစ်စီး ယဉ်ပေါ်ပါ အစောင့်အရှောက် ၁၀ယောက်စီနှင့်အတူ ဇင်ပြွန်းရွာဘက် ထွက်ခွါသွားကြောင်း သတင်းရင်းမြစ်ထံမှ သိရသည်။

‎စစ်ကော်မရှင်က နတ်ရေကန်ဗျူဟာစခန်းတွင် ပိတ်မိနေသူများကို စစ်ကူပို့ရန် လမ်းသစ်နှင့် လမ်းဟောင်းမှနေ၍ စစ်ကြောင်းနှစ်ခုခွဲကာ ချီတက်စစ်ကြောင်းထိုးလျက်ရှိသည်။

‎သို့ရာတွင် စစ်ကြောင်းများမှာ ဂုတ်ကြီးစခန်းကို မကျော်နိုင်ဘဲ ကြားဖြတ်တိုက်ခိုက်ခံနေရပြီး စစ်ကြောင်းလိုက်ပြုတ်သည့်အခြေအနေကို ရောက်ရှိနေခြင်းဖြစ်သည်။

‎မြေပြင်ထောက်ပို့လမ်းကြောင်း ပိတ်ဆို့ခံထားရချိန်တွင် စစ်ကော်မရှင်က နတ်ရေကန်ဗျူဟာအတွင်းပိတ်မိနေသူများထံလိုအပ်သည့် ခဲယမ်းနှင့် ရိက္ခာကို လေကြောင်းမှ ချပေးခြင်းများပြုလုပ်လာသည်။

‎‎လေကြောင်းအကူအညီနှင့်ချပေးသည့် ခဲယမ်းနှင့် ရိက္ခာထုတ်မျမှာ AAတပ်ဖွဲ့များထံရောက်ရှိသွားသည်များရှိသလို ကျန်သည့်အထုတ်များကို ထွက်ကောက်သည့် စစ်ကော်မရှင်တပ်များ AA၏ ပစ်ခတ်တိုက်ခိုက်မှုကို ခံရသည့်အတွက် ၁၀ဦးထက်မနည်း သေဆုံးခဲ့သည်။

‎နိုဝင်ဘာ ၁၉ရက်နေ့တွင် ပဒါန်းရွာထဲမှ အင်အားအပြည့်ပါ စစ်ယာဉ်တန်း နှစ်စီး ပုသိမ်-မုံရွာလမ်းအတိုင်း ဆူးပတောင်း ဝါးလေးတောင်မှတဆင့် ကန်တုတ်စက်ရုံချင်းဆက်လမ်းအတိုင်းမောင်းနှင်သွားကြောင်း သတင်းရင်းမြစ်ထံမှ သိရသည်။