စစ်ခေါင်းဆောင်က ၎င်းတည်သည့် မာရဝိဇယဘုရား လူစည်ကားစေရန် အမိန့်ပေး စည်းရုံးနေပြီး ရွေးကောက်ပွဲ မတိမ်းစောင်းရန် “ဘုရားကု” ကုနေ

နိုင်မင်းလွင်/ဧရာဝတီတိုင်းမ်
နိုဝင်ဘာ ၄ ရက်

စစ်ခေါင်းဆောင်က မြန်မာနိုင်ငံတွင် ခိုင်ခံ့မှုအရှိဆုံးဟု ကြွားလုံးထုတ်နေသည့် ၎င်းတည်ထားသော မာရဝိဇယ ကျောက်ဆင်းတုဘုရား၌ လူစည်ကားစေရန်နှင့် လာမည့်ရွေးကောက်ပွဲ အောင်မြင်ရေး အတွက် ရည်ရွယ်၍ “ဘုရားကု” လုပ်နေကြောင်း သတင်းအရင်းမြစ်များအရ သိရသည်။

အဆိုပါဘုရားတွင် လူစည်ကားစေရန် ပွဲလမ်းသဘင်များဖြင့် စည်းရုံးသိမ်းသွင်း လုပ်ဆောင်လျက် ရှိသည်ကိုလည်း တွေ့ရသည်။

ကမ္ဘာပေါ်ရှိ စကျင်ကျောက်သား ထိုင်တော်မူ ဘုရားများအနက် ဉာဏ်တော်အမြင့်ဆုံးဟု စစ်ကော်မရှင်က ထုတ်ပြန်ဆိုထားသော မာရဝိဇယဘုရားကို စတင်တည်ချိန်မှစ၍ စစ်ကော်မရှင် လက်အောက်ခံ Non-CDM ဝန်ထမ်းများမှာ မကြာခဏဆိုသလို မဖြစ်မနေ လာရောက်ဖူးမျှော် နေရကြောင်း ဧရာ၀တီတိုင်းမ်ကစုံစမ်း သိရသည်။

ထို့အပြင် မြန်မာနိုင်ငံသို့ လာရောက်သည့် နိုင်ငံတကာမှ အဖွဲ့အစည်းများ၊ ၎င်းတို့နှင့် နီးစပ်သူများအပြင် ကျောင်းသားကျောင်းသူများကိုပါ ခရီးစဉ်စရိတ်ငြိမ်းဖြင့် ပို့ပေးနေပြီး မြန်မာ့ရိုးရာ ပွဲလမ်းဘသင် များကိုလည်း အဆိုပါဘုရားတွင်ပင် အဓိကထား ပြုလုပ်လျက်ရှိသည်။

အဆိုပါဘုရားကို စည်ကားစေရန် လုပ်ဆောင်နေမှုအပြင် မကြာမီ ၎င်းတို့ပြုလုပ်သွားရန် စီစ‌ဉ်နေသော ရွေးကောက်ပွဲအတွက်ပါ ရည်ရွယ်၍ စိုးရိမ်စိတ်များဖြင့် ဘုရားကု ကုနေသည် ကို တပ်တွင်းသတင်းအရ ကြားသိရကြောင်း CDM ဗိုလ်ကြီး ဇင်ယော်က ဆိုသည်။

“သူ့အနေနဲ့ ရွေးကောက်ပွဲတွေ အတိမ်းအစောင်း ဖြစ်လာမလား။ လုပ်နေရင်းနဲ့ ဘယ်နေရာတွေက ဘာဖြစ်ဦးမလဲ စတာတွေ စိုးရိမ်နေတယ်။ အဲဒါမို့ ဘုရားကု ကုနေတာလို့ တပ်ဘက်က လူတွေဆီက ကြားသိရတယ်” ဟု ၎င်းက ဧရာဝတီတိုင်းမ်ကို ပြောသည်။

အာဏာသိမ်းပြီးနောက် ယာယီသမ္မတဟု မိမိကိုယ်ကို သုံးနှုန်းနေသော စစ်ခေါင်းဆောင်သည် ငွေကြေး သန်းပေါင်းများစွာ ကုန်ကျခံသုံးစွဲ၍ ၎င်းတို့ရုံးစိုက်ရာ နေပြည်တော်၊ ဒက္ခိဏသီရိမြို့၌ ယင်းဘုရားကို တည်ထားပြီး အမြဲဆိုသလို ဂုဏ်ယူပြောလေ့ရှိသည်။

ယင်းအပြင် စစ်ခေါင်းဆောင်သည် အင်အားပြင်း စစ်ကိုင်းငလျင် လှုပ်ခတ်ချိန်ကလည်း မာရဝိဇယ ဘုရားကို သွားရောက်ပြီး လေပြင်းဒဏ်၊ မြေငလျင်ဒဏ်နှင့် သဘာဝဘေးဒဏ်တို့ ခံနိုင်မှုရှိစေရန် တည်ဆောက်ထား၍ ထိခိုက်မှု နည်းပါးခြင်းဖြစ် ကြောင်း ကြွားဝါပြောဆိုခဲ့သည်။

ဓာတ်ပုံ-MOI