ဧရာဝတီတိုင်းမ်
အောက်တိုဘာ ၂၉ ရက်
စစ်အုပ်စုကျင်းပမည့် ရွေးကောက်ပွဲကို ဝင်ရောက်ယှဉ်ပြိုင်မည့် ကြံ့ခိုင်ရေးပါတီ (USDP) သည် ၎င်းတို့၏ စစ်ဝတ်စုံချွတ် အရာရှိကြီးများ၏ စွမ်းဆောင်ရည်အပေါ် ယုံကြည်ချက်အပြည့်ဖြင့် “အစိုးရ သက်တမ်းတစ်ခု အတွင်းမှာ ပြည်တွင်းလိုအပ်ချက် အားလုံးကို ပြည့်မီအောင် ဆောင်ရွက်ပေးမည်” ဟု မဲဆွယ်စည်းရုံးရေး ဟောပြောချက်တွင် ထည့်သွင်း ပြောကြားခဲ့သည်။
အစိုးရသက်တမ်းတစ်ခု အတွင်းတွင် ပြည်တွင်းလိုအပ်ချက်ကို ပြည့်မီအောင်ဆောင်ရွက်ကာ ပို့ကုန်/သွင်းကုန် မူဝါဒများကိုပြန်လည်ဆန်းစစ်ခြင်း၊ စိုက်ပျိုးရေးနှင့် မွေးမြူရေးဇုန်ထွက်ရှိသော ထွက်ကုန်များကို ပြည်ပပို့ကုန်ခြင်း၊ ကုန်စည်ဈေးနှုန်းကျဆင်းစေခြင်းနှင့် အလုပ်အကိုင် အခွင့် အလမ်းများ ပေါ်ပေါက်လာရန် လုပ်ဆောင်မည်ဟု ဆိုကာ မဲဆွယ်စည်းရုံးနေခြင်းဖြစ်သည်။
ထို့ပြင် အလုပ်သမားကဏ္ဍ၊ ခရီးသွားလုပ်ငန်း၊ ကျန်းမာရေးကဏ္ဍာ၊ ပညာရေးကဏ္ဍအပါအဝင် လူငယ်နှင့် အမျိုးသမီးအရေးများကိုလုပ်ဆောင်ပေးမည်ဖြစ်ကြောင်း၊ ပြည်တွင်းငြိမ်းချမ်းရေး ဖော်ဆောင်မှုကဏ္ဍကို အချိန်ယူပြီးတစ်ဆင့်ချင်းတည်ဆောက်သွားမည်ဖြစ်ကြောင်း USDP ဥက္ကဋ္ဌ ဦးခင်ရီက ဆိုထားသည်။
လက်ရှိ စစ်အုပ်စု အဖွဲ့ဝင် ဗိုလ်ချုပ်ကြီးများသည် အရပ်ဝတ်ပြောင်း၍ USDP ပါတီမှ ရွေးကောက်ပွဲ ဝင်ပြိုင်မည့်သူများတွင် လက်ရှိ ပို့ဆောင်ရေးနှင့် ဆက်သွယ်ရေးဝန်ကြီးဌာန ပြည်ထောင်စုဝန်ကြီး မြထွန်းဦး အပါအဝင် စစ်ကော်မရှင်တပ် အရာရှိကြီးများ ရာဂဏန်း အထိချီကာ ဝင်ရောက် ယှဉ်ပြိုင်မည်ဖြစ်ကြောင်း သိရသည်။
စစ်အုပ်စု အာဏာသိမ်းထားသည့် လေးနှစ်ကျော် ကာလအတွင်း တိုင်းပြည်သည် စီးပွားရေး၊ လူမှုရေးနှင့် လုံခြုံရေးအရ ဆိုးရွားစွာ ယိုယွင်းပျက်စီးနေချိန်တွင် စစ်ဗိုလ်ချုပ်ကြီးများ၏ USDP က အဆိုပါ ကတိကဝတ်ဖြင့် မဲဆွယ်လာခြင်း ဖြစ်သည်
လာမည့် ဒီဇင်ဘာ ၂၈ ရက်နေ့တွင် အပိုင်း တစ်အနေဖြင့် မြိုု့ပေါင်း ၁၀၂ ၌ ပထမအကြိမ်ရွေးကောက်ပွဲ ကျင်းပမည်ဖြစ်ပြီး ၂၀၂၆ ခုနှစ် ဇန်နဝါရီ ၁၁ ရက်နေ့တွင် မြို့ပေါင်း ၁၀၀ တွင်ရွေးကောက်ပွဲ ကျင်းပမည်ဖြစ်သည်။
အဆိုပါ စစ်အုပ်စု၏ ရွေးကောက်ပွဲအတွက် ပြည်တွင်း/ပြည်ပ မီဒီယာများ သတင်းရယူနိုင်ရန် သက်ဆိုင်ရာ ခရိုင်ရွေးကောက်ပွဲကော်မရှင်အဖွဲ့ခွဲများတွင် လျှောက်ထားနိုင်ကြောင်း UEC က ထုတ်ပြန် ထားသည်။
ဓာတ်ပုံ – ဧရာဝတီတိုင်းမ်
