ဧရာဝတီတိုင်းမ်
အောက်တိုဘာ ၁၄
မကွေး၊ ငဖဲမြို့နယ်၊ ပဒါန်းရှိစစ်ကကော်မရှင်၏ နတ်ရေကန်လေကြောင်းရန် ကာကွယ်ရေးတပ်စခန်းကုန်းကို AA နှင့်မဟာမိတ်တပ်များက သိမ်းပိုက်ရရှိပြီဖြစ်ကြောင်း သိရသည်။
စစ်ကော်မရှင်တပ်၏ နတ်ရေကန်ဗျူဟာကုန်းကို ကိုးလနီးပါးအကြာ တိုက်ခိုက်ပြီးနောက် ယနေ့ အောက် တိုဘာ ၁၄ ရက်နေ့တွင် အလုံးစုံသိမ်းပိုက်နိုင်ခဲ့ခြင်းဖြစ်ကြောင်း သတင်းရင်းမြစ်ထံမှ သိရသည်။
“စခန်းကထွက်ပြေးတဲ့တပ်သားတွေကို ဖမ်းမိထားတာရှိတယ်။ အချို့ကျတော့ လက်နက်ချတာပေါ့။ အသေးစိတ်ကို ထုတ်ပြန်ပါလိမ့်မယ်။ ဒီညနေမှာ အလုံးစုံသိမ်းလို့ရတာပါ”ဟု သတင်းရင်းမြစ်က ဧရာဝတီတိုင်းမ်ကို ပြောသည်။
နတ်ရေကန်စခန်းမှ စစ်ကောင်စီတပ်ဖွဲ့ဝင်အချို့ သည် ဟောင်ဝစ်ဇာအမြောက်များနှင့် စစ်ဖက်သုံးစက်များကိုပါ သယ်ယူထွက်ပြေး ကြပြီးနောက် စခန်းအနီးထိ AA တပ်များ ချဉ်းကပ်သိမ်းပိုက်မှုများ ပြုလုပ်ခဲ့ကြောင်း သိရသည်။
“စစ်ယာဉ်တန်းတွေက နတ်ရေကန်ကိုမတက်နိုင်ရင် ကပစ ၁၄ ကာကွယ်ရေးပစ္စည်းစက်ရုံကို အဓိကကာကွယ်ဖို့ဖြစ်နိုင်တယ်။ နတ်ရေကန်ကတော့ ဘယ် လိုမှလှုပ်မရတဲ့အနေအထားနဲ့ ပိတ်ဆို့ထားပြီးသွားပါပြီ။ ဗျူဟာကုန်းထဲခံပစ်နေတဲ့အဖွဲ့တွေ ကျန်နေသေးတယ်လို့လည်း သိရပါတယ် “ဟု ယမန်နေ့ အောက်တို ဘာ ၁၃ ရက်နေ့ကစစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
နတ်ရေကန်ဗျူဟာမှ စစ်ကောင်စီတပ်ဖွဲ့ဝင်အချို့ ထွက်ပြေးသွားပြီး လေကြောင်းမှလည်း နတ်ရေကန်ဗျူဟာကုန်းနှင့် အနီးတဝိုက်ကို ပြန်လည်ကြဲချတိုက် ခိုက်မှုများ ပြုလုပ်ခဲ့ကြောင်း သိရသည်။
ပြီးခဲ့သည့် အောက်တိုဘာ ၁၀ ရက်နေ့က စခန်းသိမ်း ဆည်းခံရသည့်ဟု သတင်းထွက်ပေါ်ပြီးနောက် စစ်ကော်မရှင်က မကွေးဘက်မှနေ၍ အရပ်သုံးယာဉ်အချို့ပါ အင်အားအပြည့် စစ်ယာဥ်တန်းများကို မစခ ၉၀၅ အတွင်းသို့ ပို့ဆောင်ခဲ့သည်။
စစ်ယာဉ်တန်းများအနက် အင်အားအပြည့်ပါ စစ်သုံးကားကြီး ၁၁ စီးသည် ပျဉ်းဝစစ်ဆေးရေးဂိတ်အထိ ရောက်ရှိရပ်နားနေပြီဖြစ်ကြောင်း သိရသည်။
ထို့အပြင် နတ်ရေကန်ဗျူဟာတစ်ခုလုံး အလုံးစုံပိတ် ဆို့ ထိန်းချုပ်ခံလိုက်ရပြီးနောက် ဆက်သွယ်ရေးလမ်းကြောင်းများပါ ပြတ်တောက်သွားပြီးနောက် ပျဉ်းဝစစ်ဆေးရေးဂိတ်အထိ စစ်ကော်မရှင်၏ အရာရှိပိုင်းများပါ ရောက်ရှိလာပြီး ညွှန်ကြားမှုပေးနေကြောင်း သိရသည်။
AA တပ်ဖွဲ့များမှာ နတ်ရေကန်ပတ်ဝန်းကျင်ရှိ ကာကင်းစခန်းများအားလုံးကို သိမ်းလိုက်သည့်အပြင် ဗျူဟာကုန်းကြီးတစ်ခုလုံးကိုပါ ထိန်းချုပ်ထားသည့် အတွက် စစ်ကော်မရှင်လေကြောင်းမှပေးပို့သည့် လက်နက်ခဲယမ်းထုပ် အများစုကို AA က သိမ်းယူသွားကြောင်း သိရသည်။
လက်ရှိတွင် ဗျူဟာကုန်းသို့ တက်လာသည့် စစ်ကူစစ်ကြောင်းများနှင့် AA တပ်တို့ တိုက်ပွဲဖြစ်ပွားနေပြီး လေကြောင်းမှလည်း ဗုံးကြဲတိုက်ခိုက်မှုများရှိကြောင်း သိရသည်။
