ဧရာဝတီတိုင်းမ်
အောက်တိုဘာ ၁၀ ရက်
ဗန်းမော်မြို့အတွင်း စစ်ကော်မရှင်နှင့် ကချင်လွတ်လပ်ရေးတပ်မတော် (KIA) တို့ တိုက်ပွဲပြင်းထန်နေပြီး KIA က စစ်ကော်မရှင်ခြေကုပ်စခန်း ခြောက်ခုကို သိမ်းယူလိုက်ကြောင်း သိရသည်။
ဗန်းမော်မြို့ အထက-၁ အနီးရှိ စစ်ကော်မရှင်ခြေကုပ်ယူ ထားသည့် စခန်း သုံးခုကို ယနေ့ အောက်တိုဘာ ၁၀ ရက် နံနက်ပိုင်းတွင် KIA က ရှင်းလင်းသိမ်းပိုက်လိုက်ကြောင်း သိရသည်။
“၂ မိုင်နဲ့ ၃ မိုင်ပတ်ဝန်းကျင်မှာ ပြင်းပြင်းထန်ထန်တိုက်ပွဲတွေရှိနေတယ်။ ဗန်းမော်မြို့တွင်းမှာလည်း တိုက်ပွဲပြင်းထန်နေပြီး ဒီနေ့မနက်မှာ အထက အနီးက စစ်တပ်စခန်းတွေကို သိမ်းလိုက်တယ် ပြောတယ်”ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
ယမန်နေ့ အောက်တိုဘာ ၉ ရက်နေ့ကလည်း ၂ မိုင်နှင့် အရှေ့သာစည်စပ်ကြား ဂေါက်ကွင်းအနီး စစ်ကော်မ ရှင်၏ ခမရ ၃၂၀ ခြေကုပ်စခန်း သုံးခုကို KIA က သိမ်းယူနိုင်ခဲ့သည်။
KIA သည် ဗန်းမော်မြို့အတွင်း ၂ မိုင်နှင့် ၃ မိုင်ပတ်ဝန်း ကျင်ရှိ စစ်ကော်မရှင်တပ်များကို တိုက်ခိုက် ရှင်းလင်းထားပြီး ရွှေပြည်သာ KBC ဘုရားကျောင်းကုန်းကိုပါ ပြန်လည်ထိန်းချုပ်ကာ စစ်ရေးအရ အသာစီးပြန်လည် ရယူထားနိုင်သည်။ KIA အနေဖြင့် ယခုရက်ပိုင်း ဗန်းမော်တိုက်ပွဲအတွင်း စစ်ကော်မရှင်တပ်မှ အရာရှိ သုံး ဦးအပါအဝင် တပ်ဖွဲ့ဝင် ၃၀ ကျော်ကိုပါ ရှင်းလင်းထားနိုင်ခဲ့သည်။
ဗန်းမော်မြို့သို့ ပို့ခံထားရသည့် ခလရ ၂၃၇၊ ခမရ ၃၈၇၊ ခမရ ၄၁၅ တို့မှ ထုတ်နုတ်တပ်ဖွဲ့ဝင်များ ယခုရက် ပိုင်းအတွင်း သေဆုံးမှုများနေကြောင်း သိရသည်။
စစ်ကော်မရှင်က စစ်ရေယာဉ်အုပ်စုဖြင့် ဗန်းမော်မြို့ကို စစ်ကူပေးပြီးနောက် KIA သိမ်းပိုက်ထားသည့် တပ်ရင်းများကို ပြန်လည်ထိန်းချုပ်ပြီးနောက် စစ်ကြောင်းဆက်ထိုးလာရာ KIA နှင့် ထိတွေ့တိုက်ပွဲများ ပြင်းထန်ခဲ့ပြီးနောက် စခန်းများကို ပြန်လည်လက် လွှတ်နေရခြင်းဖြစ်သည်။
ပုံစာ-KIA တပ်ဖွဲ့ဝင်များ (ပုံဟောင်း)
