ဧရာဝတီတိုင်းမ်
အောက်တိုဘာ ၆ ရက်
ဧရာ၀တီတိုင်း၊ ပုသိမ်မြို့ အမှတ်(၅) ရပ်ကွက် ဘူတာဈေးအနီး ၀ဏ္ဏသိင်္ဂလမ်းတွင် အောက်တိုဘာ ၅ရက်နေ့ည ၁၀နာရီခန့်တွင် နဒီဧရာ အရက်ဖြူဆိုင်မှ မီးစတင်လောင်ကျွမ်းခဲ့ရာ နေအိမ်နှင့် ဈေးဆိုင် ခုနှစ်ခန်းပျက်စီးဆုံးရှုံးခဲ့ကြောင်း သိရသည်။
နဒီဧရာ အရက်ဆိုင်တွင် အရက်အဆီထည့်ထားသည့် ပုံးပေါ်တွင် ဖယောင်းတိုင် တင်ထွန်းခဲ့ရမှ စတင်လောင်ကျွမ်းခဲ့ရခြင်းဖြစ်ကြောင်း မှုခင်းမှတ်တမ်းများအရသိရသည်။
“ညအချိန်မတော်ကြီးထလောင်တာ အရက်ဆီကထလောင်တော့ လူတွေတောင်မနည်းလွတ်အောင်ပြေးရတယ်။ ဘာပစ္စည်းမှယူချိန်မရလိုက်ဘူး”ဟု မီးဘေးသင့် ခံရသူတစ်ဦးမှဧရာ၀တီတိုင်းမ်ကိုပြောသည်။
မီးလောင်ကျွမ်းမှုကို မီးသတ်နှင့်ဒေသခံများ တစ်နာရီကျော်ကြာငြိမ်းသတ်ခဲ့ရပြီး ဆိုင်ခန်းငါးခန်းနှင့်လူနေအခန်း နှစ်ခန်း မီးလောင်ပျက်စီးသွားကြောင်း မီးသတ်တပ်ဖွဲ့မှတ်တမ်းများအရ သိရသည်။
လက်ရှိတွင် မီးစတင်လောင်ကျွမ်းခဲ့သော နဒီဧရာအရက်ဆိုင်ပိုင်ရှင် ဦးအောင်မျိုးထက်ကို ပုသိမ်နယ်မြေ ရဲစခန်းမှ ပုဒ်မ (၂၈၅)၊ ပ – ၁၁၂ /၂၀၂၅ ဖြင့် အမှုဖွင့်ထားကြောင်းသိရှိရသည်။
