ဧရာဝတီတိုင်းမ်
(မန္တလေး)၊ အောက်တိုဘာ ၄ ရက်
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် မန္တလေးမြို့သို့ ရောက်ရှိနေစဉ် ၎င်းတည်းခိုရာ အလယ်ပိုင်းတိုင်း စစ်ဌာနချုပ် (လပခ) ကို ယနေ့ အောက်တိုဘာ ၄ ရက် နံနက် ၆ နာရီ ဝန်းကျင် တွင် တော်လှန်ရေး ပူးပေါင်းတပ်ဖွဲ့များက ရှော့တိုက်ဒုံး နှစ် လုံး ဖြင့် ပစ်ခတ် တိုက်ခိုက်ခဲ့ကြောင်း သိရသည်။
ဗိုလ်ချုပ်မှူးကြီး မင်းအောင်လှိုင်သည် မန္တလေးတက္ကသိုလ် ရာပြည့်ပွဲသို့ တက်ရောက်ရန် ရောက်ရှိနေပြီး နံနက်ပိုင်းတွင် လပခ (နန်းတွင်း) ၌ တည်းခိုနေကြောင်း သတင်းရရှိခဲ့သဖြင့် ၁၀၇-မမ ရှော့တိုက်ဒုံး ဖြင့် ပစ်ခတ်ခဲ့ခြင်းဖြစ်ကြောင်း ဦးဆောင်တိုက်ခိုက်ခဲ့သည့် Brave Warriors for Myanmar (BWM) အဖွဲ့ထံမှ သိရသည်။
“ပစ်တဲ့အချိန်က မင်းအောင်လှိုင်က လပခ ထဲမှာ ရှိနေတာပါ။ ရှော့တိုက်ဒုံး နှစ်လုံးစလုံး လပခ ဝန်းထဲကို ကျရောက်ပေါက်ကွဲတယ်လို့ သိရပါတယ်။ အချိန်တိုအတွင်း စီစဉ်ရလို့ အလုံးရေကတော့ နည်းသွားပါတယ်။ ဒါပေမယ့် မင်းအောင်လှိုင်ရောက်ရှိလာချိန်ကို တိုက်ခိုက်နိုင်လို့ အောင်မြင်တယ်လို့ ဆိုရပါလိမ့်မယ်” ဟု BWM တပ်ဖွဲ့ တာဝန်ရှိသူတစ်ဦး က ဧရာဝတီတိုင်းမ်ကို ပြောသည်။
BWM တပ်ဖွဲ့က စစ်ခေါင်းဆောင်သည် မန္တလေးတက္ကသိုလ် နှစ် ၁၀၀ ပြည့်ပွဲသို့ တက်ရောက်မည်ဖြစ်ရာ တက္ကသိုလ်အတွင်းသို့ ပစ်မှတ်တိကျစွာ ပစ်ခတ်နိုင်သည့် အခွင့်အရေးရှိသော်လည်း ပြည်သူအများအပြားလည်း ရှိနေသည့်အတွက် အရပ်သားပြည်သူများကို ငဲ့ကွက်ကာ ပစ်ခတ်ခြင်း မပြုလုပ်ခဲ့ကြောင်း ပြောဆိုခဲ့သည်။
တိုက်ခိုက်မှု ဖြစ်ပွားပြီးနောက် စစ်ကော်မရှင်ဘက်မှ Mi-35 ရဟတ်ယာဉ် နှင့် Y-12 လေယာဉ်များ အသုံးပြုကာ လပခ ဝန်းကျင်နှင့် မန္တလေးမြို့တွင်း၌ ကင်းထောက် ပျံသန်းမှုများနှင့် ရှာဖွေမှုများ ပြုလုပ်ခဲ့ကြောင်းလည်း သိရသည်။
အဆိုပါ တိုက်ခိုက်မှုကို BWM အဖွဲ့၏ ဦးဆောင်မှုဖြင့် No More Dictatorship (NMD-PDF)၊ People Servant Force (P.S.F) နှင့် ရတနာပုံတပ်ဦးအဖွဲ့ တို့ ပူးပေါင်းဆောင်ရွက်ခဲ့ခြင်းဖြစ်ကြောင်း သိရသည်။
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် ယခု မန္တလေးသို့ မရောက်မီ အောက်တိုဘာ ၂ ရက်နေ့က ပြင်ဦးလွင်မြို့သို့ ရောက်ရှိခဲ့ပြီး အောက်တိုဘာ ၃ ရက်နေ့ ညပိုင်းတွင်မှ မန္တလေးမြို့သို့ ရောက်ရှိလာခြင်း ဖြစ်သည်။
ဓာတ်ပုံ – ပေးပို့
