ဧရာဝတီတိုင်းမ်
စက်တင်ဘာ ၂၈ရက်
စစ်ကော်မရှင်နှင့် ကချင်လွတ်လပ်ရေးတပ်မတော် (KIA) တို့အပြန်အလှန် ထိုးစစ်ဆင်တိုက်ခိုက်နေသည့် ဗန်းမော်တိုက်ပွဲတွင် စစ်ကောင်စီက ထိုးစစ်ဆင်အသာစီးယူတိုက်ခိုက်လာနိုင်သည့်အတွက် စစ်အရာရှိအချို့ကို စစ်ခေါင်းဆောင်က ရာထူးတိုးပေးခဲ့ကြောင်း သိရသည်။
စစ်ကော်မရှင်သည် ခံစစ်အနေအထားနှင့် တိုက်ခိုက်နေရပြီး ထိုးစစ်ဆင်လာပါကလည်း KIA ၏ တန်ပြန်ထိုးစစ်ကြောင့် အမှတ်(၂၁)စစ်ဆင်ရေးကွပ်ကဲမှုဌာနချုပ် (စကခ-၂၁) အတွင်းသို့ တပ်ဆုတ်ပြန်နေရသော်လည်း ယခုရက်ပိုင်းအတွင်း စစ်ရေးဗျူဟာပြောင်းလဲပြီး ထိုးစစ်ဆင်လာနိုင်သည့်အတွက် စစ်အရာရှိ နှစ်ဦးကို ရာထူးတိုးပေးကြောင်း သိရသည်။
စစ်ကော်မရှင်သည် စကခ ၂၁ မှူးနှင့် တပ်မ ၈၈ တပ်မမှူးတို့ကို ရာထူးတိုးပေးပြီး ပြီးခဲ့သည့် စက်တင်ဘာ ၂၃ရက်နေ့က စကခ ၂၁ မှနေ၍ လေယာဉ်ဖြင့်ခေါ်ထုတ်သွားကြောင်း သိရသည်။
”ရာထူးတိုးပေးလိုက်တဲ့ စကခ-၂၁ မှူးတင်မင်းလတ်နဲ့ ၈၈တပ်မမှူး ကျော်နိုင်တို့ကို တပ်ချုပ်က ခေါ်တွေ့တာလို့ သိရပါတယ်။ ဗန်းမော်အသာစီးရလို့ ရာထူးတိုးပေးတယ်လို့ ဝါဒဖြန့် သတင်းလွှင့်နေပါတယ်” ဟု ကချင်သတင်းရင်းမြစ်က ဧရာဝတီတိုင်းမ်ကို ပြောသည်။
ဗန်းမော်တိုက်ပွဲအခြေအနေမှာ ပြင်းထန်လာပြီး စစ်ကော်မရှင်သည် KIA တပ်များရှိနေသေးသည့် လေယာဉ်ကွင်းတစ်ဖက်ခြမ်းကိုပါ ထိုးစစ်ဆင်လာကြောင်း သိရသည်။
ထို့အပြင် စက်တင်ဘာ ၂၆ရက်နေ့က လေကြောင်း ပစ်ကူများဖြင့် မနောကွင်းဘက်အထိ စစ်ကြောင်းတက်လာကြောင်း ဗန်းမော်သတင်းရင်းမြစ်များထံမှ သိရသည်။
စစ်ကော်မရှင်သည် ပြီးခဲ့သည့် စက်တင်ဘာ ၂၆ရက် နေ့လယ် ၁၂နာရီဝန်းကျင်တွင် လေကြောင်းမှ ငါးကြိမ်လာရောက်တိုက်ခိုက်ခဲ့ပြီး ညနေပိုင်းအထိ ဒရုန်းဗုံးကြဲခြင်း၊ လက်နက်ကြီးများဖြင့်ပါပစ်ခတ်၍ ပစ်ကူပေးခဲ့သည်။
ဗန်းမော်တိုက်ပွဲကို ယမန်နှစ် ဒီဇင်ဘာတွင် စတင်ခဲ့ပြီး စစ်ကော်မရှင်၏ တပ်ရင်း၊ တပ်ဌာနများကို KIAက သိမ်းယူထားနိုင်ခဲ့ပြီး စစ်ရေးအရ အသာစီးယူနိုင်ခဲ့သည်။
သို့သော်လည်း စစ်ကော်မရှင်သည် ပြီးခဲ့သည့် ဩဂုတ်လက ရောက်ရှိလာသည့်စစ်သင်္ဘောများမှ လက်နက်အင်အား၊ လူအင်အားဖြည့်တင်းပြီးနောက် KIA သည် တင့်ကားတပ်ရင်းအပါအဝင် တပ်ရင်း သုံးခုခန့်နှင့် ဗန်းမော်လေယာဉ်ကွင်းတစ်စိတ်တစ်ပိုင်းတို့ကို လက်လွှတ်ခဲ့ရသည်။
ပုံစာ-စစ်ကော်မရှင်က ပြန်လည်သိမ်းယူထားသည် ဗန်းမော်အခြေစိုက် အမတ-၃၆၆။
