ဧရာဝတီတိုင်းမ်
စက်တင်ဘာ ၂၅ ရက်
ဧရာဝတီတိုင်း၊ ရေကြည်မြို့နယ်၊ ငသိုင်းချောင်းမြို့ အမှတ်(၃၄၄)အမြောက်တပ် (အမတ-၃၄၄) အနီးရှိ ကျေးရွာများတွင် တိုက်ပွဲများ ပြန်လည်ဖြစ်ပွားနေကြောင်း သိရသည်။
ရေကြည်မြို့နယ်အတွင်း ပြီးခဲ့သည့် စက်တင်ဘာ ၂၂ရက်နေ့မှစတင်ကာ နှစ်ဖက်အပြန်အလှန် ပစ်ခတ်သံများ ထွက်ပေါ်လာပြီး တိုက်ပွဲပြန်လည်ဖြစ်ပွားနေကြောင်း သတင်းရင်းမြစ်များထံမှ သိရသည်။
”လက်နက်ငယ်အပြန်အလှန်ပစ်ခတ်သံတွေပြန်ကြားရတယ်။ ဒရုန်းဗုံးတွေလည်းကြဲတယ်။ ပြီးခဲ့တဲ့ တစ်ပတ်အတွင်းကပဲ လေယာဉ်နဲ့ ရေကြည်ရွာတွေဘက်ကြဲခံရတယ်။ တိုက်ပွဲပြန်ဖြစ်နေပါတယ်” ဟု ရေကြည်ဒေသခံတစ်ဦးက ဧရာဝတီတိုင်းမ်ကိုပြောသည်။
စစ်ကော်မရှင်က ပြီးခဲ့သည့် စက်တင်ဘာ ၁၇ရက် နံနက် ၃နာရီမှစတင်ကာ ရေကြည်ရှိ ငှက်သိုက်၊ မြတ်တို၊ ဆီဆုံကုန်းကျေးရွာများကို လေကြောင်းမှ ဗုံးကြဲချတိုက်ခိုက်ခဲ့သည်။
စစ်ကော်မရှင်သည် အာရက္ခတပ်တော် (AA) နှင့် ပူးပေါင်းတပ်ဖွဲ့ဝင်များ ခိုလှုံခွင့်မရှိစေရန် ရေကြည် အမြောက်တပ်အနီးရှိကျေးရွာများကိုလည်း ဩဂုတ်လ နောက်ဆုံးပတ်မှ စတင်ကာ ပြောင်းရွှေ့ ခိုင်းထားကြောင်း သိရသည်။
ရေနံ့သာစစ်ဆေးရေးဂိတ်နှင့် ငသိုင်းချောင်းလမ်းတလျှောက်တွင်လည်း ကာကင်းစခန်းငယ်များ တည်ဆောက်ထားကာ စစ်ရေးပြင်ဆင်ထားပြီး အမြောက်တပ် ၃၄၄အတွင်းကိုလည်း ကျည်ကာဝတ်စုံ အပြည့်ဆင်ထားသည့် စစ်ကော်မရှင်တပ်ဖွဲ့ဝင်များကို စစ်သုံးကားကြီးများဖြင့် ခေါ်ယူ အင်အားဖြည့်ထားကြောင်း ဒေသခံများထံမှ သိရသည်။
စစ်ကော်မရှင်က လေးမျက်နှာအစပ်ရှိ စက်စက်ယိုရွာတွင်လည်း စစ်ကြောင်းထိုးအင်အားဖြည့် နေသည့်အတွက် AA ပူးပေါင်းတပ်များနှင့် တိုက်ပွဲများ ရှိနေကြောင်း သိရသည်။
ပုံစာ-စစ်ကော်မရှင်တပ်ဖွဲ့ဝင်များ(ပုံဟောင်း)
