နိုင်မင်းလွင်/ဧရာဝတီတိုင်းမ်
စက်တင်ဘာ ၂၅ ရက်
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်သည် ရုရှားတွင် ကျင်းပသည့် “ကမ္ဘာ့အနုမြူ သတင်းပတ်ဖိုရမ်” ကို လူတန်းစားတစ်ရပ်အဖြစ် အသိအမှတ်ပြုခံလို၍ တက်ရောက်နေခြင်းဖြစ်ပြီး အဆိုပါဖိုရမ်သည် မည်သူမဆို ဝင်ကြေးပေး၍ တက်ရောက်နိုင်သည့် ပွဲတစ်ခုဖြစ်ကြောင်း သိရသည်။
စစ်ခေါင်းဆောင်သည် ယနေ့ စက်တင်ဘာ ၂၅ မှ ၂၈ ရက်နေ့အထိ ရုရှားနိုင်ငံ၊ မော်စကိုမြို့တွင် ကျင်းပမည့် ကမ္ဘာ့အနုမြူသတင်းပတ်ဖိုရမ်ကို တက်ရောက်ရန်အတွက် ရုရှားနိုင်ငံသို့ အလုပ်သဘော ခရီးစဥ်အဖြစ် ရောက်နေသော်လည်း ယင်းဖိုရမ်သည် ယူရိုငွေပေးကာ တက်၍ရသလို အထူးလျော့ဈေး လည်းရှိကြောင်း သိရသည်။
“ရုရှားဖိုရမ်ကို သွားတက်တာ အလကားမဟုတ်ဘူး။ ယူရို ၂၂၀၀ ပေးရတယ်။ ရုရှားက ဒီလိုပွဲတွေနဲ့ပဲ ပိုက်ဆံရှာနေတာလား ဆိုကြတယ်။ လူတန်းစားတစ်ရပ်အဖြစ် အသိအမှတ်ပြုခံချင်၊ လူရာဝင်ချင် တာကိုး။ ပိုက်ဆံပေးရလည်း ပေးမှာပေါ့” ဟုအဆိုပါဖိုရမ်နှင့်ပတ်သက်၍ သိရှိထားသူ သတင်းရင်း မြစ်တစ်ဦးက ဧရာဝတီတိုင်းမ် ပြောသည်။
ရုရှားနိုင်ငံသည် အဆိုပါဖိုရမ် တက်ရောက်ခွင့်အတွက် နိုင်ငံတိုင်းကို ကဏ္ဍစုံကုန်ကျစရိတ် VAT (အခွန်) မပါ တက်ရောက် သူတစ်ဦးလျင် ယူရို ၂၅၀၀ သတ်မှတ်ထားပြီး အဖွဲ့အစည်းတစ်ခုတည်းမှ ကိုယ်စားလှယ် သုံး ဦးနှင့်အထက် တက်ရောက်ပါက အထူးလျှော့စျေး ယူရို ၂၂၀၀ သာ ပေးရမည်ဟု ဆိုထားသည်။
“ကမ္ဘာ့အနုမြူသတင်းပတ်ဖိုရမ်” ဖိုရမ်သို့ ပညာရှင်များ၊ စီးပွားရေးလုပ်ငန်းရှင်များ၊ အနုမြူစွမ်းအင် နှင့်ဆိုင်သည့် ကုမ္ပဏီများမှ ကိုယ်စားလှယ်များသည်လည်း သက်မှတ်ထားသော ကုန်ကျစရိတ် ပေးချေ၍ တက်ရောက်ခွင့် ရရှိကြောင်းသိရသည်။
ထို့သို့ ကိုယ်စားလှယ်အဖြစ် ပါဝင်တက်ရောက်သူများကို အနုမြူပြပွဲသို့ သွားရာက်လေ့လာခွင့်၊ အထူးဖိတ်ကြားချက် မလို အပ်သော ကွန်ဂရက်ပွဲများတွင် ပါဝင်တက်ရောက်ခွင့်၊ သတင်းအချက် အလက်ဆိုင်ရာ ပံ့ပိုးမှုနှင့် ဖိုရမ်၏ အချက်အလက်ဆိုင်ရာ စာရွက်စာတမ်းများ ပေးမည်ဖြစ်ကြောင်း သိရသည်။
ယင်းအပြင် အဆိုပါဖိုရမ်၏ တရားဝင် အီလက်ထရောနစ်စာရင်း၊ ကုမ္ပဏီအမှတ်တရ လက်ဆောင် ပစ္စည်းများ၊ ကမ္ဘာ့အနုမြူသတင်းပတ်ဖွင့်ပွဲနေ့ ညစာစားပွဲတွင်ပါဝင်တက်ရောက်ခွင့်၊ ဖိုရမ်ပိတ်ပွဲတွင် ပြုလုပ်မည့် ဧည့်ခံပွဲ စသည်တို့အား ရုရှားနိုင်ငံက ဝန်ဆောင်မှုပေးမည်ဖြစ်ကြောင်း သိရသည်။
ရုရှားနိုင်ငံတွင် ပြုလုပ်သည့် ယင်းကမ္ဘာ့အနုမြူသတင်းပတ် ဖိုရမ်ကိုသာမက ယခင်အစည်းအဝေး များတွင်လည်း တက်ရောက်ပါဝင်လိုလျှင် သတ်မှတ်ငွေကြေးများ ပေးဆောင်ရပြီး စစ်ခေါင်းဆောင် အနေဖြင့် အာဏာသိမ်းပြီးနောက် မကြာခဏ သွားရောက်လျက်ရှိသည်။
စစ်ကော်မရှင်ကမူ ထိုခရီးစဉ်တွင် စစ်ခေါင်းဆောင်နှင့် ရုရှားသမ္မတ ပူတင်အပါအဝင် တာဝန်ရှိသူတို့ တွေ့ဆုံဆွေးနွေးမှုများ ပြုလုပ်သွားမည်ဖြစ်ပြီး စီးပွားရေး၊ လုံခြုံရေးနှင့် ကဏ္ဍပေါင်းစုံ၌ မဟာဗျူ ဟာမြောက် ပူးပေါင်းမှုများ ပိုမိုဆောင်ရွက်မည်ဟုလည်း ထုတ်ပြန်ဖော်ပြထားသည်။
ဓာတ်ပုံ- MOI
ပုံစာ-စစ်ခေါင်းဆောင်က ရုရှားနိုင်ငံသို့ ရောက်ရှိစဉ် နိုဗာစီဗစ်ဒေသအုပ်ချုပ်ရေးမှူးကို လက်ဖက်၊ လက်ဖက်ရည်၊ ငါးသလောက်ပေါင်းတို့ဖြင့် ပြန်လည်ဧည့်ခံနေစဉ်။
