ဧရာဝတီတိုင်းမ်
စက်တင်ဘာ ၁၈ရက်
စစ်ကိုင်းတိုင်း၊ ကသာခရိုင်၊ ဗန်းမောက်မြို့ကို တော်လှန်ရေးပူးပေါင်းတပ်များက ဝင်ရောက်တိုက်ခိုက် နေပြီး ကာကင်းစခန်းများကို သိမ်းယူထားနိုင်ကြောင်း သိရသည်။
ပြီးခဲ့သည့် စက်တင်ဘာ ၁၅ရက်နေ့မှစ၍ ယနေ့ စက်တင်ဘာ ၁၈ရက်နေ့ထိ ဗန်းမောက်မြို့သိမ်းတိုက်ပွဲ ဆက်လက်ဖြစ်ပွားနေပြီး စစ်ကော်မရှင်နှင့် ရှမ်းနီတပ် (SNA) တို့၏ ကာကင်းစခန်း ခြောက်ခုအထိကို သိမ်းယူထားကြောင်း သတင်းရင်းမြစ်ထံမှ သိရသည်။
”တိုက်ပွဲက လေးရက်အထိ ဆက်ဖြစ်နေတုန်းပဲ။ ကာကင်းကုန်းတွေကိုသိမ်းပြီး မြို့ထဲထိ ထိုးဖောက်ဖို့ ကြိုးပမ်းနေတယ်” ဟု တော်လှန်ရေးတပ်ဖွဲ့နှင့် နီးစပ်သူတစ်ဦးက ဧရာဝတီတိုင်းမ်ကို ပြောသည်။
ဗျူဟာမှူး ရဉ်ထွန်းဦးစီးသည့် SNAတပ်မဟာ ၆၁၄၊ အင်အား ၄၀၀ တပ်စွဲနေရာ ယူထားသည့်မြစ်သေးချင်းရွာ ကာကင်းကုန်း-၁ ၊ ကာကင်းကုန်း-၂ ၊ တာဝါတိုင်ကုန်း၊ AGBT၊ ကျွဲကောကုန်း၊ စက်တောကုန်းတို့ကို တော်လှန်ရေးတပ်ဖွဲ့များက သိမ်းယူထားပြီးဖြစ်ကြောင်း PDF Insight တွင် ဖော်ပြထားသည်။
ဗန်းမောက်မြို့တွင် စစ်ကော်မရှင်တပ်နှင့် SNA ပူးပေါင်းတပ်များစိုးမိုးနေရာယူထားပြီး ရှမ်းနီလူမျိုး အများစုနေထိုင်ကြောင်း သိရသည်။ တော်လှန်ရေးတပ်ဖွဲ့များ သိမ်းပိုက်ထားသည့် ပင်လည်ဘူးနှင့် အင်းတော်မြို့ကြားတွင် တည်ရှိသည့် ဗန်းမောက်မြို့တွင် သတ္တုတူးဖော်ရေးနှင့် ရွှေတူးဖော်ရေး လုပ်ငန်းများ ရှိသည်။
အမှတ် (၁) စစ်ဒေသ ကသာခရိုင်ကွပ်ကဲရေးမှူးဦးဆောင်မှုဖြင့် ကသာခရိုင်တပ်ရင်း ၂၊ ၄၊ ၅၊ အမှတ် (၁) ဒေသစစ်ကြောင်း၊ အထူးလှုပ်ရှားတပ်ရင်းများ၊ ကသာခရိုင် ပကဖလှုပ်ရှားအဖွဲ့၊ ကသာခရိုင် လက်နက် ကြီး အဖွဲ့၊ ဗန်းမောက်မြို့နယ် ပကဖတို့က ဗန်းမောက်မြို့သိမ်းတိုက်ပွဲတွင် ဝင်ရောက် တိုက်ခိုက် နေခြင်းဖြစ်သည်။
ဗန်းမောက်မြို့တွင်း ဒေသခံများကို SNAတပ်က ထွက်ခွင့်မပြုဘဲ တားမြစ်ထားသည့်အတွက် ဒေသခံ ၈၀၀၀ နီးပါး ပိတ်မိနေသည်ဟု ဒေသခံများနှင့် နီးစပ်သူများထံမှ သိရသည်။
