ဧရာဝတီတိုင်းမ်
စက်တင်ဘာ ၁၄ ရက်
မကွေးတိုင်း၊ ငဖဲမြို့နယ်၊ အမ်း-ပဒါန်းရိုးအနီးရှိ နတ်ရေကန်ဗျူဟာနှင့် စွန်တက်ရွာအနီးတစ်ဝိုက်တွင် စစ်ကော်မရှင်ပူးပေါင်းတပ်များနှင့် တော်လျန်ရေးတပ်ဖွဲ့များအကြား တိုက်ပွဲများ ဆက်လက်ပြင်းထန် လျက်ရှိသည်။ စစ်ကော်မရှင်တပ်များသည် တိုက်ပွဲများအတွင်း သေဆုံးမှုများပြားကာ တပ်များလန် ထွက်ပြေးခဲ့ရသော်လည်း အင်အားအလုံးအရင်းဖြင့် ထပ်မံဖြည့်တင်းကာ ရှေ့တိုးထိုးစစ်များ ဆင်နွှဲ နေကြောင်း သိရသည်။
ပြီးခဲ့သည့် စက်တင်ဘာ ၉ရက်နှင့် စက်တင်ဘာ ၁၂ရက်နေ့တို့တွင် အမှတ်(၉၀၅)အမြောက်စစ်ဆင်ရေး ကွပ်ကဲမှု ဌာနချုပ် (မစခ-၉၀၅) မှနေ၍ စစ်သုံးကားကြီး ရှစ်စီးဖြင့် နတ်ရေကန်ဘက်ကို အင်အားဖြည့်တင်းခဲ့ကြောင်း သိရသည်။
“မစခ ၉၀၅ကနေ စုဖွဲ့ထားတဲ့ အင်အားတွေ တင်ပို့နေတယ်။ အခုပို့နေတဲ့အဖွဲ့တွေက ရှမ်းမြောက် နမ့်ဖတ်ကာနဲ့ သီပေါမှာ စစ်ရှုံး တပ်ပျက်သွားတဲ့ အဖွဲ့တွေပါ” ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
မစခ-၉၀၅ မှနေ၍ အမြောက်များဖြင့် တရစပ်ပစ်ခတ်မှုများရှိခဲ့ပြီး တိုက်ပွဲပြင်းထန်နေသည့်နေရာများကို စစ်ကူ ပစ်ခတ်နေခြင်းဖြစ်ကြောင်း သိရသည်။ထို့အပြင် စစ်ကော်မရှင်က နတ်ရေကန်အနီးတဝိုက် ကင်းထောက်လေယာဉ်နှင့် ဒရုန်းများ ပျံသန်းနေစေပြီး ဗုံးကြဲတိုက်ခိုက်မှုများ နေ့စဉ်လုပ်ဆောင် နေကြောင်း သိရသည်။
ပြီးခဲ့သည့် စက်တင်ဘာ ၁၂ရက်နေ့က နတ်ရေကန်အနီးသို့ ပို့လိုက်သည့် စစ်ကော်မရှင် စစ်ကြောင်းတွင် ဒရုန်းအထူးတပ်ဖွဲ့ကိုပါ ထည့်သွင်းစေလွှတ်ခဲ့ကြောင်း သိရသည်။
စစ်ကော်မရှင်သည် စကခ (၁၇) လက်အောက်ခံတပ်ရင်းများဖြစ်သော ခမရ (၅၇၄)၊ ခမရ (၅၆၉)၊ ခမရ (၅၇၅)၊ ခမရ (၅၇၇)၊ ခမရ (၅၂၀)၊ ခလရ (၂၉၅) တပ်ရင်းများနှင့် စစ်မှုမထမ်းမနေရ ဥပဒေအောက်တွင် အတင်းအဓမ္မ စစ်သားစုဆောင်းကာ စစ်သင်တန်းဆင်းလာသော ရဲဘော်သစ်များဖြင့် ဖွဲ့စည်းထားသည့် တပ်ရင်းများကိုပါ စစ်ကြောင်းထိုးရန် စေလွှတ်လျက်ရှိသည်။
ပြီးခဲ့သည့် ရက်ပိုင်းကလည်း စွန်တက်ကျေးရွာအနီး စစ်ကြောင်း ၃ကြိမ်ထိုးလာသည့် ခလရ ၂၉၅တပ်ဖွဲ့ကို တပ်ဆုတ်ပြီး ကစဉ့်ကလျားထွက်ပြေးအောင် တိုက်ခိုက်နိုင်ခဲ့ကြောင်း AAက စက်တင်ဘာ ၁၀ရက်နေ့တွင် ထုတ်ပြန်သည်။
ဧရာဝတီတိုင်း-ရခိုင်အစပ်၊ မကွေးတိုင်း-ရခိုင်အစပ်နေရာများ၌ ၎င်းတို့ စစ်ရှုံး၍ ပေးထားခဲ့ရသော နေရာများကို ပြန်လည်ရရှိရန် ကြိုးပမ်း အားထုတ်သော ထိုးစစ်များ ကို ဆက်တိုက်ပြုလုပ်လျက်ရှိသည်။
ထို့ကြောင့် ယခုရက်များအတွင်း အဆိုပါနေရာများ၌ တိုက်ပွဲများ ဆက်လက်ပြင်းထန်လျက်ရှိပြီး အထူးသဖြင့် ရန်သူသည် မကွေးတိုင်း၊ နတ်ရေကန်ကုန်းဘက်တွင် ထိုးစစ်များကို ပိုမို ပြုလုပ်လျက်ရှိသည်ဟု AA ၏ ထုတ်ပြန်ချက်တွင် ဖော်ပြထားသည်။
ပုံစာ-စစ်ကော်မရှင်တပ်ဖွဲ့ဝင်များ (ပုံဟောင်း)၊ မကွေးတိုင်းအစပ်တွင်တွေ့ရသည့် AA တပ်ဖွဲ့ဝင်များ(ပုံဟောင်း)။
