လှိုင်မြို့နယ်က ဧရာဝတီဘဏ်ခွဲ ၁ ခုဓားပြတိုက်ခံရပြီး ဘဏ်ဝန်ထမ်းအမျိုးသမီး ၁ ဦး ဒဏ်ရာရ
ဧရာဝတီတိုင်းမ်
စက်တင်ဘာလ ၂ ရက်
ရန်ကုန်မြို့၊ လှိုင်မြို့နယ်၊ ၁၀ ရပ်ကွက်၊ ပြည်လမ်းမပေါ်က ဧရာဝတီဘဏ်ခွဲ ဒီကနေ့နေ့လည် ၂ နာရီဝန်းကျင်မှာ ဓားပြတိုက်ခံခဲ့ရတယ်လို့ ဒေသခံတွေဆီကသိရပါတယ်။
ကန်လမ်းထိပ်မှာရှိတဲ့ အဲ့ဒီဘဏ်အတွင်းထဲကို အမည်မသိလူ ၁ ဦးက ဘဏ်စာအုပ်လုပ်မည်ဟုဆိုကာ ဝင်ရောက် လာပြီးဓားထောက်ဓားပြတိုက်ခဲ့တာဖြစ်ကာ ဧည့်ကြိုဘဏ်ဝန်ထမ်း မဆွေဆွေဝင်း ထိခိုက်ဒဏ်ရာရရှိခဲ့တယ်လို့သိရပါတယ်။
” လာတဲ့သူက တယောက်ထဲလာတာ၊ ဘဏ်စာအုပ်လုပ်ချင်လို့ဆိုပြီး ဝင်လာတာ။ အဲ့ဒါကို ဧည့်ကြိုဘဏ်ဝန်ထမ်းက စာအုပ်လုပ်ဖို့အတွက် မှတ်ပုံတင်ပေးရမယ်လို့ပြောတုန်းရှိသေးတယ် ဓားထောက်ပြီး ဓားပြတိုက်တာ။ အဲ့ဒီဝန်ထမ်းမိန်းကလေးတော့ဒဏ်ရာရသွားတယ်” လို့ ဧရာဝတီဘဏ်နဲ့နီးစပ်တဲ့ ရန်ကုန်မြို့ခံအမျိုးသမီးတဦးက ဧရာဝတီတိုင်းမ်ကိုပြောပါတယ်။
အမည်မသိလူက ဓားပြဝင်တိုက်ခဲ့ပေမယ့် ဘဏ်ဝန်ထမ်းအမျိုးသမီးထိခိုက်တာကလွဲရင် ငွေသားတွေဆုံးရှုံးမှုမရှိဘဲ အဲ့ဒီ အမည်မသိလူလည်း ထွက်ပြေးလွတ်မြောက်သွားတယ်လို့ သူကဆက်လက်ပြောပါတယ်။
ဓားပြတိုက်မှုဖြစ်ပွားပြီးတဲ့နောက် စစ်ကောင်စီတပ်ဖွဲ့ဝင်တွေအများအပြားရောက်ရှိလာပြီး ဘဏ်အနီးတဝိုက်နဲ့ လမ်းမတွေကိုပိတ်ဆို့စစ်ဆေးတာတွေလုပ်ဆောင်ခဲ့တယ်လို့ ဒေသခံတွေကပြောပါတယ်။
ဧရာဝတီဘဏ်ဟာ မြန်မာပြည်ထိပ်တန်းခရိုနီတဦးဖြစ်သူ မက်စ်မြန်မာ ဦးဇော်ဇော်ပိုင်ဆိုင်တဲ့ လုပ်ငန်းခွဲ ဘဏ်လုပ်ငန်းတခုဖြစ်ပါတယ်။
ဓာတ်ပုံ – ဓားပြတိုက်ခံခဲ့ရသည့်ဧရာဝတီဘဏ်ခွဲ(ပုံဟောင်း)။
#AyeuarwaddyTimes
