ကျောက်တော်မြို့ရှိ ကျောင်းကို စစ်ကော်မရှင်က ဗုံးကြဲတိုက်ခိုက် ကျောင်းသားနှင့် ကလေးငယ် ၁၈ ဦး သေဆုံး

ဧရာဝတီတိုင်းမ်
စက်တင်ဘာ ၁၂ ရက်

ရခိုင်ပြည်နယ်၊ ကျောက်တော်မြို့ရှိ “ပညာပန်းခင်း” ကိုယ်ပိုင်အထက်တန်းကျောင်းရှေ့ကို စစ်ကော်မရှင်တပ်က လေ ကြောင်းမှ ဗုံးကြဲတိုက်ခိုက်ခဲ့ရာ ကျောင်းသား၊ ကျောင်းသူများနှင့် ကလေးငယ် ၁၈ ဦး သေဆုံးပြီး ၂၀ ကျော် ဒဏ်ရာရရှိခဲ့ကြောင်း သိရသည်။

စစ်ကော်မရှင်တပ်သည် ကျောက်တော်မြို့နယ်၊ သရက်တပင်ကျေးရွာအတွင်းသို့ စက်တင်ဘာ ၁၂ ရက်၊ နံနက် ၁ နာရီ ၅ မိနစ်ခန့်တွင် ပေါင် ၅၀၀ ဗုံးနှစ်လုံး လာရောက်ကြဲချခဲ့ခြင်းဖြစ်ကြောင်း အာရက္ခတပ်တော် (AA) က ထုတ်ပြန်သည်။

အဆိုပါ ဗုံးနှစ်လုံးသည် တိုက်ပွဲဖြစ်ပွားခြင်းမရှိဘဲ ကျောင်းအနီးသို့ ကျရောက်ပေါက်ကွဲခဲ့ရာ ကျောင်းသား၊ ကျောင်းသူများနှင့် အနီးအနားရှိ ကလေးငယ်များအပါအဝင် စုစုပေါင်း ၁၈ ဦး သေဆုံးခဲ့ပြီး ၂၀ ကျော် ပြင်းထန်ဒဏ်ရာများ ရရှိခဲ့ကြောင်း AA က ထုတ်ပြန်သည်။

စစ်ကော်မရှင်သည် ကျောင်းသား၊ ကျောင်းသူများသာရှိသည့် ကျောင်းကို ရည်ရွယ်ချက်ရှိရှိ ပစ်မှတ်ထားတိုက်ခိုက်ခဲ့ခြင်းဖြစ်သည်ဟုလည်း သိရသည်။

ဓာတ်ပုံ- APM
ပုံစာ- ​ကျောက်​တော်မြို့ ဗုံးကြဲတိုက်ခိုက်ခံရပြီး​နောက် ​အပျက်အစီးများ။