ဧရာ၀တီတိုင်းမ်
(တောင်ငူ)သြဂုတ် ၃၁ ရက်
ပဲခူတိုင်း၊ တောင်ငူမြို့တွင် စည်ပင် အမှိုက်သိမ်းကားများ မြို့ပေါ်ရပ်ကွက်များအတွင်းသို့ လာရောက်ပြီး အမှိုက်သိမ်းခြင်းမရှိတော့၍ လမ်းဘေး အမှိုက်ပုံတွင် ” အမှိုက်မပစ်ရ မင်းအဖေ စည်ပင်တွေ မသိမ်းဘူးကွ ဘုန်းကြီးတွေ သိမ်းတာ ” ဟု စားကပ်ထားရကြောင်းသိရသည်။
မြို့နယ်စည်ပင် သာယာရေးအဖွဲ့၏ အမှိုက်သိမ်းကားများသည် ၂၀၂၁ ခုနှစ် စစ်တပ် အာဏာသိမ်းပြီးအတည်းက ရပ်ကွက်များအတွင်းသို့ အမှိုက်သိမ်းကားများ လာရောက်ခြင်းမရှိတော့ဘဲ ပျောက်ကွယ်သွားသည်မှာ ယနေ့အထိ ဖြစ်ကြောင်း သိရသည်။
တောင်ငူမြို့ ၊ ရပ်ကွက် ( ၆ ) အာသောကာရုံ ဘုန်းတော်ကြီး ကျောင်း နှင့် သီလရှင် ကျောင်းထောင့်ရှိ အများမြင်သာ သော လမ်းဘေးအမှိုက်ပုံတွင် အဆိုပါ စာသားအား စိုက်ထူထားခြင်းဖြစ်သည်။
” အမှိုက်ကားတွေက မလာတော့ နီးစပ်ရာ နေရာတွေမှာ အမှိုက်တွေ ပုံကြတာ ရပ်ကွက်တိုင်းလိုပဲ။ အချို့ အမှိုက်ပုံတွေဆို ပုပ်စော်တွေနံပြီး လမ်းဖြတ်သွားသူတွေ အတော်လေး စိတ် ဒုက္ခရောက်ရတယ် “ဟု ဒေသခံတစ်ဦးက ဧရာ၀တီတိုင်းမ်ကို ပြောသည်။
တောင်ငူမြို့တွင် မြို့ပေါ်ရပ်ကွက်များအတွင်းသို့ စည်ပင်အမှိုက်သိမ်းကားများ မလာရောက်တော့သည့် အတွက် မြို့ခံများသည် နီးစပ်ရာ လမ်းဘေးများတွင်သာ အမှိုက်များပစ်ကြသောကြောင့် တောင်ငူ မြို့ပေါ်ရှိ လမ်းဘေးများတွင် အမှိုက်ပုံပေါင်း ၃၀ ကျော်ရှိကြောင်း သိရသည်။
ပုံစာ- တောင်ငူတွင် အမှိုက်သိမ်းကားများမလာ၍ ” အမှိုက်မပစ်ရ မင်းအဖေ စည်ပင်တွေ မသိမ်းဘူးကွ ဘုန်းကြီးတွေ သိမ်းတာ” ဟု စာကပ်ထားသည်ကိုတွေ့ရစဉ်။
