တော်လှန်ရေးတပ်ဖွဲ့များက မတ္တရာအရှေ့ခြမ်းမှ ဖယောင်းတောင်ရွှေလုပ်ကွက်များနှင့် အယ်လ်ဖာ ဘိလပ် မြေစက်ရုံတို့ကို လက်လွှတ်ခဲ့ရပြီး တိုက်ပွဲဆက်လက်ပြင်းထန်နေ

ဧရာဝတီတိုင်းမ်
ဩဂုတ် ၃၀ ရက်

မန္တလေးတိုင်း၊ မတ္တရာမြို့နယ်ရှိ တော်လှန်ရေးတပ်ဖွဲ့များသိမ်းပိုက်ထားသည့် နေရာအချို့ကို စစ်ကော် မရှင်က ပြန်လည်သိမ်းယူလိုက်ကြောင်း သိရသည်။

မိုးကုတ်မြို့အနီးရှိ ရတနာသိင်္ဂီသတ္တုတွင်းနှင့် ပုသိမ် ကြီးမြို့နယ် ဖယောင်းတောင်ရွှေလုပ်ကွက်တို့ကို စစ်ကော်မရှင်က သိမ်းယူပြီးနောက် အင်အားတိုးချဲ့ကာ ဘန်ကာများပါ ဆောက်လုပ်ထားပြီဖြစ်ကြောင်း သိရသည်။

“နေ့တိုင်းနီးပါး တိုက်ပွဲဖြစ်နေတယ်။ သပိတ်ကျင်းထဲမှာဆို စစ်တပ်က ဘန်ကာတွေ ဆောက်တယ်။ ရဟတ်ယာဉ်နဲ့ ထောက်ပို့ ဆက်တိုက်လုပ်နေတာ။ နေရာတွေကတော့ လက်လွှတ်လိုက်ရပါပြီ” ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။

စစ်ကော်မရှင်သည် ရွှေလုပ်ကွက်နှင့် သတ္တုတွင်းတို့ကို သိမ်းယူပြီးနောက် အယ်လ်ဖာဘိလပ်မြေ စက်ရုံကိုပါ ဆက်လက်ထိုးစစ်ဆင်ပြီး သိမ်းယူသွားပြီဖြစ် ကြောင်း သိရသည်။ ပြီးခဲ့သည့် ဩဂုတ် ၂၄ ရက်နေ့တွင် ဖယောင်းတောင် ရွှေလုပ်ကွက်ကို စစ်ကော်မရှင်က ထိုးစစ်ဆင်တိုက် ခိုက်ပြီး သိမ်းယူလိုက်ကာ လေကြောင်းမှ ဖယောင်းတောင်အနီးကျေးရွာများကို ဗုံးကြဲချတိုက်ခိုက်မှုများ ပြုလုပ်ခဲ့ကြောင်း သတင်းရင်းမြစ်ထံမှ သိရသည်။

တော်လှန်ရေးတပ်ဖွဲ့များသည် ပြီးခဲ့သည့် ၂၀၂၄ ဇွန်နှင့် ဇူလိုင်လအတွင်းတွင် မန္တလေးတိုင်းအတွင်းရှိ မိုးကုတ်၊ သပိတ်ကျင်း၊ မတ္တရာ၊ စဉ့်ကူးမြို့နယ်တို့ကို ထိန်းချုပ်ပြီးနောက် ယခုမတ္တရာမြို့နယ်အတွင်းရှိ နေရာအချို့ကို စစ်ကော်မရှင်က ပြန်လည်သိမ်းယူသွားခြင်းဖြစ်သည်။

သပိတ်ကျင်းမြို့နယ်အတွင်းတွင်လည်း စစ်ကော်မရှင်က နေရာအချို့ကို ပြန်လည်ထိန်းချုပ်နိုင်ပြီးနောက် ၇ မိုင်၊ ၄ မိုင်၊ တတက ၁၃၊ တွင်းငယ်စသည့်နေရာတစ်ဝိုက်တွင် စစ်ကော်မရှင်နှင့် တော်လှန်ရေး တပ်ဖွဲ့များ တိုက်ပွဲပြင်းထန်နေကြောင်း သိရသည်။

စစ်ကော်မရှင်က တော်လှန်ရေးတပ်ဖွဲ့များထိန်းချုပ် ထားသည့်နေရာများကို ပြန်လည်သိမ်းပိုက်ပြီး ချိန်တွင် ဘန်ကာများကိုပါ အခိုင်အမာဆောက်လုပ်ထားပြီး လေကြောင်းမှ စစ်ကူအင်အား ဆက်တိုက်ဖြည့် တင်းနေကြောင်း သိရသည်။

ပုံစာ-စစ်ကော်မရှင်တပ်က ဖယောင်းတောင်ရွှေလုပ်ကွက်များနှင့် အယ်လ်ဖာဘိလပ်မြေစက်ရုံတို့ကို ပြန်လည်သိမ်ူယူပြီးနောက်တွေ့ရစဉ်။