ဧရာဝတီတိုင်းမ်
ဩဂုတ် ၃၀ ရက်
စစ်ကော်မရှင်သည် ပဲခူးတိုင်း (အနောက်ခြမ်း) ရှိ မြို့နယ်အချို့တွင် အရပ်သားပြည်သူများကို ပစ်မှတ်ထားကာ ဒရုန်းဖြင့် ဗုံးကြဲခြင်းနှင့် လက်နက်ကြီးဖြင့် ပစ်ခတ်တိုက်ခိုက်ခြင်းများကို ပိုမို လုပ်ဆောင်လာကြောင်း သိရသည်။
စစ်ကော်မရှင်၏ လေကြောင်းတိုက်ခိုက်မှုကြောင့် ယခု ဩဂုတ်လအတွင်းက သာယာဝတီခရိုင်အတွင်းရှိ အုတ်ဖို၊ ကြို့ပင်ကောက်နှင့် ပေါက်ခေါင်းမြို့နယ်တို့တွင် အရပ်သားများ သေဆုံးခဲ့ရသည်။
စစ်ကော်မရှင်သည် ပြီးခဲ့သည့် ဩဂုတ် ၂၈ ရက်နေ့က အုတ်ဖိုမြို့နယ်၊ ဒေါင်းကြီးကျေးရွာကို ဒရုန်းဖြင့် ဗုံးသီး နှစ်လုံးကြဲချတိုက်ခိုက်ခဲ့ရာ တစ်လုံးမှာ စက်ဘီးဖြင့်ထွက်ပြေးသည့် သားအမိနှစ်ဦးအပေါ်သို့ ကျရောက်ပေါက်ကွဲခဲ့ရာ ဒေါ်ဇင်မာသင်း(၃၄နှစ်) နှင့် မယွန်းမီ(၆နှစ်) တို့မှာ နေရာတွင်ပင်ပွဲချင်းပြီး သေဆုံးခဲ့ကြောင်း သိရသည်။
ကြို့ပင်ကောက်မြို့နယ်တွင်လည်း ပြီးခဲ့သည့် ဩဂုတ် ၂၀ ရက်နေ့က စစ်ကော်မရှင်၏ အကြောင်းမဲ့ ဒရုန်းဖြင့် တိုက်ခိုက်မှုကြောင့် သရက်ကုန်းရွာမှ ဇနီးမောင်နှံနှစ်ဦးဖြစ်သည့် ဦးမင်းဇော်ဦး(၄၇နှစ်) နှင့် ဒေါ်မော်(၄၉နှစ်) တို့နှစ်ဦး သေဆုံးခဲ့ရကြောင်း သိရသည်။
“သူတို့(စစ်တပ်)က ရွေးကောက်ပွဲကိုဦးတည်ပြီး အခုလိုပြည်သူတွေကိုပါ ပိုဖိနှိပ်လာတာ။ အုတ်ဖို၊ ကြို့ပင်ကောက် ဘက်ကရွာတွေကို ဝိုင်းရဲစခန်း နဲ့အလယ်ကုန်းရဲစခန်းကကောင်တွေက ဒရုန်းတွေသုံးပြီး ပစ်နေတာ။ ကြို့ပင်ကောက်ဘက်က တော်လှန်ရေးဘက်အားကောင်းတော့ တော်လှန်ရေးတပ်ဖွဲ့တွေ ရှိလောက်မယ်ထင်တဲ့ရွာတွေကို လိုက်ပစ်နေတာ” ဟု သာယာဝတီခရိုင်အခြေစိုက် တော်လှန်ရေး တပ်ဖွဲ့ဝင်တစ်ဦးက ဧရာဝတီတိုင်းမ်ကို ပြောသည်။
စစ်ကော်မရှင်သည် ၎င်းတို့၏ ရွေးကောက်ပွဲအပိုင်း(၁) ကို ပဲခူးတိုင်းအနောက်ခြမ်းတွင် ပြည်၊ ရွှေတောင်၊ နတ်တလင်း၊ လက်ပံတန်း၊ သာယာဝတီမြို့နယ်တို့တွင် ကျင်းပသွားမည်ဖြစ်ကြောင်း ကြေညာထား ကြောင်း သိရသည်။
ထို့သို့ လေကြောင်းတိုက်ခိုက်မှုအပြင် မင်းလှမြို့နယ်တွင်လည်း လက်နက်ကြီးဖြင့် ရမ်းသန်းပစ်ခတ် ခြင်းများကို ဆက်တိုက် ပြုလုပ်နေပြီး ပြီးခဲ့သည့်ဩဂုတ် ၂၇ ရက်နေ့တွင် စမ်းဘုတ်ရွာမှ ကိုဖိုးပါ ဆိုသူမှာ စစ်တပ်မှထောင်ထားသည့် မြေမြှုပ်မိုင်းနင်းမိခြင်းကြောင့် ခြေထောက်ပြတ်ထွက် ထိခိုက်ခဲ့ရကြောင်း လည်း သိရသည်။
စစ်ကော်မရှင်တပ်ဖွဲ့များသည် ပြီးခဲ့သည့် ဩဂုတ် ၁၉ ရက်နေ့ကလည်း ပဲခူးတိုင်း အနောက်ခြမ်း မြို့နယ်တစ်ခုဖြစ်သည့် ပေါက်ခေါင်းမြို့နယ်တွင် စက်တပ်လေထီးဖြင့် ဗုံး ၁၂ လုံးကြဲချတိုက်ခိုက်ခဲ့ရာ သားအဖ နှစ် ဦးသေဆုံးခဲ့ကြောင်း သိရသည်။
လက်ရှိတွင် စစ်ကော်မရှင်သည် အရပ်သားများကို ပစ်မှတ်ထားကာ လေကြောင်းတိုက်ခိုက်မှုများကို ပိုမိုလုပ်ဆောင်လာပြီး ၎င်းတို့တိုက်ခိုက်မှုများကြောင့် ပြီးခဲ့သည့် ဩဂုတ် ၁၅ ရက်မှ ၂၈ ရက်အတွင်း အရပ်သား ၉၁ ဦးအထိသေဆုံးကာ ၁၅၀ ဦးနှင့်အထက် ထိခိုက်ဒဏ်ရာရရှိခဲ့ကြောင်း ဉာဏ်လင်းသစ် သုတေသနအဖွဲ့အစည်း ထုတ်ပြန်ချက်များအရ သိရသည်။
ဓာတ်ပုံ – ပေးပို့
