ဧရာဝတီတိုင်းမ်
ဩဂုတ် ၃၀ ရက်
ကျောက်ဖြူမြို့နယ်တွင် စစ်ကော်မရှင်၏ စစ်သင်္ဘောတစ်စင်းကို အာရက္ခတပ်တော် (AA) က ဟောင်ဝစ်ဇာလက်နက်ကြီးဖြင့် ပစ်ခတ်လိုက်သည့်အတွက် မီးလောင်ပြီး ထွက်ပြေးသွားရကြောင်း သိရသည်။
ကျောက်ဖြူမြို့နယ်၊ င/အုပ်ကျေးရွာနှင့်ကျောက်ကလေးကျေးရွာကြားတွင် ကမ်းခြေနှင့် မီတာ ၁၀၀၀၀ ခန့်အကွာ ပင်လယ်ပြင်အတွင်းရှိ စစ်ကော်မရှင်၏ စစ်သင်္ဘောကို ယမန်နေ့ ဩဂုတ် ၂၉ ရက် ညနေ ၅ နာရီ ၃၀ မိနစ်တွင် AA တပ်ဖွဲ့က ပစ်ခတ်တိုက်ခိုက်ခဲ့ခြင်းဖြစ်ကြောင်း သိရသည်။
“မာန်အောင်ကျွန်းနဲ့ ရမ်းဗြဲကျွန်းကြားမှာ ဩဂုတ် ၂၉ ရက်နေ့ ညနေ ၅ နာရီခွဲခန့်မှာ အာရက္ခတပ်တော် ကမ်း ခြေစောင့်တပ်က ထိမှန်အောင် ပစ်ခတ်တိုက်ခိုက်ခဲ့ပါတယ်”ဟု AA ၏ ပြောရေးဆိုခွင့်ရှိသူ ဦးခိုင်သုခက ပြောဆိုထားသည်။
ပစ်ခတ်ခံရ၍ မီးလောင်းသွားသည့် သင်္ဘောမှာ Frigate အမျိူးအစား ဟုတ်မဟုတ်ကိုမူ အတည်ပြုနိုင်ခြင်းမရှိသေးသော်လည်း အကြီးစားစစ်သင်္ဘောအမျိုးအစားဖြစ်ပြီး သင်္ဘောတွင် ပါလာသူများကို အခြားသင်္ဘောတစ်စီးပေါ်သို့ ရွှေ့ပြောင်းပေးခဲ့ကြောင်း သိရသည်။
ပစ်ခတ်ခံရသည့် သင်္ဘောမှာ စစ်ကော်မရှင်၏ Frigate အမျိုးအစား ရေတပ်သင်္ဘောကြီး ခြောက်စင်း အနက်မှ တစ်စင်းဖြစ်နိုင်ပြီး အမေရိကန်ဒေါ်လာ သန်း ၇၀ အထက် ဆုံးရှုံးနိုင်ကာ စစ်ကော်မရှင်၏ ကြီးမားသည့် ဆုံးရှုံးမှုဖြစ်နိုင်ကြောင်း သုံးသပ်သူအချို့က ဆိုသည်။
ပြီးခဲ့သည့် ဩဂုတ် ၁၀ ရက်နေ့ကလည်း ရခိုင်-ဧရာဝတီအစပ်ရှိ ကျောက်ချွန်နှင့် ဘောမိအကြားတွင် စစ် ကော်မရှင်၏ စစ်သင်္ဘောတစ်စင်းကို လက်နက်ကြီးဖြင့် ပစ်ခတ်ခဲ့ရာ မီးလောင်ပြီး ကမ်းခြေ တစ်လျှောက်မောင်းပြေးသွားကြောင်း သိရသည်။
ပုံစာ-ပင်လယ်ပြင်တွင် စစ်ရေးလေ့ကျင့်နေသော စစ်ကော်မရှင်တပ်၏ စစ်ရေယာဉ်များကို တွေ့ရစဉ် (ပုံဟောင်း)
