ဧရာဝတီတိုင်းမ်
ဩဂုတ် ၃၀ ရက်
ဧရာဝတီတိုင်း၊ ဘိုကလေးမြို့နယ်တွင် ကျေးရွာအုပ်ချုပ်ရေးမှူးနှင့် စစ်တပ်က သေနတ်ပစ်ဖောက်ခြောက်လှန့်ပြီး လူငယ်တစ်ဦးကို စစ်မှုထမ်းရန် ဖမ်းဆီးသွားကြောင်း ဒေသခံများထံက သိရသည်။
ဘိုကလေးမြို့နယ်၊ ဟေမာန်ကျေးရွာအုပ်စု၊ ကြိမ်ချောင်းကျေးရွာမှ မောင်သန်းမင်း အသက် ၂၅ နှစ်ဝန်းကျင်ကို စစ်မှုထမ်းရန်အတွက် ဩဂုတ် ၂၅ ရက်ည ၁၀ နာရီဝန်းကျင်တွင် ကျေးရွာအုပ်ချုပ်ရေးမှူးနှင့် စစ်တပ်က ဝင်ရောက်ဖမ်းဆီးသွားခြင်းဖြစ်ကြောင်း ဒေသခံများကပြောသည်။
“အုပ်ကြီးနဲ့ စစ်သားတွေက သေနတ်ပစ်ဖောက်ပီး လာဖမ်းသွားတာ။ အုပ်ကြီးဦးသိန်းနိုင်နှင့်အဖွဲ့က အုပ်ချုပ်ရေးမှူးရုံးမှာ မဲနှိုက်ပီး ကာယကံရှင်မသိပဲ ညအချိန်မှလာရောက်ဖမ်းဆီးသွားတာ။ မထင်ရင်မထင်သလိုမဲနှိုက်ပီး စစ်တပ်နဲ့ စိတ်တိုင်းကျလုပ်နေကြတာ”ဟုဟေမာန်ကျေးရွာအုပ်စုရှိ ဒေသခံတစ်ဦးက ဧရာဝတီတိုင်းမ်ကိုပြောသည်။
စစ်မှုထမ်းရန်ဖမ်းဆီးခံရသည့် မောင်သန်းမင်းတွင်ကိုယ်ဝန်ဆောင်ဇနီးသည်ကျန်ရှိခဲ့ကြောင်း ဒေသခံများကပြောသည်။
ဟေမာန်ကျေးရွာအုပ်စုတွင် ကျေးရွာပေါင်း ၂၄ ရွာရှိပြီး စစ်မှုထမ်းအတွက် အကျုံးဝင်သူများအား တစ်လလျှင် ကျပ်ငွေရှစ်သောင်းလစဥ်ထည့်နေရပြီး စစ်မှုထမ်းအတွက် လူဝယ်ရသည်ဟုဆိုကာ အုပ်ချုပ်ရေးမှူးက အဆမတန်တောင်းယူနေသည်ဟု ဒေသခံများပြောဆိုချက်အရသိရသည်။
ဧရာဝတီတိုင်းအတွင်း ၂၆ မြို့နယ်ရှိပြီး စစ်ကော်မရှင်က ခန့်အပ်ထားသည့် အုပ်ချုပ်ရေးမှူးအများစုသည် စစ်မှုထမ်းဥပဒေကို အကြောင်းပြကာ ယခင်ကထက် ပိုမိုငွေတောင်းယူလာကြပြီး ကိုယ်ကျိုးအတွက် အသုံးပြုနေကြောင်း ဒေသခံများက ပြောသည်။
