ဧရာဝတီတိုင်းမ်
ဩဂုတ် ၃၀ ရက်
အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနသည် ၎င်း၏လက်အောက်ခံ တပ်ရင်း၊ တပ်ဖွဲ့များတွင် အသက် ၁၈ နှစ် မပြည့်သေးသော ကလေးသူငယ်များကို စစ်မှုမထမ်းခိုင်းရန် ညွှန်ကြားချက်ထုတ်ပြန်လိုက်ပြီး ယင်းညွှန်ကြားချက်ကို ဖောက်ဖျက်ပါက ဥပဒေနှင့်အညီ အရေးယူ သွားမည်ဟုလည်း သတိပေးထားသည်။
စစ်အာဏာရှင်စနစ်ကြောင့် လက်နက်စွဲကိုင် တော်လှန်ရေးတွင် ပါဝင်ခဲ့ကြသည့် ဒေသကာကွယ် ရေးအဖွဲ့များ NUG ကွပ်ကဲမှုအောက်သို့ ဝင်ရောက်လာချိန်တွင် ကလေးသူငယ်များ ပါဝင်လာနိုင်သောကြောင့် ယခုကဲ့သို့ ညွှန်ကြားချက် ထုတ်ပြန်ခဲ့ခြင်းဖြစ်ကြောင်း သိရသည်။
ညွှန်ကြားချက်အရ NUG ကာကွယ်ရေးဝန်ကြီးဌာနသည် ကလေးသူငယ်များကို စိစစ်ပြီး ၎င်းတို့၏ မိဘအုပ်ထိန်းသူများထံ ပြန်လည်အပ်နှံခြင်း၊ ပညာသင်ကြားခွင့်ရရှိရန် သက်ဆိုင်ရာအဖွဲ့အစည်းများနှင့် ပေါင်းစပ်ဆောင်ရွက်ပေးခြင်းတို့ကို လုပ်ဆောင်သွားမည်ဖြစ်သည်။
အဆိုပါ ညွှန်ကြားချက်တွင် ၂၀၁၉ ခုနှစ် ကလေးသူငယ်အခွင့်အရေးများဆိုင်ရာ ဥပဒေနှင့် CRC-OPAC စာချုပ်ပါ ပြဌာန်းချက်များအတိုင်း NUG တွင် ကလေးစစ်သားများ မရှိစေရန် အဓိကထား ဆောင်ရွက်သွားမည်ဟုလည်း ဖော်ပြထားသည်။
ကလေးစစ်သားများ အသုံးပြုမှုကို ဖောက်ဖျက်ကျူးလွန်ပါက စစ်ဘက်ဆိုင်ရာဥပဒေ၊ လုပ်ထုံးလုပ်နည်း များနှင့်အညီ စစ်ဆေးအရေးယူသွားမည်ဖြစ်ကြောင်းလည်း NUG ၏ ထုတ်ပြန်ချက်တွင် ပါရှိသည်။
ဓာတ်ပုံ – NUG
