ဧရာဝတီတိုင်းမ်
ဩဂုတ် ၃၀ ရက်
တုံကင်ပင်လယ်ပြင်တွင် ဖြစ်ပေါ်နေသည့် အပူပိုင်းမုန်တိုင်း ‘နောင်ဖ’ အရှိန်ကြောင့် ဩဂုတ်လ ၃၁ ရက်မှ စက်တင်ဘာလ ၃ ရက်နေ့အတွင်း မြန်မာနိုင်ငံရှိ တိုင်းနှင့်ပြည်နယ် ၇ ခုတွင် မိုးကြီးမည်ဟု မိုးလေဝသနှင့် ဇလဗေဒညွှန်ကြားမှုဦးစီးဌာန (မိုး/ဇလ) က သတိပေးထားသည်။
အဆိုပါမုန်တိုင်းသည် ဗီယက်နမ်နိုင်ငံကမ်းခြေကို ဖြတ်ကျော်ပြီး လာအိုနိုင်ငံပေါ်သို့ ရောက်ရှိချိန်တွင် အပူပိုင်းမုန်တိုင်းငယ်အဖြစ် အားလျော့သွားမည်ဖြစ်သော်လည်း ၎င်း၏အရှိန်ကြောင့် နေပြည်တော်၊ ရန်ကုန်၊ ပဲခူး၊ မကွေး၊ တနင်္သာရီတိုင်း၊ ကယား၊ ကရင်နှင့် မွန်ပြည်နယ်တို့တွင် နေရာကွက်၍ မိုးကြီးနိုင်ကြောင်း မိုး/ဇလ က ယနေ့ ဩဂုတ် ၃၀ ရက်တွင် ထုတ်ပြန်သည်။
ထို့အပြင် ကျန်ရှိသော မန္တလေးတိုင်း၊ စစ်ကိုင်းတိုင်း၊ ဧရာဝတီတိုင်း၊ ကချင်၊ ချင်းနှင့် ရှမ်းပြည်နယ်တို့တွင်လည်း နေရာအနှံ့အပြား မိုးထစ်ချုန်းရွာနိုင်သည်ဟု ဆိုထားသည်။
မုန်တိုင်းအရှိန်ကြောင့် မိုးသည်းထန်စွာရွာသွန်းခြင်း၊ လေပြင်းတိုက်ခတ်ခြင်း၊ လျှပ်စီးလက်ခြင်း၊ လျှပ်တစ်ပြတ်ရေကြီးခြင်းနှင့် မြေပြိုခြင်းတို့ ဖြစ်ပေါ်နိုင်သဖြင့် သတိပြုရန်လိုကြောင်း မိုး/ဇလ က သတိပေးထားသည်။
မြန်မာ့ကမ်းရိုးတန်းနှင့် ကမ်းလွန်ပင်လယ်ပြင်တို့တွင်လည်း ရံဖန်ရံခါ မိုးသက်လေပြင်းများ ကျရောက်ပြီး လှိုင်းကြီးနိုင်ကာ လေတိုက်နှုန်းမှာ တစ်နာရီလျှင် ၃၅ မိုင်အထိရှိနိုင်ပြီး လှိုင်းအမြင့်မှာ ၁၀ ပေမှ ၁၂ ပေအထိရှိနိုင်ကြောင်း ထုတ်ပြန်ချက်တွင် ဖော်ပြထားသည်။
ပြီးခဲ့သည့်ရက်ပိုင်းအတွင်းက အပူပိုင်းမုန်တိုင်း ‘ကာကျိကိ’ အရှိန်ကြောင့်လည်း မြန်မာနိုင်ငံအတွင်း မိုးကြီးပြီး အချို့မြို့နယ်များတွင် ရုတ်တရက်ရေကြီးရေလျှံမှုများ ဖြစ်ပေါ်ခဲ့သည်။
ဓာတ်ပုံ – မိုး/ဇလ
