ဧရာဝတီတိုင်းမ်
ဩဂုတ် ၃၀ ရက်
စစ်ကော်မရှင်က ကျင်းပမည့် ရွေးကောက်ပွဲအတွက် ရန်ကုန်မြို့၌ မြန်မာအီလက်ထရောနစ်မဲပေးစက် (MEVM) ဖြင့် စမ်းသပ်မဲပေးမှုလုပ်ငန်းများ စတင်နေပြီး ၎င်းစနစ်တွင် မဲခလုတ်ဖွင့်ပေးသူက စိတ်ကြိုက်မဲခိုးယူနိုင်သည်ကို တွေ့ရှိရကြောင်း သိရသည်။
ပြီးခဲ့သည့် ဩဂုတ် ၂၅ ရက်မှ ၂၉ ရက်အတွင်း မရမ်းကုန်းခရိုင်ရှိ လှိုင်နှင့် မြောက်ဥက္ကလာပမြို့နယ်၊ ကျောက်တံတားခရိုင်ရှိ ပန်းဘဲတန်းမြို့နယ်တို့တွင် အများပြည်သူများကို MEVM မဲပေးစက်ဖြင့် စမ်းသပ်မဲပေးစေခဲ့ကြောင်း ယင်းမြို့နယ်တွင် နေထိုင်သူများထံမှ သိရသည်။
အဆိုပါစနစ်တွင် မဲပေးရာ၌ ဆန္ဒပြုစက် (Ballot Unit)၊ ထိန်းချုပ်စက် (Control Unit) နှင့် မဲပေးချက် ဖော်ပြသည့်စက် ((Verification Unit) တို့ ပါဝင်ရာ ထိန်းချုပ်စက်ကိုင်တွယ်သူ (မဲရုံမှူး သို့မဟုတ် အဖွဲ့ဝင်) က မဲခလုတ်ကို ဖွင့်ပေးမှသာ မဲပေးနိုင်သောကြောင့် စိတ်ကြိုက်မဲများ ဖန်တီးနိုင်သည်ဟု စနစ်ကို ကိုယ်တိုင်လေ့လာခဲ့သူများက ဆိုသည်။
“သူတို့ပြောတာဆို အဲ့ဒီစနစ်အရ ပယ်မဲမရှိဘူး။ ခလုတ်ဖွင့်ပေးတဲ့လူက ဖွင့်ပေးသလောက်နှိပ်ရင် ရနိုင်တယ်။ မဲစာရင်းရှိတဲ့လူဦးရေနဲ့ မဲရုံရောက်တဲ့လူနဲ့ကြည့်မယ်ဆိုရင် ၁၀ ယောက်မှာ လေးယောက် ပဲလာရင် ကျန်တဲ့ ခြောက်ယောက်အတွက်မဲခိုးပေးလို့ရနိုင်တယ်။ စက်က ခလုတ်ဖွင့်တိုင်း မဲပေးလို့ ရနေတာ။ မဲစာရင်းမှန်၊ မမှန်စစ်ပေးတဲ့သူတော့ရှိမယ်” ဟု လှိုင်မြို့နယ်တွင် မဲပေးစက်ကို ကိုယ်တိုင် လေ့လာခဲ့ရသူက ဧရာ၀တီတိုင်းမ်ကို ပြောသည်။
စစ်ကော်မရှင်ကျင်းပမည့် ရွေးကောက်ပွဲနှင့်ပတ်သက်ပြီး ရွေးကောက်ပွဲစောင့်ကြည့်လေ့လာရေး အဖွဲ့ အစည်းများမရှိနိုင်ခြင်း၊ ရွေးကောက်ပွဲဝင်ပြိုင်မည့်ပါတီများ၏ လုပ်နိုင်ကိုင်နိုင်စွမ်းအားနည်းခြင်းတို့ ကြောင့် မဲရုံစောင့်ကြည့်မှုလည်းအားနည်းနိုင်ကြောင်း နိုင်ငံလေ့လာသူတစ်ဦးက သုံးသပ်ပြောကြား သည်။
လက်ရှိတွင် MEVM မဲပေးစပ်အသိပညာပေးခြင်းနှင့် လက်တွေ့စမ်းသပ်မဲပေးခြင်းတို့ကို မြို့နယ်စီမံ ခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌနှင့် အဖွဲ့ဝင်များ၊ မြို့နယ်ရွေးကောက်ပွဲကော်မရှင်အဖွဲ့ခွဲ ဥက္ကဋ္ဌနှင့် အများယုံကြည်အဖွဲ့ဝင်(၃)ဦး၊ ရပ်ကွက်အုပ်ချုပ်ရေးမှူးနှင့်အဖွဲ့ဝင်တို့ပါဝင်ပြီး ပြုလုပ်နေ ကြောင်းသိရသည်။
“ မဲပေးဖို့ဆိုရင် မှတ်ပုံတင်ပါရမယ်။ (Ballot Unit) ဆန္ဒပြုစက်နားသွားပြီး ခလုတ်နှိပ်ရုံပဲ။ ပါတီ ဘေးခလုတ်နှိပ်ရတာဆိုတော့ ပယ်မဲမရှိဘူး။ တစ်ခုရှိတာကစက်ထိန်းချုပ်တဲ့သူ မဲခလုတ်နှိပ်ဖို့ မီးစိမ်း ပြမှ နှိပ်ရမယ်။ ဆိုလိုတာက ခွင့်ပြချင်နဲ့ပဲ မဲပေးလို့ရတယ်။ ပေးလိုက်တာက ဟိုဘက်စက်မှာ မဲအရေ အတွက် တစ်ခါတည်းပေါ်တယ်” ဟု မဲရုံစက်ကိုင်သင်တန်းတက်သူတစ်ဦးက ပြောကြားသည်။
စစ်ကော်မရှင်သည် ၎င်းတို့ ကျင်းပမည့် တရားမျှတမှုမရှိဟု ဝေဖန်ခြင်းခံနေရသည့် အတုအယောင် ရွေးကောက်ပွဲကို လာမည့် ဒီဇင်ဘာ ၂၈ ရက်နေ့အတွင် အပိုင်း(၁) အနေဖြင့်စတင်ကျင်းပမည်ဖြစ်ပြီး ရန်ကုန်တိုင်းတွင် မြို့နယ် ၁၂ မြို့ဖြင့် စတင်ကျင်းပရန် သတ်မှတ်ထားသည်။
ဓာတ်ပုံ – လူမှုကွန်ရက်၊ MOI
