TNLA ထိန်းချုပ်ထားသည့် နောင်ချို-ကျောက်မဲလမ်းပိုင်းနှင့် ဂုတ်ထိပ်တစ်ဝိုက်ကို စစ်ကော်မရှင်က ပြန်လည်ထိန်းချုပ်ဟုဆို

ဧရာဝတီတိုင်းမ်
ဩဂုတ် ၃၀ ရက်

တအာင်းအမျိုးသားလွတ်မြောက်ရေးတပ်မတော် (TNLA) ထိန်းချုပ်ထားသည့် ရှမ်းမြောက်ရှိ နောင်ချို- ကျောက်မဲမြို့လမ်းပိုင်းရှိ ကျေးရွာအချို့နှင့် ဂုတ်ထိပ်တစ်ဝိုက်ကို စစ်ကော်မရှင်က ပြန်လည်သိမ်းပိုက်နိုင်ခဲ့ကြောင်း ထုတ်ပြန်ထားသည်။

နောင်ချို-ကျောက်မဲမြို့ကြားရှိ ခဲတုံကြိုင်၊ ကောင်းပို၊ ထန်းတပင်၊ ပန်တိ၊ နောင်ပိန်၊ ပင်ပေါ၊ ဇီးပင်၊ ကျောင်းကုန်းကျေးရွာများနှင့် စန္ဒမုနိကျောင်းတိုက်၊ နောင်ပစ်လမ်းခွဲအပါအဝင် ဂုတ်တွင်းနှင့် ဂုတ်ထိပ်တစ်ဝိုက်ကို စစ်ကော်မရှင်က ပြန်လည်သိမ်းယူနိုင်ခဲ့ကြောင်း ယနေ့ ဩဂုတ် ၃၀ ရက်နေ့ထုတ် ၎င်းတို့၏ ဝါဒဖြန့် သတင်းစာများတွင် ဖော်ပြထားသည်။

စစ်ကော်မရှင်က နောင်ချိုကိုပြန်လည်သိမ်းပိုက်ပြီးနောက် နောင်ချို-ဂုတ်တွင်းလမ်းကြောင်းနှင့် နောင်ချို- ဂုတ်ထိပ်မီးရထားလမ်းကြောင်းများကို စစ် ကြောင်းနှစ်ကြောင်းခွဲ၍ တိုက်ခိုက်ခဲ့ခြင်းဖြစ်ကြောင်း သိရသည်။

လက်ရှိတွင် စစ်ကော်မရှင်တပ်က နောင်ပိန်မြို့တွင်း ရွာမကြီးအထိရောက်ရှိနေပြီဖြစ်ကြောင်း ဒေသခံအချို့ထံမှ သိရသည်။

အဆိုပါလမ်းပိုင်းနှင့် ကျေးရွာအချို့ လက်လွှတ်လိုက်ရသည့် အခြေအနေနှင့်ပတ်သက်ပြီး TNLA ဘက်မှ တရားဝင်ထုတ်ပြန်ကြေညာခြင်းမရှိသေးပေ။

ဓာတ်ပုံ-စစ်ကော်မရှင်