ဧရာဝတီတိုင်းမ်
ဩဂုတ် ၂၉ ရက်
ထိုင်းနိုင်ငံ၊ ဆူရင်ခရိုင်တွင် တရားမဝင်နေထိုင်မှုဖြင့် တိုင်ကြားဖမ်းဆီးခြင်းခံခဲ့ရသည့် အသက် ၁၃ နှစ်အရွယ် ကမ္ဘောဒီး ယားကျောင်းသားကို ကျောင်းရှိ ဆရာ၊ ဆရာမများ၏ ကာကွယ်ပြောဆို မှုဖြင့်ကမ္ဘောဒီးယားနိုင်ငံသို့ ပြန်ပို့ခံရမည့်အရေးမှ ကယ်တင်နိုင်ခဲ့ ကြောင်းသိရသည်။
နှစ်နိုင်ငံတိုက်ပွဲဖြစ်ပွားခဲ့သည့် ဆူရင်ခရိုင်ရှိ ကျောင်းတစ်ကျောင်းမှ ကမ္ဘောဒီးယားကလေးတစ်ဦးမှာ ကျောင်းအလံတင်အခမ်းအနားပြီးချိန်တွင် ရဲတပ်ဖွဲ့၏ ဖမ်းဆီးခြင်းကိုခံခဲ့ရကာ ၎င်း၏ဆရာမဖြစ်သူက ဆိုရှယ်မီဒီယာတွင် တင်ခဲ့သည့် ပို့စ်မှာ ပျံ့နှံ့မှုအားကောင်းခဲ့ပြီး လူအများမှလည်း ရဲတပ်ဖွဲ့အပေါ် ဝေဖန်မှုများပြုလုပ်ခဲ့ကြသည်။
“ဒီသတင်းကို ပေးပို့တဲ့သူက ညမှာကောင်းကောင်းအိပ်နိုင်ပါပြီ။ ၁၃ နှစ်အရွယ်ကလေးကို မင်းဘာလုပ်ခဲ့လဲကြည့်လိုက်ပါ။ မင်းက သူ့ကို သူ့ရဲ့မိသားစု၊ သူရဲ့သူငယ်ချင်း၊ သူ့ရဲ့ဆရာ ဆရာမ တွေဆီကနေ ဆွဲထုတ်လိုက်တာ။ ဒီလို စုန်းဖမ်းပွဲ (အပြစ်ရှာခြင်း)လုပ်နေတာကို ရပ်လိုက်ပါ” ဟု ကမ္ဘောဒီးယားကလေးငယ်၏ ဆရာမက လူမှုကွန်ရက်စာမျက်နှာတွင် ရေးသားခဲ့သည်။
အဆိုပါ ကမ္ဘောဒီးယားကလေးငယ်မှာ အသက် ၃ နှစ်အရွယ်တွင်ပင် အမေဖြစ်သူနှင့် ထိုင်းနိုင်ငံ အတွင်းနေထိုင်ခဲ့ခြင်းဖြစ်ကာ တရားမဝင်နေထိုင်သည်ဟုဆိုကာ ၎င်းမရင်းနှီးခဲ့သည့် ကမ္ဘောဒီးယား နိုင်ငံသို့ ပြန်ပို့ရန် ဖမ်းဆီးခံရခြင်းဖြစ်သည်။
အဆိုပါလုပ်ဆောင်မှုသည် ကလေးသူငယ်အခွင့်ရေးဆိုင်ရာ သဘောတူညီချက်ကို ချိုးဖောက်ခဲ့ ခြင်းဖြစ်ပြီး တိုက်ခိုက်မှုဖြစ်ပွားနိုင်ချေမရှိသည့် ကလေးငယ်တစ်ဦးကို ဝရမ်းမပါပဲဖမ်းဆီးခြင်းကို ကန့်ကွက်ကြောင်းလည်း လူ့အခွင့်အရေးတက်ကြွလှုပ်ရှားသူများနှင့် ပညာရှင်များက ပြောဆိုခဲ့ကြသည်။
“ဒီကလေးက ကျွန်မတို့ ကျောင်းသား၊ ကျွန်မတို့ကလေးပဲ၊ ကျွန်မတို့သူ့ကိုချစ်တယ်။ ကျွန်မတို့က ဆရာအနေနဲ့ သူ့အပေါ်ဂရုစိုက်တဲ့ အငှားမိဘအနေနဲ့ စကားပြောနေတာ၊ ကျွန်မတို့ ဥပဒေအကြောင်း ပြောနေတာမဟုတ်ဘူး” ဟု ကျောင်းဒါရိုက်တာဖြစ်သူကလည်း ပြောဆိုခဲ့သည်။
ထိုင်းနိုင်ငံယာယီဝန်ကြီးချုပ်အဖြစ်တာဝန်ယူထားသည့် ဖမ်သန်ဝီချာရတ်ချိုင်းကလည်း ညှိနှိုင်းရန် အမိန့်ပေးခဲ့ပြီး ပြည်ထဲရေးဝန်ကြီးဌာန၊ ပညာရေးဝန်ကြီးဌာန၊ လူမှုဖွံ့ဖြိုးရေးနှင့် လူ့သားလုံခြုံရေးဌာန စသည့် အစိုးရဝန်ကြီးဌာနအများအပြားက ကမ္ဘောဒီးယား ကလေးငယ်နှင့် မိခင်ကို ကြားဝင်ကူညီခဲ့ကြ၍ ယခုအခါ ၎င်းတို့နေရပ် ထိုင်းနိုင်ငံ ဆူရင်ခရိုင်သို့ ပြန်ပို့ခဲ့ပြီဖြစ်ကြောင်း သိရသည်။
ရဲတပ်ဖွဲ့ဘက်ကမူ ၎င်းတို့မှာ တရားမဝင် ရွှေ့ပြောင်းနေထိုင်သူများကို တိုင်ကြားချက်များအရ ဆောင်ရွက်ခြင်းသာ ဖြစ်ကြောင်း ဖြေရှင်းခဲ့သည်။
ကိုးကား – Khaosod English
