ဧရာဝတီတိုင်းမ်
ဩဂုတ် ၂၉ ရက်
ထိုင်းနိုင်ငံမှ ကမ္ဘောဒီးယားသို့ တင်ပို့ခြင်းမပြုနိုင်သည့် မွေးမြူရေးဝက်များ မြန်မာနိုင်ငံထဲသို့ ဝင်ရောက် လာမှုကြောင့် ဝက်သားဈေးနှုန်းများ တည်ငြိမ်နေသော်လည်း ပြည်တွင်းမွေးမြူရေးလုပ်ငန်းရှင်များက စိုးရိမ်ပူပန်မှုများ ဖြစ်ပေါ်နေကြောင်း သိရသည်။
နယ်စပ်ပြဿနာများကြောင့် ထိုင်း-ကမ္ဘောဒီးယားနယ်စပ်ဂိတ်ကို ဇွန်လမှစတင်ကာ ပိတ်ထားသဖြင့် ကမ္ဘောဒီးယားသို့ အဓိကတင်ပို့နေသည့် ထိုင်းဝက်အကောင်လိုက်တင်ဆောင်လာသော ကားများစွာ မြန်မာနိုင်ငံထဲသို့ ဝင်ရောက်လာကြောင်း သိရသည်။
ယခုအခါ အခြားသားငါးနှင့် ကုန်စည်များ ဈေးတက်နေချိန်တွင် ဝက်သားဈေးနှုန်းမှာမူ ယခင်ဈေး အမြင့်တွင်သာ တည်ငြိမ်နေပြီး ရန်ကုန်မြို့တွင် တစ်ပိဿာလျှင် ကျပ် ၃၅,၀၀၀ မှ ၄၀,၀၀၀ ကြားရှိကြောင်း ရန်ကုန်မြို့ရှိ သားငါးဈေးဆိုင်များထံမှ သိရသည်။
စစ်ကော်မရှင်၏ ကုန်သွယ်ရေးလမ်းကြောင်းများ ပိတ်ဆို့မှုကြောင့် မွေးမြူရေးအစာစရိတ်များ မြင့်တက်နေချိန်တွင် ထိုင်းဝက်များ ဝင်ရောက်လာမှုကြောင့် ပြည်တွင်းဝက်မွေးမြူရေးလုပ်ငန်းများ ပိုမိုအခက်အခဲဖြစ်နိုင်ကြောင်း မွေးမြူရေးလုပ်ကိုင်သူများက ပြောသည်။
လက်ရှိတွင် စစ်ကော်မရှင်သည် နယ်စပ်ကုန်သွယ်ရေးလမ်းကြောင်းအတွင်း လူသုံးကုန်ပစ္စည်းများ၊ စက်မှုကုန်ကြမ်းသုံးပစ္စည်းများ ဝင်ရောက်မှုကို ဖမ်းဆီးပြီး လိုင်စင်ရှိမှသာ တင်သွင်းရန် တင်းကျပ်စွာ စစ်ဆေးလျက်ရှိသည်။
ဓာတ်ပုံ – လူမှုကွန်ရက်
