ဧရာဝတီတိုင်းမ်
ဩဂုတ် ၂၉ ရက်
ရခိုင်ပြည်နယ်၊ ကျောက်ဖြူမြို့နယ်တွင် စစ်ကော်မရှင်တပ်နှင့် အာရက္ခတပ်တော် (AA) တို့ တိုက်ပွဲများ ပြင်းထန်နေပြီး AA ၏ တန်ပြန်ထိုးစစ်များကြောင့် စစ်ကော်မရှင်တပ်များက တပ်စွဲထားသည့်နေရာ အချို့ကို လက်လွှတ်ကာ နောက် ဆုတ်ပေးနေရကြောင်း သိရသည်။
လိပ်ခမော်ကျေးရွာတွင် တပ်စွဲပြီး ထိုးစစ်ဆင်နေသည့် စစ်ကော်မရှင်တပ်ကို AA က တန်ပြန်ထိုးစစ်ဖြင့် ယမန်နေ့ ဩဂုတ် ၂၈ ရက်နေ့တွင် တိုက်ခိုက်ရာ စစ်ကော်မရှင်တပ်များက တပ်ဆုတ်ထွက်ပြေး ရကြောင်း ဒေသတွင်းသတင်းရင်းမြစ်များထံမှ သိရသည်။
“တိုက်ပွဲက ပြန့်နေတာပါ။ ပြီးခဲ့တဲ့ရက်ပိုင်းက စစ်ကြောင်းနှစ်ကြောင်း နောက်ဆုတ်ခဲ့ရတယ်။ အခု လိပ်ခမော်ကပါ ထပ်ဆုတ်ပေးရတယ်” ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
ပြီးခဲ့သည့် ဇူလိုင်လအတွင်း AA က လက်လွှတ်ခဲ့ရသည့် ပျားတဲ၊ သပြုတောင်၊ မလကျွန်းနှင့် လိပ်ခမော် ကျေးရွာများကို စစ်ကော်မရှင်တပ်က စစ်ကြောင်းထိုးပြီး ပြန်လည်နေရာဝင်ယူခဲ့သည်။ AA သည် ဩဂုတ်လ ၂၆ရက်မှစတင်ကာ တပ်စွဲနေရာများကို လက်မလွှတ်တော့ဘဲ တန်ပြန်တိုက်စစ်ဖြင့် တိုက်ခိုက်ခဲ့သည့်အတွက် စစ်ကော်မရှင်တပ်များ နောက်ဆုတ်ပေးနေရကြောင်း သိရသည်။
စစ်ကြောင်း လေးကြောင်းဖြင့် ထိုးစစ်ဆင်နေသည့် စစ်ကော်မရှင်တပ်မှာ ၃၂ ရဲတပ်ရင်းနှင့် သပြုတောင် အထိ ပြန်ဆုတ်ပေးခဲ့ရပြီးနောက် လိပ်ခမော်ကိုပါ လက်လွှတ်လိုက်ရပြီဖြစ်ကြောင်း သိရသည်။
မင်းတပ်တောင်ကိုထိုးစစ်ဆင်နေသည့် စစ်ကော်မရှင်အဖွဲ့မှာလည်း ပိတ်ဆို့တိုက်ခိုက်ခံနေရပြီး စစ်ကောင်စီအရာရှိပိုင်းများ AAစနိုက်ပါလက်ချက်ဖြင့် ထိခိုက်သေဆုံးမှုများနေကြောင်း little rabbitထံမှ သိရသည်။
ပုံစာ-စစ်ကော်မရှင် တပ်ဖွဲ့ဝင်များ လိပ်ခမော်တွင် ဝင်ရောက်တပ်စွဲထားသည်ကို တွေ့ရစဉ်။
