ဧရာဝတီတိုင်းမ်
(မတူပီ)၊ ဩဂုတ် ၂၉ ရက်
ချင်းပြည်နယ်၊ မတူပီမြို့နယ်နှင့် ထန်တလန်မြို့နယ်အစပ် မရာဒေသတွင် မရာကာကွယ်ရေးတပ်ဖွဲ့ (MDF)နှင့် ချင်းကာကွယ်ရေးတပ်ဖွဲ့(မရာ)တို့အကြား ပြီးခဲ့သည့် ဇူလိုင်လ ၁၄ ရက်နေ့မှ စတင်၍ နှစ်ဖက်တိုက်ပွဲ ပြင်းထန်စွာ ဖြစ်ပွားခဲ့ကြောင်းသိရသည်။
မရာဒေသ၊ ငဖိုင်ပီးရွာအနီးတဝိုက်တွင် လက်ရှိအချိန်အထိ တိုက်ပွဲဖြစ်ပွားနေပြီး တိုက်ပွဲကြောင့် ဒေသခံအများအပြားစစ်ဘေးရှောင်နေရကြောင်းသိရသည်။
“ကျွန်တော်တို့ဘက်က လက်နက်ငယ် ဒဏ်ရာရ (မစိုးရိမ်ရ) နှစ်ယောက်ရှိတယ်။ MDF ဘက်က လေးယောက်သေပြီး ဒဏ်ရာရများတယ်။ အိန္ဒိယ ဘက်ကို ထွက်ပြေးသူလည်းများတယ်။ ကျန်တဲ့ သေဆုံးသူ(AAဟုယူဆ)တွေရှိပေမဲ့ သတင်းမထွက်တာတွေလည်းရှိတယ်။ ရှေ့တန်းက ရဲဘော်များ မျက်မြင်တွေ့တာရှိပါသေးတယ်” ဟု CDF-မရာ၏ အုပ်ချုပ်ရေးအဖွဲ့ဝင်တစ်ဦးက ဧရာဝတီတိုင်းမ်ကို ပြောသည်။
မရာကာကွယ်ရေးတပ်ဖွဲ့(MDF)နှင့် မဟာမိတ်ပူးပေါင်းတပ်တို့သည် CDF-မရာ၏ ဌာနချုပ်ကို သိမ်းပိုက်ရန်အတွက် အင်အားအလုံးအရင်းနှင့် ထိုးစစ်ဆင်လာမှုကြောင့် ပြန်လည်ခုခံရခြင်း ဖြစ်ကြောင်း ချင်းကာကွယ်ရေးတပ်ဖွဲ့-မရာ၏ ပြောကြားချက်အရ သိရသည်။
မရာဒေသ၌ မရာလက်နက်ကိုင်အချင်းချင်းဖြစ်ပွားသော တိုက်ပွဲတွင် အခြားတော်လှန်ရေးအင်အားစု များ ပါဝင်ပတ်သက်မှုရှိ/မရှိနှင့် တိုက်ပွဲအခြေတို့ကို မရာကာကွယ်ရေးတပ်ဖွဲ့(MDF)ထံ ဖုန်းဖြင့် အကြိမ်ကြိမ် ဆက်သွယ်ခဲ့သော် လည်း ဖုန်းလက်ခံဖြေကြားခြင်းမရှိပေ။
မရာကာကွယ်ရေးတပ်ဖွဲ့(MDF) ချင်းညီနောင် နှင့် အာရက္ခတပ်တော်(AA)တပ်ဖွဲ့ဝင်များသည် ချင်းကာကွယ်ရေးတပ်ဖွဲ့ (မရာ)၏ ဌာနချုပ်ကို သိမ်းပိုက်ရှင်းလင်းရန် ထိုးစစ်ဆင်လာခြင်းကြောင့် ပြည်သူများခရီးသွားလာခြင်းမပြုကြရန်၊ ပြည်သူ ငါး ဦးထက်ပိုသော လူစုလူဝေးမပြုလုပ်ကြရန်၊ ကျောင်းများယာယီပိတ်ထားကြရန်နှင့် အထူးသဖြင့် ဆော်မှိုန်တောင်ကြော၊ မရာဒေသရှိပြည်သူများ အထူးလိုက်နာပေးကြရန် CDF-မရာက ပြီးခဲ့သည့် ဩဂုတ်လ ၂၅ ရက်နေ့တွင်ထုတ်ပြန်ထားသည်။
ဓာတ်ပုံ-မရာကာကွယ်ရေးတပ်ဖွဲ့(MDF)
