ဧရာဝတီတိုင်းမ်
ဩဂုတ် ၂၉ ရက်
ကချင်ပြည်နယ်၊ ဗန်းမော်မြို့နယ်တွင် စစ်ကော်မရှင်နှင့် ကချင်လွတ်လပ်ရေးတပ်မတော် (KIA) ပူးပေါင်း တပ်များ တိုက်ပွဲပြင်းထန်နေပြီး စစ်ကော်မရှင်တပ်ဖွဲ့မှ စစ်ကြောင်းမှူး ဗိုလ်ကြီးခန့်ထက်နောင် သေဆုံး သွားကြောင်း သိရသည်။
ဗိုလ်ကြီးခန့်ထက်နောင်သည် ပြီးခဲ့သည့် ဩဂုတ်လ ၂၅ ရက်နေ့က ဗန်းမော်မြို့ တိုက်ပွဲအတွင်း KIA တပ်ဖွဲ့များ၏ ဒရုန်းဗုံးထိမှန်၍ သေဆုံးခဲ့ခြင်းဖြစ်ကြောင်း သိရသည်။
“အခု သေတဲ့သုံးပွင့်ဗိုလ်အပါအဝင် အခြားကျန်တဲ့ အရာရှိတွေကလည်းသေတယ်။ သုံးပွင့်ဗိုလ်ရဲ့ မှတ်တမ်းတွေ ရထားပါတယ်”ဟု စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
ခမရ ၃၁၉ မှ ဗိုလ်ကြီးခန့်ထက်နောင်သည် စစ်တက္ကသိုလ် အပတ်စဉ် (၆၁) ဆင်းဖြစ်ပြီး ဗန်းမော်မြို့သို့ တာဝန်ကျသည်မှာ နှစ်လဝန်းကျင်သာရှိသေး ကြောင်း သိရသည်။
၎င်းသည် ဗန်းမော်မြို့တွင် တာဝန်မကျခင် တနိုင်းဒကစ ဌာနချုပ်တွင် ရှိနေစဉ်က တော်လှန်ရေး တပ်ဖွဲ့များမှ ပူးပေါင်းရန်ညှိနှိုင်းသည်ကို ငြင်းဆိုခဲ့ကြောင်း သိရသည်။
ဗိုလ်ကြီးခန့်ထက်နောင်၏ နာရေးကို ကသာမြို့အတွင်းရှိ နေအိမ်တွင်ပြုလုပ်ခဲ့ပြီး မိသားစုဝင်များကို ပြင်ပသို့ သတင်းမပေါက်ကြားစေရန် စစ်ကော်မရှင်က ညွှန်ကြားထားကြောင်း သိရသည်။
ပြီးခဲ့သည့် ရက်ပိုင်းအတွင်းကလည်ယ ဗန်းမော်မြို့ ၅၀၁၄ သံချပ်ကာတပ်ရင်းမှ ခလရ ၂၃၆ သို့ စစ် ကြောင်းထိုးလာသည့် စစ်ကော်မရှင်တပ်ဖွဲ့များ နှစ်ဖွဲ့ကွဲကာ တစ်ဖွဲ့မှာ တပ်ရင်းလိုက် သေဆုံး သွားကြောင်း သိရသည်။
ဗန်းမော်မြို့ကို စစ်ကော်မရှင်၏ စစ်သင်္ဘောများရောက်ရှိလာပြီး လူအင်အား၊ လက်နက်ခဲယမ်းများ ပို့ဆောင်ပြီးနောက် တိုက်ပွဲများ ပြန်လည်ပြင်းထန်လာခြင်းဖြစ်သည်။
ပုံစာ-စစ်ကြောင်းမှူးဗိုလ်ကြီးခန့်ထက်နောင်။
