ဧရာဝတီတိုင်းမ်
ဩဂုတ် ၁၇ရက်
ရခိုင်ပြည်နယ်၊ ကျောက်ဖြူမြို့နယ်အတွင်းရှိ နေရာ ခုနစ်ခုထက်မနည်းတွင် စစ်ကော်မရှင်တပ်နှင့် အာရက္ခ တပ်တော် (AA) တို့ ထိတွေ့တိုက်ပွဲပြင်းထန်နေကြောင်း သိရသည်။
ယနေ့ ဩဂုတ် ၁၇ရက်နေ့တွင် ကျောက်ဖြူရှိ လိပ်ခမော်ရွာသစ်၊ ပြင်ရှည်၊ နှမ်းဖဲတောင်၊ မင်းတပ်တောင်၊ ပျားတဲ၊ သပြုတောင်၊ ကပ်သပြေ၊ ရှောက်ချောင်း၊ စည်မော်တို့၌ တိုက်ပွဲများပြင်းထန်နေကြောင်း ဒေသတွင်း သတင်းရင်းမြစ်များထံမှ သိရသည်။
”အင်အားအများကြီးသုံးပြီး စစ်တပ်ကစစ်ကြောင်းထိုးနေတယ်။ တစ်ပတ်လောက်တော့ရှိပြီ။ AA ကနောက်မဆုတ်တော့ဘဲ ပြန်တိုက်နေတာ” ဟု ရခိုင်စစ်ရေးသတင်းရင်းမြစ်က ဧရာဝတီတိုင်းမ်ကို ပြောသည်။
စစ်ကော်မရှင်သည် AA ရှိရာနေရာများကို အင်အားအလုံးအရင်းဖြင့် ဝင်ရောက်လာသည့်အတွက် တိုက်ပွဲဖြစ်ပွားနေခြင်းဖြစ်ကြောင်း သိရသည်။
ပြီးခဲ့သည့်ရက်ပိုင်းအတွင်းကလည်း စစ်ကော်မရှင်တပ်များသည် လိပ်ခမော်ရွာသစ်နှင့် လိပ်ခမော်ရွာဟောင်းတို့ကို အင်အားအလုံးအရင်းနှင့် စစ်ကြောင်းထိုးဝင်ရောက်ကာ ရွာကို မီးရှို့ဖျက်ဆီးမှုများ ပြုလုပ်ခဲ့သည်။
ထို့ မီးရှို့ဖျက်ဆီးခံရသည့် ကျေးရွာများမှာ AAက နောက်ဆုတ်ပေးခဲ့သည့် ကျေးရွာများဖြစ်ပြီး စစ်ကော်မရှင်က ဝင်ရောက်ချိန်တွင် ဖျက်ဆီးမှုများပါ ပြုလုပ်ခဲ့ခြင်းဖြစ်ကြောင်း သိရသည်။
အာရက္ခတပ် (AA) သည် ယနေ့ ဩဂုတ် ၁၇ ရက်နေ့ နံနက်ပိုင်းမှစ၍ ပြန်လည်ခုခံတိုက်ခိုက်မှုများ ပြုလုပ်လာသည့် အတွက် နှစ်ဖက်တိုက်ပွဲ ပြင်းထန်နေကြောင်း သိရသည်။
ပုံစာ-AA တပ်ဖွဲ့ဝင်များကိုတွေ့ရစဉ် (ပုံဟောင်း)
