မဲဆောက်တွင် အွန်လိုင်းငွေလိမ်လည်မှုဖြင့် မြန်မာနိုင်ငံသား ၃ ဦးကို ဘတ်ငွေ ၄၆ သန်းနှင့်အတူ ဖမ်းဆီး

ဧရာဝတီတိုင်းမ်
ဩဂုတ် ၉ ရက်

ထိုင်းနိုင်ငံ၊ မဲဆောက်မြို့တွင် ထိုင်းဗဟိုစုံစမ်းစစ်ဆေးရေးဗျူရို (CIB) သည် နည်းပညာ ရာဇဝတ်မှုနှိမ်နင်းရေးဌာန (TCSD) မှတစ်ဆင့် အွန်လိုင်းငွေလိမ်လည်မှုပြုလုပ်သူ မြန်မာနိုင်ငံသား သုံး ဦးကို ဘတ်ငွေ ၄၆ သန်းနှင့်အတူ ဖမ်းဆီးရမိခဲ့ကြောင်း သိရသည်။

ဖမ်းဆီးရမိသူ မြန်မာနိုင်ငံသား သုံး ဦးမှာ ဦးရှင် (၅၇ နှစ်)၊ ဒေါ်သီတာ (၅၇ နှစ်) နှင့် လောက်ဝေး (၅၄ နှစ်) တို့ဖြစ်ကြပြီး လိမ်လည်ခံရသူများ၏ တိုင်ကြားမှုအရ စောင့်ကြည့်စုံစမ်းပြီးနောက် ထာ့ဆိုင်လု ရပ်ကွက်ရှိ နေအိမ်တစ်လုံးတွင် ငွေသားများနှင့်အတူ ဖမ်းဆီးရမိခဲ့ခြင်းဖြစ်သည်။

ငွေကြေးလိမ်လည်သည့်အဖွဲ့အစည်းမှာ ဖေ့စ်ဘွတ်ခ်လူမှုကွန်ရက်စာမျက်နှာကိုအသုံးပြုကာ စတော့ ရှယ်ယာ ရောင်းဝယ်မှုများကို အကြံပေးသည့် ပုံစံဖြင့် လိမ်လည်မှုများပြုလုပ်ခဲ့ပြီး “Ulela Max” အမည်ရှိ လိမ်လည်သည့်အက်ပလီကေးရှင်းကို အသုံးပြုကြောင်း သိရသည်။

ထိုအဖွဲ့အစည်းက စတော့ရှယ်ယာအရောင်းအဝယ်တွင် ရင်းနှီးမြှုပ်နှံရန် ငွေများလွှဲပြောင်းရန်နှင့် အမြတ် ၁၀ ရာခိုင်နှုန်းခန့် ပြန်ရမည်ဖြစ်ကြောင်း ပြောဆိုခဲ့သည်။ အစပိုင်းတွင် အမှန်တကယ် ငွေထုတ်ယူခွင့်ရရှိခဲ့သည့်အတွက် လိမ်လည်ခံရသူများက ဘတ်သန်းပေါင်းများစွာ ဆက်လက်ရင်းနှီး မြှုပ်နှံခဲ့ရာမှ လိမ်လည်ခံခဲ့ရခြင်းဖြစ်ကြောင်း သိရသည်။

လိမ်လည်ခံရသူများမှာ နှစ်လအတွင်း ငွေလွှဲခြင်း ၁၈ ကြိမ်ဖြင့် စုစုပေါင်း ဘတ်သန်း ၂၀ ကျော်ကို ငွေလွှဲခဲ့ကြပြီးနောက် လိမ်လည်ခံရကြောင်း သိရှိလာသည့်အတွက် ရဲတပ်ဖွဲ့ကို တိုင်ကြားခဲ့ရာမှတစ်ဆင့် စုံစမ်းမှုများပြုလုပ်ခဲ့ခြင်းဖြစ်သည်။ ရှုပ်ထွေးသည့် ငွေကြေးလွှဲပြောင်းမှုများအပြီးတွင် ငွေကြေးခဝါ ချကာ ငွေသားလဲလှယ်သည့် မြန်မာနိုင်ငံသာ သုံး ဦးကို စုံစမ်းဖမ်းဆီးနိုင်ခဲ့ခြင်းဖြစ်သည်။

စုံစမ်းစစ်ဆေးမှုများအရ ဖမ်းဆီးခံရသူများမှာ နေ့စဉ် ဘတ်သန်း ၂၀ မှ ၃၀ အထိ ထုတ်ယူ၍ မြန်မာပြည်တွင်းသို့ ငွေသားများကို မှောင်ခိုသွင်းနေကြောင်း သိရသည်။ ထို့ပြင် မြန်မာနိုင်ငံသား လေး ဦးအပါအဝင် သံသယရှိသူ ၂၈ ဦးကိုလည်း ဖမ်းဝရမ်းထုတ်ရန် လုံလောက်သည့် သက်သေများ စုဆောင်းထားပြီဖြစ်ကြောင်းလည်း သိရသည်။

ဖမ်းဆီးခံရသည့် မြန်မာနိုင်ငံသား သုံး ဦးသည် ၎င်းတို့အပေါ်စွပ်စွဲချက်များကို ငြင်းဆိုခဲ့ပြီး အယောင်ဆောင်ကာပြည်သူများကိုလှည့်စားရန် ပူးပေါင်းကြံစည်ခြင်း၊ ရာဇဝတ်အဖွဲ့အစည်းတွင် ပါဝင်ခြင်း၊ အန္တရာယ်ဖြစ်စေနိုင်သည့် သတင်းအချက် အလက်အမှားများကို ကွန်ပျူတာစနစ်ထဲသို့ လိမ်လည်ထည့်သွင်းခြင်း စသည့်စွဲချက်များကို ရင်ဆိုင်နေရ ကြောင်သိရသည်။

ကိုးကား: The Nation Thailand
Refs: Authorities seize 46 million baht in cash from transnational money-laundering operation