ဧရာဝတီတိုင်းမ်
ဩဂုတ် ၉ ရက်
ဧရာ၀တီတိုင်း၊ ပုသိမ်မြို့၊ ရွှေမြင်တင်ကျေးရွာတွင်ရှိသော အမှတ် ၆ စစ်အခြေခံလေ့ကျင့်ရေးတပ်မှ ပြည်သူ့စစ်မှုထမ်း သင်တန်းဆင်းများကိုသြဂုတ်လ(၉)ရက်နေ့ နံနက် ( ယနေ့ ) တွင် ရှေ့တန်းသို့ပို့ဆောင်ရန် လာရောက်ခေါ်ဆောင်သွားကြောင်း သိရသည်။
စစ်တပ်သုံး ကားအကြီးနှစ်စီးဖြင့်သင်တန်းဆင်းတပ်သား ၁၀၀ ခန့်ကိုတင်ဆောင်ကာ ဟွန်းတီးပြီးအမြန်မောင်းသွားကြောင်း မျက်မြင်တွေ့ရှိသူဒေသခံများထံက သိရသည်။
“သင်တန်းဆင်းခါစတွေကို စစ်၀တ်စုံ၀တ်ပြီး လက်နက်တော့မပေးဘူး။ ကားအတွင်းမှာတန်းစီထိုင်ခိုင်းထားတယ်၊ ဘေးကစစ်သားတွေကလက်နက်တွေနဲ့စောင့်ပြီး ခေါ်သွားတာတွေ့ရတယ်”ဟု ဒေသခံတစ်ဦးမှဧရာ၀တီတိုင်းမ်ကိုပြောသည်။
လက်ရှိတွင် ပြည်သူ့စစ်မှုထမ်းသင်တန်း အပါတ်စဥ် ၁၆ ကို စတင်ရန်စိစဥ်နေပြီး ယခု ရှေ့တန်းသို့ပို့ဆောင်ခံရသူများမှာ အပါတ်စဉ် ၁၃ မှ နှစ်လကြာသင်တန်းတက်ထားသူများဖြစ်ကြောင်း စစ်တပ်နှင့်နီးစပ်သူများထံမှသိရှိရသည်။
ဧရာ၀တီတိုင်းရှိ ငါးသိုင်းချောင်း၊ လေးမျက်နှာမြို့နယ်များတွင် အာရက္ခတပ်တော် ပူးပေါင်းတပ်များနှင့်စစ်ကောင်စီတပ်တို့ကြား တိုက်ပွဲများပြင်းထန်နေပြီး စစ်ကောင်စီမှ သေဆုံးထွက်ပြေးသူများပြားလာသောကြောင့်ပြည်သူ့စစ်မှုထမ်းသင်တန်းဆင်းများကို ခေါ်ယူ အသုံးပြုနေရကြောင်း သိရသည်။
