ဧရာဝတီတိုင်းမ်
ဩဂုတ် ၇ ရက်
ဧရာ၀တီတိုင်း၊ဟင်္သာတမြို့နယ် ၊ဓမ္ဘီတိုက်နယ် အတွင်းရှိ သဲဖြူကျေးရွာအုပ်စုတွင် လစဥ်စစ်မှုထမ်းကြေးကောက်ခံနေပြီး မပေးနိုင်ပါကပေါ်တာဆွဲပြီးစစ်တပ်သို့ပို့ဆောင်မည်ဟု အုပ်ချုပ်ရေးမှူးက ခြိမ်းခြောက်နေကြောင်းဒေသခံများထံမှ သိရသည်။
ကျေးရွာအုပ်ချုပ်ရေးမှူး ဦးစိုးနိုင်နှင့်စာရေးဖြစ်သူ ချစ်ထွေးဆိုသူတို့မှ ကျေးရွာအတွင်း အသက်၁၈ နှစ်မှ ၃၅နှစ်အတွင်းရှိသည့် နေအိမ်များကို တစ်ဦးလျှင် တစ်သိန်း ငါးသောင်းကျပ်နှင့် ၃၅နှစ်အထက်ရှိသူများ၏ နေအိမ်များကို သုံးသောင်းကျပ်လစဥ် စစ်မှုထမ်းကြေးအဖြစ် လိုက်လံကောက်ခံနေကြောင်းသိရသည်။
“ပိုက်ဆံတောင်းတာမပေးရင်စစ်ထဲ ပို့ပစ်မယ်လို့ ခြိမ်းခြောက်သေးတယ်။ စစ်မှုထမ်းကအမြဲပေးရတာမဟုတ်ပဲ အမြဲငွေထည့်နေရတယ်”ဟု ဒေသခံတစ်ဦးမှ ဧရာ၀တီတိုင်းမ်ကိုပြောသည်။
ကျေးရွာအုပ်စုတွင် စစ်မှုထမ်း အပါတ်စဉ် ၁ မှ စတင်ကာ ယခု အပါတ်စဉ် ၁၆ အထိ လစဥ်တိုင်းပေးဆောင်နေရပြီး အပါတ်စဥ် ၃ တွင် ကျေးရွာအတွင်းမှ လူငယ်တစ်ဦးကို မူးယစ်ရမ်းကားသည်ဟုစွပ်စွဲကာ စစ်မှုထမ်းအဖြစ်ပို့ဆောင်ခဲ့ပြီး ကျေးရွာအတွင်း စစ်မှုထမ်း ထောက်ပံ့ရန် ကောက်ခံခဲ့သည့် ငွေများကို အုပ်ချုပ်ရေးမှူးနှင့်အဖွဲ့က ခွဲဝေသုံးစွဲခဲ့ကြောင်းသိရသည်။
အဆိုပါ ကျေးရွာ အုပ်စုတွင် အိမ်ခြေ ၃၀၀ ကျော်ရှိပြီး ဒေသခံများအနေဖြင့် လစဥ်တိုင်းသတ်မှတ်ကောက်ခံနေသောကြောင့် အတိုးဖြင့်အကြွေးယူကာပေးနေရပြီး စား၀တ်နေရေးအခက်အခဲများကြုံတွေ့နေရသည်ဟုဆိုသည်။
