ဧရာဝတီတိုင်းမ်
ဩဂုတ် ၅ ရက်
ရန်ကုန်တိုင်း၊ ဒေါပုံမြို့နယ်ရှိ နွယ်အေးရပ်ကွက်တွင် စစ်ကော်မရှင်နှင့်အဖွဲ့က လူငယ်များကိုဖမ်းဆီးပြီး စစ်မှုထမ်းရန်ပို့ဆောင်ကာ ငွေညှစ်မှုများရှိနေကြောင်း သိရသည်။
သာကေတနှင့်ဒေါပုံမြို့နယ်တဝိုက်မှ လူငယ်များကို စစ်ကော်မရှင်နှင့် ရပ်ကွက်အုပ်ချုပ်ရေးမှူးအဖွဲ့က ပေါ်တာဆွဲဖမ်းဆီးပြီး နွယ်အေးရပ်ကွက်၊ အေးရွာရှိ ဂိုထောင်တစ်ခုတွင်ချုပ်နှောင်ထားကြောင်း သိရသည်။
ဖမ်းဆီးထားသည့် လူငယ်၊ လူရွယ်များကို အရက်နှင့် မူးယစ်ဆေးဝါးများ တိုက်ကျွေးထားကာ စစ်မှုထမ်းဖောင်တွင် လက်မှတ်ရေးထိုးခိုင်းကြောင်း Rangoon Scout Network ၏ထုတ်ပြန် ချက်အရ သိရသည်။
”ပြန်ပေးဆွဲသလိုဖမ်းခေါ်နေကြတာပါ။ အုပ်ချုပ်ရေးရုံးထဲ ထုနှက်ပြီး အိမ်ကိုလာရွေးခိုင်းတာရှိသလို၊ စစ်မှုထမ်းထဲ ထည့်လိုက်တာတွေလည်း ရှိတယ်” ဟု ဒေါပုံတွင် နေထိုင်သူအမျိုးသမီးတစ်ဦးက ဧရာဝတီတိုင်းမ်ကို ပြောသည်။
ဖမ်းဆီးထားသည်ကို သိရှိပြီး လာရောက်ရွေးယူသည့် မိသားစုဝင်များထံမှ ကျွေးမွေးစရိတ်ဟုဆိုကာ ကျပ်ငွေ ၅သိန်းအထက် တောင်းယူမှုများရှိကြောင်း သိရသည်။ငွေကြေးတတ်နိုင်သည့် မိသားစုဝင်ဆိုပါက ငွေကျပ် သိန်းရာနှင့်ချီတောင်းယူပြီး မပေးပါက စစ်မှုထမ်းခိုင်းမည်ဟု ခြိမ်းခြောက်မှုများရှိကြောင်း ဒေါပုံမြို့နယ်အတွင်း နေသူများထံမှ သိရသည်။
ပြီးခဲ့သည့် လအတွင်းကလည်း လူငယ်တစ်ဦးကို ရပ်ကွက်အုပ်ချုပ်ရေးမှူးနှင့် အဖွဲ့က ဖမ်းဆီးသွားရာ အဆိုပါလူငယ်မှာ ဒေါပုံ ရဲစခန်းမှ ရဲတပ်ဖွဲ့ဝင်၊ အရာရှိများနှင့် ခြင်းခတ်နေကျ ရင်းနှီးသူဖြစ်သည့်အတွက် ဒုရဲအုပ်နှင့်အဖွဲ့က သွားရောက်ရွေးယူခဲ့ရကြောင်း သိရသည်။
ပုံစာ-စစ်ကော်မရှင်၏ စစ်မှုထမ်းသင်တန် သင်တန်းတက်ရောက်ရန် အဓမ္မခေါ်ယူစုဆောင်းခြင်း ခံခဲ့ရသည့် လူငယ်များ။
