ဧရာဝတီတိုင်းမ်
ဩဂုတ် ၄ရက်
ဖားကန့်မြို့နယ်၊ ဖားကန့်ဗျူဟာအနီးရှိ ညောင်ပင်ကုန်း စခန်းကုန်းကို ကချင်လွတ်လပ်ရေးတပ်မတော် (KIA) က ပြန်လည် သိမ်းယူလိုက်ပြီး တိုက်ပွဲဆက်လက်ဖြစ်ပွားနေကြောင်း သိရသည်။
ရှရော်ခရွာအဝင်ရှိ ညောင်ပင်ကုန်းစခန်းကို ပြီးခဲ့သည့် ဩဂုတ် ၂ရက်နေ့တွင် စစ်ကော်မရှင်က ထိုးစစ်ဆင်ဝင်ရောက်သိမ်းယူခဲ့ခြင်းဖြစ်ပြီး ယနေ့ ဩဂုတ် ၄ရက် နံနက်ပိုင်းတွင် KIA က ပြန်လည်သိမ်းယူလိုက်ကြောင်း ဒေသတွင်းသတင်းရင်းမြစ်များထံမှ သိရသည်။
ထို့ကြောင့် စခန်းကုန်းအနီးနှင့် မှော်စီစာရွာ ဘုရားကုန်းအနီးတို့တွင် စစ်တပ်စစ်ကြောင်းနှင့် KIA တို့တိုက်ပွဲ အပြင်းအထန်ဖြစ်ပွားလျက်ရှိကြောင်း သိရသည်။
”လက်နက်ကြီးတွေနဲ့အပြန်အလှန်ပစ်ခတ်ပြီး တိုက်ပွဲပြင်းထန်တယ်။ ရှရော်ခဘက်ရော၊ မှော်စီစာ ဘက်ရော တိုက်ပွဲပြင်းထန်ပါတယ်” ဟု မှော်စီစာ ဒေသခံတစ်ဦးက ဧရာဝတီတိုင်းမ်ကို ပြောသည်။
ယမန်နေ့ ဩဂုတ် ၃ရက်နေ့နှင့် ယနေ့ ဩဂုတ်၄ရက်တို့တွင် ဖြစ်ပွားခဲ့သည့် တိုက်ပွဲအတွင်း မျောက်ဖြူ ကျေးရွာနှင့် ရှရော်ခကျေးရွာတို့မှ ဒေသခံ သုံးဦးသေဆုံးပြီး ၁၀ဦး ဒဏ်ရာ ရရှိခဲ့ကြောင်း ဒေသတွင်း ကူညီနေသူများထံမှ သိရသည်။
စစ်ကောင်စီတပ်များ ဖားကန့်သို့ ဝင်ရောက်လာပြီးနောက် မော်မောင်းကုန်းနှင့် လမောင်ကုန်းတို့ကို စိုးမိုးမှုရယူရန် စစ်ကြောင်းများခွဲကာ ထိုးစစ်ဆင်နေခဲ့ခြင်းဖြစ်ကြောင်း သိရသည်။
စစ်ကော်မရှင်နှင့် KIAတို့ အပြန်အလှန်ရယူရန်ကြိုးပမ်းနေသည့် ညောင်ပင်ကုန်းမှာ ဖားကန့်ဗျူဟာ အနီးတွင်တည်ရှိပြီး စစ်ရေးအရ အရေးပါသည့် စိုးမိုးကုန်းတစ်ခုဖြစ်ကြောင်း သိရသည်။
ပုံစာ-KIA တပ်ဖွဲ့ဝင်များ (ပုံဟောင်း)
