စစ်ကောင်စီလက်ထက် မူးယစ်ဆေးဝါးသုံးစွဲမှု မြင့်တက်နေချိန် အမေရိကန်ဒေါ်လာ သန်း ၃၀၀ နီးပါးတန်ဖိုးရှိ မူးယစ်ဆေးဝါးများ မီးရှို့ဖျက်ဆီးဟု ထုတ်ပြန်

ဧရာဝတီတိုင်းမ်
ဇွန် ၂၈ ရက်

စစ်တပ်အာဏာသိမ်းထားချိန်တွင် မူးယစ်ဆေးဝါးစိုက်ပျိုးထုတ်လုပ်မှု ပိုမိုများပြားလာနေရာ ယခုနှစ် အပြည်ပြည်ဆိုင်ရာမူးယစ်ဆေးဝါးအလွဲသုံးစားမှုနှင့် တရားမဝင်ရောင်းဝယ်မှုတိုက်ဖျက်ရေးနေ့တွင် အမေရိကန်ဒေါ်လာ၂၉၈ သန်း တန်ကြေးရှိ မူးယစ်ဆေးဝါးမျိုးစုံမီးရှို့ဖျက်ဆီးကြောင်း စစ်ကောင်စီက ထုတ်ပြန်သည်။

ရန်ကုန်၊ မန္တလေးတိုင်းအပါအဝင် စစ်ကိုင်းတိုင်းအတွင်းရှိ တမူး၊ ကသာနှင့် ရွှေဘိုမြို့တို့တွင် ဘိန်း၊ ဘိန်းဖြူ၊ စိတ်ကြွရူးသွပ်ဆေးပြား၊ အိုက်စ်(ICE)၊ စိတ်ပြောင်းဆေးဝါး ( Happy Water)၊ ဘိန်းစာမှုန့်၊ ဆေးခြောက် နှင့် ကတ်တမင်း (K)အပါအဝင် မူးယစ်ဆေးဝါးနှင့် ဓာတုပစ္စည်း ၆၆ မျိုးကို ဇွန်လ ၂၆ ရက်နေ့က မီးရှို့ဖျက်ဆီးကြောင်း စစ်ကောင်စီက ဖော်ပြထားသည်။

လက်ရှိတွင်မြို့ကြီးများရှိ ကာရာအိုကေဆိုင်များ၊ Bar များတွင် လူငယ်များ စိတ်ပြောင်းဆေးဝါး ( Happy Water ) သုံးစွဲမှု WY ဆေးပြားသောက်သုံးမှုများလာကြောင်း ရန်ကုန်မြို့ခံများထံမှ သိရသည်။

“ ဆေးသုံးတဲ့သူတွေများလာတယ် အခု K (ကတ်တမင်း)၊ Happy Water၊ Mushroom (မှို) အစုံပဲ ။ Hi (High)ခန်းတွေ အဲဒီအခန်းမှာ စုပြီးသုံးကြတယ်။ နောက် Hi ခန်းက အခန်းအပူချိန်အတိုင်းပဲ ထားရတယ်။ ပူနေရင်ပိုကောင်းတယ်။ အဲဒီမှာ K သုံးကြတယ်။ အမှုန့်ကိုရှူရတာ အမှုန့်ဆိုတော့ အေးရင်ခဲသွားတယ်။ အဲဒါမလို့အခန်းထဲ ပူနေမှကောင်းတယ်။ နောက်ပြီးအများနဲ့စုသုံးရတော့ HIV ပိုးကူးစက်တာတွေများလာတယ်” ဟု ရန်ကုန်ရှိ စားသောက်ဆိုင်တစ်ခုမှဝန်ထမ်း အမျိုးသားတစ်ဦးက ဧရာ၀တီတိုင်းမ်ကို ပြောသည်။

ပြီးခဲ့သည့်ရက်ပိုင်းတွင် ရှမ်းပြည်နယ်တောင်ပိုင်း မိုင်းပန်မြို့နယ်တွင် KTV တစ်ခုတွင် Happy Water သောက်သုံးသူ ဆယ်ကျော်သက်မိန်းကလေး လေးဦးတွင် တစ်ဦးသေဆုံးခဲ့ပြီး သုံးဦးဆေးရုံတက်ကာ ဆေးကုသမှုခံယူရ ကြောင်းသိရသည်။

မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဖမ်းဆီးမှုတွင် ၂၀၂၃ ခုနှစ်၌ အမေရိကန် ဒေါ်လာ ၅၀၃ ဒသမ ၆၉၆ သန်း၊ ၂၀၂၄ ခုနှစ်တွင် အမေရိကန်ဒေါ်လာ ၃၄၉ သန်း တန်ကြေး ဖမ်းဆီးရမိကြောင်း မြန်မာနိုင်ငံရဲတပ်ဖွဲ့ထံမှ သိရသည်။

ဓာတ်ပုံ – စစ်ကောင်စီ
#မူးယစ်ဆေးဝါး #ကန်ဒေါ်လာ၂၉၈သန်း #မီးရှို့ဖျက်ဆီး #စစ်ကောင်စီ #လူငယ်များ #မူးယစ်ဆေးသုံးစွဲမှုများ #Ayeyarwaddy_Times