လေးမျက်နှာတွင် ရပ်ကျေးအုပ်ချုပ်ရေးမှူးနှင့်် ရာအိမ်မှူးများက ပြည်သူ့စစ်မှုထမ်းအကြောင်းပြပြီး စစ်ရှောင်နေအိမ်များကို ခြိမ်းခြောက်ငွေတောင်း

ဧရာဝတီတိုင်းမ်
ဧပြီ ၈ ရက်

ဧရာဝတီတိုင်း၊ လေးမျက်နှာမြို့နယ်၊ သောင်ဘုတ်အုပ်စုတွင် စစ်ကောင်စီခန့် ရပ်ကျေးအုပ်ချုပ်ရေးမှူးနှင့် ရာအိမ်မှူးများကပြည်သူ့စစ်မှုထမ်းအကြောင်ပြ၍ ငွေများတောင်းယူနေကြောင်း ဒေသခံများထံမှ သိရသည်။

နေအိမ်တစ်အိမ်လျှင် အသက် ၁၈နှစ်မှ ၃၅နှစ်အတွင်း တစ်ဦးရှိပါက ကျပ်ငွေရှစ်သောင်း၊ နှစ်ဦးရှိလျှင် ကျပ်ငွေ တစ်သိန်းခွဲအထိပေးရကြောင်း ဒေသခံများက ဆိုသည်။

“ပြည်သူ့စစ်မှုထမ်း စုဆောင်းရေးဆိုပြီး​ ခြိမ်းခြောက်ပြီး ပိုက်ဆံတွေအတင်းတောင်းနေတာ။ ပြီတော့နယ်ဘက်မှာက စစ်ရှောင်နေကြရတာ။ ဒါကို အတင်းငွေတောင်းနေတော့ အတော်လေး ဒုက္ခရောက်နေကြပါတယ်” ဟု သောင်ဘုတ်အုပ်စုရှိဒေသခံတစ်ဦးက ဧရာဝတီတိုင်းမ်ကိုပြောသည်။

လေးမျက်နှာမြို့နယ်၊ သောင်ဘုတ်အုပ်စုတွင် စစ်ကောင်စီတပ်နှင့် အာရက္ခတပ်တော်(AA) ၊ ပြည်သူကာကွယ်ရေးတပ်မတော် (PDF) ပူးပေါင်းတပ်တို့ တိုက်ပွဲဖြစ်ပွားခဲ့ပြီး အဆိုပါ ကျေးရွာများမှ ဒေသခံအများစုသည် စစ်ဘေးရှောင်နေကြရကြောင်း ဒေသခံများထံမှ သိရသည်။

ဧရာဝတီတိုင်းအတွင်း မြို့နယ် ၂၆မြို့နယ်ရှိပြီး စစ်ကောင်စီခန့် ရပ်ကျေး၊ ရပ်ကွက် အုပ်ချုပ်ရေးမှူး၊ ဆယ်အိမ်မှူး၊ ရာအိမ်မှူးအများစုမှာ ယခုအချိန်အထိ ပြည်သူ့စစ်မှုထမ်းအကြောင်းပြ၍ ငွေကြေး​တောင်းယူမှုများ ပြုလုပ်လျက်ရှိသည်။

#လေးမျက်နှာ #ရပ်ကျေးအုပ်ချုပ်ရေးမှူး #ရာအိမ်မှူးများ #ပြည်သူ့စစ်မှုထမ်းအကြောင်းပြ #စစ်ရှောင်နေအိမ်များ #ခြိမ်းခြောက်ငွေတောင်း #Ayeyarwaddy_Times