လေကြောင်းမှ ချပေးသည့်ရိက္ခာများ တော်လှန် ရေးတပ်ဖွဲ့များထံ ရောက်ရှိမှုများနေ၍ သဲအိတ်များနှင့်စမ်းသပ်ပြီးမှ ရိက္ခာချပေးရသည်အထိဖြစ်လာ

ဧရာဝတီတိုင်းမ်
မတ် ၁၁ ရက်

စစ်ကောင်စီတပ်ဖွဲ့များထံ လေကြောင်းမှရိက္ခာချပေးရာတွင် မြေပြင်လမ်းကြောင်းပိတ်ဆို့ခံရပြီး တော်လှန်ရေး တပ်ဖွဲ့များထံ ရောက်ရှိမှုများနေ၍ သဲအိတ်များနှင့် စမ်း သပ်ပြီးမှသာ အောက်သို့ချပေးရသည် အထိဖြစ်လာကြောင်း သိရသည်။

စစ်ကောင်စီသည် လေကြောင်းမှ လိုအပ်သည့် လက်နက်ခဲယမ်းနှင့် ရိက္ခာထုပ်များကို တိုက်ပွဲနေရာသို့ ပေးပို့ရာတွင် ရိက္ခာထုပ်များနှင့် အ လေးချိန်တူ သဲအိတ်များကို အရင်ချပေးနေ ကြောင်း သိရသည်။

“မြေပြင်အဖွဲ့တွေနဲ့ ချိတ်ဆက်မေးမြန်းမှုအရပေါ့နော် အရင်ဆုံးသဲအိတ်ကို ချလိုက်တယ် နေရာလွဲမှာဆိုးလို့ သဲအိတ်ကျတဲ့နေရာဝေးနေတယ်ဆိုရင် မီတာဘယ်လောက်အကွာဆိုတာကြည့်ပြီး သဲအိတ်တွေချလို့နေရာမှန်ပြီဆိုမှ နောက်ကနေ အလေးချိန်တူတဲ့ ရိက္ခာထုပ်တို့ ခဲယမ်းထုပ်တို့ကို ချတာပါ”ဟု CDM ဗိုလ်ကြီးဇင်ယော်က ဧရာဝတီတိုင်းမ်ကို ပြောသည်။

ရိက္ခာထုပ်များကို လေကြောင်းမှ ပစ်မချမီ တစ်ပတ်ပတ်ပြီးမှ မြေပြင်ဆက်သွယ်မှု လုပ်ဆောင်ကာ သဲအိတ်များကို ပစ်ချစမ်းသပ်ပြီးမှ ရိက္ခာ ထုပ်များကို ချပေးခြင်းဖြစ်သည်ဟု ဆိုသည်။

လနှင့်ချီ၍ ပိတ်ဆို့ခံထားရသည့် တိုက်ပွဲများဖြစ်သည့် အမ်း၊ မောင်တောနှင့် ပင်လည်ဘူးတိုက်ပွဲတို့တွင် စစ်ကောင်စီက ချပေးသည့်ရိက္ခာထုပ်များသည် တပ်ရင်းနှင့် တပ်မဌာနချုပ်တို့ထံ ရောက်ရှိခြင်းမရှိဘဲ တော်လှန်ရေးတပ်ဖွဲ့များက ကောက်ယူသိမ်းဆည်းသွားသည့် ဖြစ်စဉ်များရှိခဲ့ကြောင်း သိရသည်။

ယခုလအတွင်း ကချင်တိုက်ပွဲများတွင်လည်း စစ်ကောင်စီတပ်ကို ချပေးသည့်ရိက္ခာထုပ်များ ကချင်လွတ်လပ်ရေးတပ်မတော်(KIA) ထံ ရောက်ရှိသွားသဖြင့် ယခုကဲ့သို့ သဲအိတ်များနှင့် ဦးစွာ စမ်းသပ်ပြီး ရိက္ခာချပေးသည့်လုပ်ရပ်များ လုပ်ဆောင်လာခြင်းဖြစ်ကြောင်း တပ်သတင်းရင်းမြစ်က ဆိုသည်။

စစ်ကောင်စီသည် လက်ရှိတွင် တိုက်ပွဲပြင်းထန်နေသည့် ပန်းတောင်းမြို့နယ်မှ ညောင်ကျိုးစခန်းကို လေကြောင်းမှ ရိက္ခာပေးပို့နိုင်ခြင်း မရှိသည့် အတွက် ဒေသခံပြည်သူများကို ထမင်းထုပ်ပို့ခိုင်းနေကြောင်း ဒေသခံများထံက သိရသည်။

ရခိုင်-ဧရာဝတီအစပ် သာပေါင်း၊ ငါးသိုင်းချောင်း၊ ရခိုင်-ပဲခူးအစပ် ညောင်ကျိုး၊ ရခိုင်-မကွေးအစပ် နတ်ရေကန်တိုက်ပွဲတို့တွင် အနီးကပ်တိုက်ပွဲဖြစ် ပွားနေခြင်းကြောင့် စစ်ကောင်စီက လေယာဉ်ပစ်ကူမပေးနိုင်ကြောင်း စစ်ရေးသတင်းရင်းမြစ်ထံက သိရသည်။

ပုံစာ-၂၀၂၄၊ စက်တင်ဘာ ၁ ရက်က မကွေးတိုင်းမြိုင်မြို့နယ်ရှိ ပျူရွာသို့ပေးပို့သည့်ရိက္ခာထုပ်များ တော်လှန်ရေးတပ်ဖွဲ့ထံရောက်ရှိခဲ့စဉ်က (ပုံဟောင်း)
#စစ်ကောင်စီ #လေကြောင်း #ရိက္ခာထုပ် #ပို့ဆောင်မှု #သဲအိတ် #စမ်းသပ်ချ #Ayeyarwaddy_Times