ဧရာဝတီတိုင်းမ်
(မိုးဗြဲ)၊ မတ် ၅ ရက်
ရှမ်း-ကရင်နီနယ်စပ်ဒေသရှိ ဖယ်ခုံမြို့နယ်၊ မိုးဗြဲမြို့တွင် စစ်ကောင်စီနှင့် ကရင်နီတော်လှန်ရေးတပ်ဖွဲ့တို့ တိုက်ပွဲဆက်လက်ပြင်းထန်နေပြီး ဖေဖော်ဝါရီ ၂၇ ရက်နေ့ တိုက်ပွဲတွင် စစ်ကောင်စီတပ်သား အလောင်း ၁၂ လောင်း ရရှိခဲ့ကြောင်း အမှတ် (၁၀၀၁)တပ်ရင်း၊ မိုးဗြဲပြည်သူ့ကာကွယ်ရေးတပ်ဖွဲ့ထံက သိရသည်။
စစ်ကောင်စီသည် မိုးဗြဲမြို့ကို ရရှိရေးအတွက် လေကြောင်းပစ်ကူ၊ လက်နက်ကြီးပစ်ကူများဖြင့် အပြင်းအထန် ထိုးစစ်ဆင် နေပြီး အဆိုပါ ဖေဖော်ဝါရီ ၂၇ ရက်နေ့တွင် တိုက်ပွဲပိုမိုပြင်းထန်ခဲ့ပြီး စစ်ကောင်စီတပ်ဖွဲ့ဝင် ၁၂ ဦးသေဆုံးကာ လက်နက်ခဲယမ်းများလည်း သိမ်းဆည်း ရမိခဲ့ခြင်းဖြစ်သည်။
အဆိုပါတိုက်ပွဲတွင် အမှတ်(၁၀၀၁)၊ မိုးဗြဲပြည်သူ့ကာကွယ်ရေးတပ်၊ တပ်ခွဲ-၃ ကျွဲချိုတပ်ခွဲ မှ ရဲဘော် ကျော်နိုင် ကျဆုံးခဲ့ရ ကြောင်း သိရသည်။
“လက်ရှိမှာတော့ တိုက်ပွဲပြင်းထန်နေတုန်းပဲပေါ့နော်။ လက်နက်ကြီးတွေနဲ့ပစ်တာရှ်ိတယ်။ တိုက်ပွဲ ကတော့ပြီးခဲ့တဲ့ နှစ်ကုန်ပိုင်းလောက်တည်းက ထိုးစစ်စတယ်ပေါ့နော်။ ဒါပေမယ့် ဒီနှစ်အစောပိုင်းနဲ့ ပြီးခဲ့တဲ့လကုန်လောက်နဲ့ ဒီလထဲမှာ ပိုပြီးပြင်းထန်လာတယ်ပေါ့နော်။ အင်အားဖြည့်ပြီးအလုံးအရင်းနဲ့ ပြင်းပြင်းထန်ထန်ထပ်ပြီး ထိုးစစ်ဆင်နေတဲ့အခြေအနေပေါ့နော်” ဟု အမှတ်(၁၀၀၁)တပ်ရင်း၊ မိုးဗြဲပြည်သူ့ကာကွယ်ရေးတပ်ဖွဲ့ တာဝန်ရှိသူတစ်ဦးက ဧရာဝတီတိုင်းမ်ကို ပြောသည်။
ထိတွေ့တိုက်ပွဲများအတွင်း စစ်ကောင်စီတပ်ဖွဲ့ဘက်မှ ထိခိုက်သေဆုံးမှုများလည်း ဆက်လက်ရှိနေပြီး စစ်ကောင်စီသည် အင်အား ၅၀၀ ဝန်းကျင်ဖြင့် မိုးဗြဲမြို့ကို ထိုးစစ်ဆင်တိုက်ခိုက် နေခြင်းဖြစ်ကြောင်း သိရသည်။
ထို့ပြင် စစ်ကောင်စီသည် တိုက်ပွဲဧရိယာမဟုတ်သည့် အရပ်သားများ နေထိုင်ရာနေရာနှင့် စစ်ဘေးရှောင် ပြည်သူများကိုပစ်မှတ်ထား၍ လေကြောင်းအပြင် လက်နက်ကြီးများဖြင့်ပါ ပစ်ခတ်နေသည့်အတွက် အရပ်သားထိခိုက်သေဆုံး မှုများလည်း ရှိကြောင်း သိရသည်။
လက်ရှိတွင် မိုးဗြဲမြို့ကို တော်လှန်ရေးပူး ပေါင်းတပ်ဖွဲ့များဘက်က ထိန်းချုပ်ထားလျက်ရှိကာ မိုးဗြဲမြို့ မကျဆုံးရေးအတွက် အပြင်းအထန်ခုခံလျက် ရှ်ိကြောင်းလည်း မိုးဗြဲPDF က ထုတ်ပြန်ထားသည်။
စစ်ကောင်စီသည် စစ်ရေးအရအရေးပါသည့် မိုးဗြဲမြို့ကို ပြန်လည်ထိန်းချုပ်နိုင်ရန် ယခင် ၂၀၂၄ ခုနှစ် နှစ်ကုန်ပိုင်းမှ စတင်ကာ ထိုးစစ်ဆင်တိုက်ခိုက်နခြင်းဖြစ်ကာ ဓာတုဗုံးများဖြင့် ဗုံးကြဲတိုက်ခိုက်ခြင်း များအပြင် နေအိမ်မီးရှို့ခြင်းများကိုပါ လုပ်ဆောင်နေခြင်း ဖြစ်သည်။
ဓာတ်ပုံ – Mobye People Defense Force
#မိုးဗြဲ #တိုက်ပွဲ #စစ်ကောင်စီ #ထိုးစစ်ဆင်တိုက်ခိုက် #Ayeyarwaddy_Times
